ပကဲၪမိဖါၥံၪလဖၪ ပကဘၪ ယိဂ့ၩယိဘၪ ဖိၪၥၪအၥၭခံဖၧၩ့ လိၪဝ့ၫဒၪအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ  ပကဲၪမိဖါၥံၪလဖၪ  ပကဘၪ ယိဂ့ၩယိဘၪ ဖိၪၥၪအၥၭခံဖၧၩ့ လိၪဝ့ၫဒၪ  အဂဲးအကၠီၩ့နီၪလီၫႉ ဆၧလၧပကဲၪမိဖါၥံၪနီၪ ပကဘၪ  အီၪအၪ့လၧ ဖိၪၥၪအမ့ၬယၫ  ဂ့ၩဂ့ၩဘၪဘၪလိၪဝ့ၫဒၪ အၪမၬဒ့ၭနီၪလီၫႉ ဘၪမနီၪလဲၪစွါဘဲၪႇ ဆၧလၧဖိၪၥၪကမံၩ့နီၪ ထီးန့ထၬဆၧၥ့ၪ ဘုၪဘုၪယီၫယီၫနီၪလီၫႉ မိဖါၥံၪအဆၧလူၬဆၧချဲၩ့ႇ အဆၧလ့ၩဆၧထဲၩ့ႇ အဆၧအၪ့ဆၧအီၪ ထီးအလူၬနီၪ ထီးန့ထၬဝ့ၫၥ့ၪ ကိၭမံၩ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧပကဲၪမိဖါၥံၪနီၪ  ဖိၪၥၪအဂး  ပကဘၪနဲၪအ့ၪအဒီၩ့ ဂ့ၩဂ့ၩဘၪဘၪနီၪလီၫႉ  ဆၧလၧဖိၪၥၪကမံၩ့နီၪ  မိဖါၥံၪႇ ၦၥၭၡါၥံၪ မၩမနီၪလဲၪနီၪ ခိၭယိဝ့ၫဂီၩ့  ထီးန့ဝ့ၫၥ့ၪကိၭမံၩ့နီၪလီၫႉ မိဖါၥံၪလဂၩဘၪလဂၩ  ဆၧမုၬဆၧလၩအီၪအခံၫ့နီၪ ဖိၪၥၪအၥၭခံဖၧၩ့ ကန့ထၪ့ဘၪ ဆၧထိးဘၪၥၭအဂ့ၩနီၪလီၫႉ လါနၫ့ဂ့ၩႇ မိဖါၥံၪအ့ၪဘၪထံၭလိၭၥၭ  ဒၪဘၪဝ့ၫနီၪ ဖိၪၥၪကန့ထၪ့ဘၪ ဆၧထိးဘၪၥၭ ဆၧအအၧၩ့နီၪလီၫႉ  မိဖါၥံၪအဆၧမုၬဆၧလၩဒဲ ၥၭအုၭၥၭလၩ့ကိၭမံၩ့နီၪ လ့ၩဘၪထဲးဘၪဎဲးလၧ ဖိၪၥၪအဖၫ့ခိၪ ထီးအလူၬနီၪလီၫႉ ထီးလကၭဒ့ၭဘၪႇ  ဖိၪၥၪလဂၩ ဆၧအီၪၥ့ၪအီၪဘၪအဂးမွဲဂ့ၩႇ ကယုၭယၪ့ မိဖါအဂးမွဲဂ့ၩႇ ဖူၬလူၬကူၬကအီၪအဂးမွဲဂ့ၩႇ ဆၧကိၪ့ဘၪကိၪ့ၥ့ၪ အဂးမွဲဂ့ၩႇ  ကၥ့ၪယၫ ကၠဲၭလူၬကၠဲၭထၫအဂးမွဲဂ့ၩ မွဲဝ့ၫဒၪ  မိဖါအတၩလၫ့ နီၪလီၫႉ

 အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မိဖါၥံၪကဘၪၥ့ၪယၪထၬ  အတၩလၫ့ အရ့ၩဎိၩထုၬ လၧခဲၫ့ကမံၩ့နီၪ ကဘၪ  ဒၩ့ဒိၭဆိၬ ဖိၪၥၪ ကၠဲၭလူၬကၠဲၭထၫနီၪလီၫႉ ဆၧအယီၩနီၪမွဲဝ့ၫဒၪ  မိဖါဖ့ၪလၫ့ အ့ၪ ဖိၪၥၪဆၧန့ၥၫနီၪလီၫႉ  ဖိၪၥၪၥ့ၪယၫ  ကၠဲၭလူၬကၠဲၭထၫဒဲ  အဆၧနဲၩအီၪလၧ  ကဆါကၠဲၭအဖၫ့ခိၪစွါဘဲၪႇ ဖိၪၥၪအဆၧၥၭမၧၫ့ ထၧၫ့ဘီၩ့ယၫအဂး ဆၧၥၭမဲၪၥၭဖျဲၩ့ၥံၪႇ ဆၧအၪ့ထၩၥံၪႇ ဆၧၥုၪ့အုၭၥၭအုၭၥံၪ ထီးအလူၬနီၪ  မၩနၧၩ့ခၪ့ဖျီၪကန့ဝ့ၫဒၪနီၪလီၫႉ  ဖိၪၥၪကန့ထၪ့ဘၪ  မိဖါ အဆၧအဲၪ ဆၧကွံၩအဂး  မိဖါၥံၪလဖၪ ကဘၪအီၪလၧ ဖိၪၥၪမုၬမုၬလၩလၩႇ ကဘၪအီၪအဘုၭထုၬလၧ  ဖိၪၥၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ  ဖိၪၥၪအဆၧမုၬဆၧလၩအဂး  မိဖါၥံၪကဘၪတဲၩ့မၩအ့ၪအခံၫ့  လိၪဝ့ၫဒၪနီၪလီၫႉ ဆၧလၧပကဲၪမိဖါၥံၪနီၪ ဆၧၥုၪ့ဆၧၩ့ၥၭဆၧၩ့  ကဘၪအီၪလၧ  ဖိၪၥၪအဖၫ့ခိၪနီၪလီၫႉ ပကယိလၧ ပထီအခံၫ့ယီၩစွါဘဲၫႇ မိဖါၥံၪနီၪ ဆၧဖၩ့ထၪ့ ဘၪလ့ၩမၩဆၧမၩ  ၡၪ့ၡၪ့ယၬယၬဂီၩ့ ဆၧခံၭမၬဂဲၫထဲၩ့ထီၩ့  ဆၧပွံၭအၥၭတၭ  အၪ့မ့ၩဂီၩ့မံၫမၪ ဝ့ၫဒၪနီၪလီၫႉ ဖိၪၥၪလဂၩအဂး အရ့ၩဎိၩထုၬ ဆၧအလိၫနီၪ မွဲဝ့ၫဒၪ မိဖါအဆၧအဲၪဆၧကွံၩနီၪအကၠီၩ့ႇ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭ