ပကဘၪယူၭယၪ့မိဖါအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ ပကဘၪယူၭယၪ့မိဖါ အဂဲးအကၠီၩ့နီၪလီၫႉ ပကဲၪဖိၪမုၪဖိၪခွၫၥံၪလဖၪ ပကဘၪယူၭယၪ့မိဖါအဂး ပတၩလၫ့ အီၪဝ့ၫဒၪနီၪလီၫႉ လံၬဆံၫ့ဎံၪဖၧၩ့ ပကဒၪဘၪ လံဆၧပဒၩ့နီၪ မွဲဝ့ၫဒၪ ပကဘၪယူၭယၪ့ မိဖါနီၪလီၫႉ ဆၧအယီၩနီၪ မွဲဝ့ၫဒၪကဆါကၠဲၭ ဖ့ၪလၫ့ထၬပၧၩဆၧပဒၩ့နီၪလီၫႉ ၦဂၪ့ခိၪဖိၪၥံၪယီၩ ကဘၪခိၭနၪ ကဆါကၠဲၭ အဆၧၥီၪ့ဆၧချဲၩ့အဂး ပတၩလၫ့အီၪဝ့ၫဒၪနီၪလီၫႉ ပကဲၪဖိၪမုၪဖိၪခွၫၥံၪလဖၪ ပကဘၪယူၭယၪ့မိဖါ လကၭဒ့ၭဘၪႇ ပကဘၪယူၭယၪ့ ဖံၫဖူၫၥၭၡါၥံၪထီးအလူၬနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦၡၩလနၩ့နၩ့နီၪ ကဘၪယိဂ့ၩယိဘၪမိဖါအဂး အတၩလၫ့ လၩ့ထီးဝ့ၫဒၪနီၪလီၫႉ ကဘၪယိဂ့ၩယိဘၪမိဖါအဂး အခံၫ့အီၪအ့ၬနီၪလီၫႉ ဆၧနီၪအကၠီၩ့ႇ လ့ၩၥိၫ့ထၬဝ့ၫလၧ ၦၡၩယိၦလၧအၥၭၡါၥံၪအီၪဂံၪ့နီၪလီၫႉ ဆၧမၩအယီၩနီၪ မွဲဝ့ၫဒၪ ခွံၬၡိၭမိဖါၥံၪႇ မၩနၧၩ့မၩစၪမိဖါၥံၪ လးခဲၫ့ကမံၩ့နီၪလီၫႉ ပကဲၪဖိၪမုၪဖိၪခွၫၥံၪလဖၪယီၩ ပကဘၪယူၭယၪ့မိဖါႇ ပကဘၪယိဂ့ၩယိဘၪမိဖါအဂး လံၬဆံၫ့ဎံၪဖၧၩ့နီၪ ၥီၪ့ထၬပၧၩႇ ဖ့ၪထုၪ့ထၬပၧၩဆီၪ့ဆီၪ့လ့ၬနီၪလီၫႉ ဆၧလၧကဆါကၠဲၭ အဆၧပဒၩ့နီၪ ဂံၪ့ဒီၪ့ဖိၪၥံၪ ဆၧယံၩဆၧၡီၩ့ကအီၪအဂးဒဲ ကဆါကၠဲၭအခိးအတၩ ကယွၩလၩ့လၧ အဝ့ၫၥံၪ အဖၫ့ခိၪအဂးနီၪလီၫႉ

 အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧမိဖါၥံၪနီၪ ပကအီၪၥၭမၧၫ့လၧ ဂၪ့ခိၪယီၩအဂး အီၪဖျဲၪန့ပၧၩႇ ယိဂ့ၩယိဘၪပၧၩ ဆၧအလိၪထီးအလူၬနီၪလီၫႉ မိဖါၥံၪနီၪ ဖိၪမုၪဖိၪခွၫအဂး ထိးဆၧပွံၩအၥၭႇ ထိးဆၫအၥၭႇ ဖ့ၪလၫ့လၩ့ၥၭ ဒၪဆၧၫ့ယၫ ဆၧကၪဆၧဂဲၩကိၭမံၩ့နီၪလီၫႉ ဆၧအယီၩနီၪ မွဲဝ့ၫဒၪ မိဖါအဆၧအဲၪဆၧကွံၩဎိၩဒိၪလၧ ဖိၪမုၪဖိၪခွၫအဖၫ့ခိၪနီၪလီၫႉ  မိဖါၥံၪအီၪအကၠီၩ့နီၪ ပဂဲၫအီၪၥၭမၧၫ့လၧ ဂၪ့ခိၪယီၩ န့ဝ့ၫဒၪနီၪလီၫႉ ဆၧနီၪအကၠီၩ့ႇ ပကဲၪဖိၪမုၪဖိၪခွၫၥံၪယီၩ ပကဘၪၥ့ၪယၫ မိဖါအခိးအတၩ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ