ပကဘၪအၪ့န့ထၪ့ ဆၧဒီၩ့ဆၧထ့ၬ လၧမိနးမၫရံၫ အၥၭဆၧၩ့အပၩရမံၫအဂဲး

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအၪ့န့ထၪ့ ဆၧဒီၩ့ဆၧထ့ၬ လၧမိနးမၫရံၫ အၥၭဆၧၩ့အပၩရမံၫ အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ၦလၧအလၧၫ့ထၪ့ဎွ့ၩထၪ့ လၧအခိးအတၩ နးမၫရံၫယၩနီၪ ဘဲၫၦမူၪနၩၥံၪဆ့ၬၥိၭ ကဆါယွၩ အၥုၪ့ဆၧၩ့ၥၭဆၧၩ့ လဖၪၥံၪနီၪ ဒၪဆၧၫ့ယၫဝ့ၫနီၪလီၫႉ မွဲဆၧနီၪ မိမၫရံၫနီၪ အီၪကိၩ့ဖျိၪ့ထၬအၥၭ လၧအဖိၪခွၫ ကဆါဎြံၬ အဆၧဖံၭဆၧမၩဒဲ အတၩလၫ့အကၠီၩ့ ဖ့ၪအ့ၪမိလဂၩ အၥုၪ့ဆၧၩ့ၥၭဆၧၩ့ န့ဝ့ၫဒၪနီၪလီၫႉ

လၧမုကနံၩယီၩ ယမိဒိၭဖျီၪထၪ့ ယဆၧအီၪဘူၭထံးလၧ ၦကဲၪမိလဖၪၥံၪနီၪလီၫႉ အရ့ၩဒိၪထုၬနီၪ ၦဘၪထိးၥုၪ့ၥၭ ဆၧဆၫလဖၪၥံၪ, ၦဘၪထိးအီၪပဲၩထၬလဖၪၥံၪ, ၦဘၪလၩ့ထီၫ့ဖၧၩ့လဖၪအမိၥံၪကၠၧၫ့ကၠၧၫ့ ယအီၪဘူၭထံးအကၠီၩ့ ယမိလီၩဘၪနီၪလီၫႉ လၧအဖိၪအလံၩအဂဲး ဘၪဒၪဆၧၡၪ့ဆၧနါ ဆၧကိၭမံၩ့ဒ့ၭ မိလဖၪၥံၪနီၪ မွဲကန့ထၪ့ဘၪ မိနးမၫရံၫဆၧမုၬၥၭဂဲးဘၭအကၠီၩ့ ၥၫ့ဎွၩဖရၫ့စ့ၭ လီၩဖျီၪထၪ့ထၬဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, မိလဖၪၥံၪနီၪ အဖိၪအလံၩ ဆၧလ့ၩထၪ့လ့ၩထီၪ ကအီၪအဂး ဖ့ၪလၫ့အ့ၪဝ့ၫ ဆၧဒီၩ့ဆၧထ့ၬ အဂ့ၩအဘွၩဂီၩ့ ၥီၪ့ၥၫ့အ့ၪဝ့ၫနီၪလီၫႉ မိလဖၪၥံၪနီၪ အဖိၪအလံၩအဂး ဆၧအဲၪဆၧကွံၩ ဎိၩဒိၪဒဲ ဆၧၡၪ့ဆၧနါဖၧၩ့ ဖ့ၪဆၧၫ့လၩ့အၥၭနီၪလီၫႉ ခံၫ့ခၫဆၧထီဘဲၫယီၩ ဆၧတတုၬတနၭဒဲ ထံၫဂဲးခးဂဲးလမုၬဘၪၥံၪအဖၧၩ့ မိလဖၪၥံၪ လကၭဒံၭဘၪ ၦၡၩအၪဒၪဆၧနီၪ ဘၪဒၪခီၩ့ဆၧၫ့ယၫ ဆၧၡၪ့ဆၧနါ အၪမၬဒ့ၭနီၪလီၫႉ

အရ့ၩဒိၪထုၬနီၪ လၧထံၫခး ခးပယၩ့ဖၧၩ့ ၦမၩန့ဆီၪ့ ဆၧစီၩ့ဆၧမၩ့ဒဲ ၦမၩဘၪထံၭဘၪနဲၪ ထံၫခးဖိၪၥံၪ လၧၦၡၩၥံၪယီၩ အဆၧမၩဖၧၩ့ ထံၫဖိၪခးဆါလဖၪနီၪ ဘၪဒၪခီၩ့ဆၧၫ့ယၫ ဆၧကၪဆၧဂဲၩ, ဆၧၡၪ့ဆၧနါ ကိၭမံၩ့ဒ့ၭနီၪလီၫႉ မွဲဆၧနီၪ ၦၡၩလဂၩဘၪလဂၩ ဆၧယၫ့ၥုၪ့ယၫ့ၥၭအီၪဂီၩ့ ဆၧၥၭဆၧၩ့အပၩရါမံၫလဖၪ ပကအၪ့န့ထၪ့ ဆၧဒီၩ့ဆၧထ့ၬ လၧမိနးမၫရံၫအီၪတၭ လၧပထံၫခး ခးပယၩ့ဖၧၩ့ ဆၧဎူၪဆၧဎၩ့ ကန့ထၪ့ဖျဲၪဖျဲၪအဂး ပကအၪ့က့ၩအၪ့ယၫထၪ့ မိနးမၫရံၫအဆၧအၪ့က့ၩဘၩဆိၪဖၪအ့ၪပၧၩလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪအၪ့န့ထၪ့ ဆၧဒီၩ့ဆၧထ့ၬ လၧမိနးမၫရံၫအီၪ န့ဝ့ၫဒၪ ကိၭဒံၭကိၭဂၩလါဆံၭႉ