အထီဘဲၫယီၩ ဆၧလ့ၩထၪ့လ့ၩထီၫ အီၪဂီၩ့ ပၥၭခံဖၧၩ့ ဆၧမုၬဆၧချံၪ့လအီၪဘၪအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ အထီဘဲၫယီၩ ဆၧလ့ၩထၪ့လ့ၩထီၫအီၪဂီၩ့ ပၥၭခံဖၧၩ့ ဆၧမုၬဆၧချံၪ့လအီၪဘၪ အဂဲးအကၠီၩ့နီၪလီၫႉ ပအီၪဂၪ့ခိၪယီၩ ဆၧလ့ၩထၪ့လ့ၩထီၫ ဂဲၫအီၪထၪ့အၪမၬဒ့ၭနီၪလီၫႉ လါနၫ့ဂ့ၩႇ ဂၪ့ခိၪဖိၪၥံၪ အထီလၧယၫ ဆၧမုၬဆၧလၩက အီၪအဂး နဲၩဝ့ၫလန့ဘၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧကိၪ့ၥ့ၪကိၪ့ဘၪႇ ဆၧၥ့ၪဆၧဘၪ လ့ၩထၪ့လ့ၩထီၫအကီၠၩ့နီၪ ဂၪ့ခိၪဖိၪၥံၪအဂး အဂ့ၩကအီၪႇ လဂ့ၩဘၪကအီၪနီၪလီၫႉ ပၥိၩ့ထၪ့အဂ့ၩအလးနီၪႇ ပကန့ထၪ့ဘၪအဂ့ၩႇ ပၥိၩ့ထၪ့ဆၧလဂ့ၩဘၪအလးနီၪ ပကန့ထၪ့ဘၪဆၧအအၧၩ့နီၪလီၫႉ ဆၧကိၪ့ၥ့ၪကိၪ့ဘၪ ထၪ့ဖိၪအၪထၪ့ အၪမၬဒ့ၭနီၪလီၫႉ  လါနၫ့ဂ့ၩႇ ဒိၪထၪ့ထီၫထၪ့အဂး လိၪဝ့ၫအၪမၬဒ့ၭနီၪလီၫႉ ဂၪ့ခိၪဖၧၩ့ ဆၧပိဆၧလၫ့အၥၫ့ ဂဲၫအၪထၪ့နီၪအကၠီၩ့ လ့ၩထုၭန့ၦၡၩလၧ ဖၧၩ့ၥၭအမံၩ့မံၩ့မံၩ့နီၪလီၫႉ

 အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ စဲၭဆၧပိဆၧလၫ့အၥၫ့ ထၪ့ဖိၪဒၪဆၧ ၦၡၩၥံၪအဆၧၥၭမၧၫ့နီၪ ဘျဲၩထၪ့ၥၭ အီၪအၪမၬဒ့ၭနီၪလီၫႉ ပကယိလၧ ပထီအခံၫ့ယီၩစွါဘဲၫႇ ပကဒၪဘၪ ၦၡၩအၪဒၪဆၧနီၪ အၪ့အူၭၦၡၩဆၧကိၪ့ၥ့ၪကိၪ့ဘၪဂီၩ့ န့ၩခၠၧၫ့အဂ့ၩနီၪ ယိဖၬခွံၬဝ့ၫဒၪနီၪလီၫႉ ဂၪ့ခိၪဖၧၩ့ ဆၧကိၪ့ၥ့ၪကိၪ့ဘၪ ထၪ့ဖိၪနီၪ မွဲဝ့ၫဒၪ အဂ့ၩနီၪလီၫႉ လါနၫ့ဂ့ၩႇ ဂၪ့ခိၪဖိၪၥံၪအဂးနီၪ ဆၧမုၬဆၧလၩအီၪကမံၩ့ႇ ပကယိ လၧခဲၫ့ကမံၩ့နီၪ ၥုၪ့အူၭၥၭအူၭႇ ဆၧၥၭခိႇ ဆၧၥၭမဲၪအီၪဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧကိၪ့ၥ့ၪကိၪ့ဘၪ ထၪ့ဖိၪအကၠီၩ့နီၪ ပကန့ထၪ့ဘၪ အဂ့ၩကအီၪႇ လဂ့ၩဘၪကအီၪနီၪ ပကဘၪၥ့ၪယၫ လိၪဝ့ၫဒၪ နီၪလီၫႉ ပကယိလၧခဲၫ့ကမံၩ့ခီၫစွါဘဲၫႇ ဆၧကိၪ့ၥ့ၪကိၪ့ဘၪထၪ့ဖိၪအကၠီၩ့နီၪ ပၥိၩ့ထၪ့ ဆၧပိဆၧလၫ့ န့အမံၩ့မံၩ့နီၪလီၫႉ အ့ၪပၥိၩ့ထၪ့အလးဘၪနီၪ ပကန့ထၪ့ဘၪ ဆၧအဂ့ၩဂီၩ့ႇ ပၥိၩ့ထၪ့အလးလမွဲဘၪနီၪ ပကန့ထၪ့ဘၪ ၥၭအုၭၥၭလၩ့နီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ