မၩဘိၪ့မၩထးဆၧအဂဲး

အဲၪကွံၩဘၪထၧၫ့ဖု၀ဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲ၀့ၫဒၪ မၩဘိၪ့မၩထးဆၧအဂဲးအကၠီၩ့နီၪလီၫႉ ပကဘၪအၪ့က့ၩဘၩဆိၪဖၪဆၧ ဘဲၫယီၩၥိၭအဂဲး ၥၫ့ဎွၩဖရၫ့စ့ၭ ဖ့ၪကိၪ့ဖ့ၪကဲၩထၬပၧၩ အီၪ၀့ၫဘဲၫယီၩၥိၭနီၪလီၫႉ “ဖါကဆါယွၩဧ့, ဘဲၫနဆၧယိထွ့ၫ မၩဆၧၩ့ယၧၩလၧ ဆၧယၫ့ၥုၪ့ယၫ့ၥၭယၧၩအီၪၥိၭ ယၧၩနးဆ့ အ့ၪယအီၪက့ၪထၬ ယၥုၪ့ယၥၭ ဘဲၫယီၩၥိၭစွါဘဲၫ ၦၡၩၥံၪထီးအလူၬအဖၫ့ခိၪ ယအီၪက့ၪထၬ ဆၧယၪ့ၥုၪ့ယၪ့ၥၭ ကန့၀့ၫဒၪနီၪလီၫႉ”

ၦလၧဘၪဒၪခီၩ့ဆၧၫ့ယၫ ဆၧကၪဆၧဂဲၩဒဲ ၦအလိၪဆၧမၩဆၧၩ့လဖၪၥံၪနီၪ ပကဘၪဖ့ၪအ့ၪ ဆၧမၩဆၧၩ့ တၡါဒ့ၭနီၪလီၫႉ ၥၫ့ဎွၩဖရၫ့စ့ၭ အၪ့စၪ့ၦလၧ ဂဲၫချဲၩ့နးၥၭအဂဲးလၧ အ၀့ၫအီၪလနၩ့နၩ့ ဘဲၫယီၩၥိၭနီၪလီၫႉ “နၥံၪမၩဘိၪ့မၩထးဆၧအီၪဧၪ?” “နၥံၪနုၬလၩ့ယိလၧ နၥံၪမၩဘိၪ့မၩထးၦၡၩၥံၪအၥၭဖၧၩ့ဧၪ?” “နၥံၪယိအ၀့ၫၥံၪ အမ့ၬဧၪ?” အ့ၪနၥံၪနုၬလၩ့ယိလၧ အ၀့ၫၥံၪအၥၭဖၧၩ့အ့ၬ, နၥံၪယိအ၀့ၫၥံၪ အမ့ၬအ့ၬစွါဘဲၫ နၥံၪအဆၧမၩဘိၪ့လဖၪၥံၪနီၪ လမွဲဘၪ အ၀့ၫၥံၪအဂးဒဲ မွဲ၀့ၫဒၪ နၥံၪကထုၭဖျီၪထၪ့လၩ့အၥၭနီၪလီၫႉ အ့ၪပကအၪ့ဎၬယိထံၪထံၪဆၭဆၭစွါဘဲၫ လၧၦမၩဘိၪ့မၩထးၦၡၩၥံၪဖၧၩ့ ပကဘၪနုၬလၩ့ယိလၧ အ၀့ၫၥံၪအၥၭခံဖၧၩ့ တၡါဒ့ၭနီၪလီၫႉ မွဲဆၧနီၪ, ယဆၪ့ထွ့ၫဘၪနၥံၪ ပကဘၪအီၪက့ၪထၬ ၦဆၧယၫ့ၥုၪ့ယၫ့ၥၭဒဲ ဆၧမၩဆၧၩ့လၧ ၦအလိၪၥံၪအီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪ၀့ၫဒၪ ဘဲၫယီၩၥိၭနီၪလီၫႉ အဲၪကွံၩဘၪ ထၧၫ့ဖု၀ဲထံၩၥိၭထီးအလူၬ မွဲနၥံၪလၧၫ့ဎွ့ၩ၀့ၫဒၪလၧ ကဆါယွၩ အဆၧဆိၪဂ့ၩဆိၪဘွၩလါဆံၭႉ