ပယိထၪ့ဒၪန့ၫ အဆၧန့ၥၫအ့ၬဂီၩ့ ပကဘၪ တရၩလၩ့ ဆၧၥၭထိၬအပရၧၫ့အဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပယိထၪ့ဒၪန့ၫ အဆၧန့ၥၫအ့ၬဂီၩ့ ပကဘၪ တရၩလၩ့ ဆၧၥၭထိၬအပရၧၫ့အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ပရၩလၩ့ ကဆါယွၩ အလူအထၫအခံၫ့ စႇ ဂဲၫကဲၪထၪ့ ဆၧလမံၩ့မၬအ့ၬ ပစီၪဘၪလါနၫ့ ၥၭမုဆံၫ့ဎံၪ အကဆါ အဆၧထံၫလၩ့ဒီၪလၩ့ အီၪဝ့ၫဒၪအကၠီၩ့ လၧမူၭခိၪဘၩ့မုးဖၧၩ့ ဆၧဂုထၪ့အၪထၪ့ အၪနဲၪ့န့ ပမၩန့ဝ့ၫဒၪႇ ပမၩကဲၪဝ့ၫဒၪနီၪ ပလကြၨၭ ၥၭနၪ့ဘၪနီၪလီၫႉ

မွဲဆၧနီၪ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ဆၧၥုၪ့ဎွံၫၥၭထိၬဖၧၩ့ ပကဘၪကျ့ၭစၨၭလၧ ယၫနီၪလီၫႉ လၧပဆၧၥၭမၧၫ့ဖၧၩ့ ၦလၧဎွံၪလၩ့ထးထၬ ကဆါယွၩ အလူအထၫ ၦၡၩၥံၪနီၪ ပကအီၪနၪ့ထၪ့ပၥၭဂီၩ့ ပကအၪ့ဎၬ ဆီၫ့မီၪ့လၩ့ထဲၩ့ပၥၭ လဂၩဘၪလဂၩ ပစႇထၪ့ဒိၭန့ထၬ ပဆၧဆူနဲၩ ဘဲၫၥ့ၪလဲၪအကၠီၩ့နီၪလါဆံၭႉ ပဒၪဆၧၫ့ယၫဘၪလိၬၥၭလၧ ၦလၧဎွံၪလၩ့ထးထၬ ကဆါယွၩ အလူအထၫ ၦၡၩၥံၪဂီၩ့ နံၪ့ဆံၫလၩယံၬမၬ ပဆၧဆူနဲၩ ဂုထၪ့အၪထၪ့နီၪ ကဲၪၥ့ၪဝ့ၫနီၪလီၫႉ လါနၫ့ဂ့ၩ မွဲအဝ့ၫၥံၪအကၠီၩ့ ဂဲၫကဲၪထၪ့ ဘဲၫနီၪၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘၪထွ့ၫလၧ ဆၧအဂဲးအဖးအနီဂီၩ့ ပကြၨၭအၪ့စၪ့လၩ့ထဲၩ့ပၥၭနီၪ “ယၩလဂၩ ယၥုၪ့ထၪ့ ဆၧအဂ့ၩအဘွၩၥံၪဧၪႇ ယနၫ့ဆါဒၪ ယၩလဂၩဎးလီၫ ယဖီၪ့ထၪ့ဖံၭထၪ့ဆၧဧၪ လမွဲဘၪ ၦဂူၫဂၩၥံၪအဂး ယကၧၩ့ထၪ့ ဆၧလမံၩ့မံၩ့ဧၪ” ပကအၪ့စၪ့လၩ့ထဲၩ့ပၥၭ ကိၭဂၩဒ့ၭလါဆံၭႉ မုကိၭနံၩဒ့ၭ ပမၩဆၧဖံၭဆၧမၩဖၧၩ့ဒဲ ပအီၪပွံၭထီအခံၫ့ဖၧၩ့ ပကဘၪတရၩလၩ့ ဆၧၥၭထိၬအပရၧၫ့နီၪလီၫႉ ပၥုၪ့ပၥၭဘျိၪ့ႇ ပဂဲးဆံၭဘၭဆံၭ အဆၧမၩၥံၪနီၪ ပအၪ့လုလၩ့ထၬအ့ၬဂီၩ့ ဘဲၫကဆါယွၩၥိၭ ပယိထၪ့ဒၪန့ၫ အဆၧန့ၥၫအ့ၪဂီၩ့ ပကတရၩလၩ့ႇ ပကဎွံၪလၩ့ႇ ပကအၪ့လုထၪ့ ဆၧၥၭထိၬအပရၧၫ့အဂဲး ယရၩလၩ့န့အ့ၪဘၪနၥံၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪဎွံၪလၩ့ ဆၧၥၭထိၬအပရၧၫ့ အချံၫအၥၪ န့ဝ့ၫဒၪ ကိၭဒ့ၭကိၭဂၩလါဆံၭႉ