ဆၧလၧဆၧအဲၪဆၧကွံၩနီၪ အူၭလၩ့ၥၭလအီၪဘၪအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ  ဆၧအဲၪဆၧကွံၩနီၪ အူၭလၩ့ၥၭလအီၪဘၪ  အဂဲးအကၠီၩ့နီၪလီၫႉ ၦလၧၫ့ဎွ့ၩလၧ ဆၧအဲၪဆၧကွံၩကဂၩနီၪ ဂၭဎ့ၭမၩဖျီၪထၪ့ အနၫ့ဆါအဂ့ၩဂီၩ့ လီၩဖျီၪထၪ့ထဲၩ့ ၦၡၩအဂ့ၩၥ့ၪဝ့ၫဒၪနီၪလီၫႉ ၦၡၩၥၭဆုးလီၩအၥၭလၧ အဝ့ၫအဂး အၥၭလူၬလအီၪဘၪနီၪလီၫႉ ၦလၧဆၧအဲၪဆၧကွံၩအီၪအၡါမၬနီၪ ရၧးစၧးလအီၪဘၪနီၪလီၫႉ ၦၡၩလနၩ့နၩ့နီၪ ၥ့ၪယၫဆၧအၪန့ၦၡၩႇ မၩဆၧၥ့ၪအၪန့ၦၡၩႇ လၧအကၧၩ့ဒိၪ ထီးအလူၬနီၪ စီၪဎိၩလၩ့အၥၭနီၪလီၫႉ လါနၫ့ဂ့ၩႇ ဆၧအယီၩနီၪ လၧအကၧၩ့ဒိၪ အၪနဲၪ့အၪအၪဂီဂီ ၦၡၩဧၪနီၪ ပကဘၪဆီၫ့မီၪ့ အၪ့ဂၬလၩ့ပၥၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦလၧအကၧၩ့ဒိၪ အီၪအၪန့ၦၡၩကဒီၪနီၪ နၪၥ့ၪၦၡၩအဂးႇ ၥၭခိၦၡၩအဂးႇ ၦလၧၥၭလၩ့ဆံၭၥံၪအဂး  မၩဆၧၩ့ဝ့ၫဒၪနီၪလီၫႉ ဆၧလၧပကဲၪဎရံၬဖိၪၥံၪနီၪ ၦလၧဆၧအဲၪဆၧကွံၩလအီၪဘၪၥံၪႇ ၦလၧၥၭလၩ့ဆံၭၥံၪႇ ၦလၧဆၧအနဲၩလအီၪဘၪလၧ ကဆါကၠဲၭအဖၫ့ခိၪၥံၪအဂး ပကဘၪမၩဆၧၩ့အ့ၪအဝ့ၫၥံၪ လိၪဝ့ၫဒၪနီၪလီၫႉ ဆၧလၧဆၧအဲၪဆၧကွံၩဖၧၩ့နီၪ ပကဒၪဘၪ ဆၪ့လၩ့စူၪထီၩ့နီၪလီၫႉ ဆၧလၧပကဲၪၦၡၩနီၪ ပၥၭခံဖၧၩ့ ပကဖျါခွံၬလိၬၥၭ ဆၧဘၪမၪႇ လဂၩဘၪလဂၩ ပကၥ့ၪယၫနၪၥ့ၪလိၬၥၭႇ ပကမၩဆၧၩ့လိၬၥၭ စွါဘဲၫႇ  ဆၧအီၪက့ၪဎိၩၥၭၥံၪ ကလၩ့မၬခွံၬဂီၩ့ ဆၧဆၪ့လၩ့ၥံၪ လ့ၩထၪ့လ့ၩထီၫ ကအီၪဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါဎြံၬလီၩထၬ အထံၩအဖျဲၥံၪ ဆၧချဲၩ့ကမံၩ့နီၪ မွဲဝ့ၫဒၪ ဆၧလၧၦၡၩနီၪ ဒုၭနဲၪအစီၩ့အမၩ့ဂီၩ့ မၩအၧၩ့မၩနၬၦၡၩၥ့ၪဝ့ၫဒၪနီၪလီၫႉ ကဆါဎြံၬလီၩထဲၩ့အထံၩအဖျဲၥံၪ လၧခဲၫ့ကမံၩ့နီၪႇ နၥံၪထီးအလူၬဖၧၩ့ယီၩ ၦလၧကမိကဲၪအဎိၩထုၬနီၪ ကဘၪကဲၪၦၡၩအခ့ၫအၡၩနီၪလီၫႉ ကဆါကၠဲၭလီၩဝ့ၫဒၪ ၦလၧ အီၪက့ၪထၪ့ထီၫအၥၭကဒီၪနီၪ ထၪ့ဒၩဝ့ၫဂီၩ့ ၦလၧဆၪ့လၩ့ၥၭအီၪကဒီၪ့နီၪ ဖ့ၪအ့ၪဝ့ၫအခိးအတၩ ကိမံၩ့နီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ