ၦကဲၪခိၪနါနီၪ က ဘၪမွဲဝ့ၫ ၦထီးအလူၬအခ့ၫအၡၩအဂဲး

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးလူၬၥံၪဧႉႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪ မွဲဝ့ၫဒၪ ၦလၧကဲၪခိၪနါနီၪ ကဘၪမွဲဝ့ၫ ၦထီးအလူၬအခ့ၫအၡၩ အဂဲး အကၠီၩ့နီၪလီၫႉ လၧလံၬဆံၫ့ဎံၪဖၧၩ့ ကဆါဎြံၬ အစီၩ့ဒိၪမၩ့ဒိၪ နီၪ မွဲအီၪလၧ ၦဂူၫဂၩၥံၪ ထီးလူၬအဖၫ့ခိၪဂီၩ့ န့ ဘၪအစီၩ့ဒိၪမၩ့ဒိၪမွဲအ့ၬႉ ၦၡၩၥံၪထီးအလူၬအဂး ဆၪ့လၩ့ဘၧၩ့ထၬအၥၭ ႇ ဆၧဆၪ့လၩ့ၥုၪ့ဆၪ့လၩ့ၥၭ အီၪဝ့ၫဒၪ အကၠီၩ့ အစီၩ့အမၩ့ဎိၩဒိၪ မွဲဝ့ၫဒၪနီၪ လီၫႉ ကဆါဎြံၬနီၪ ၦၡၩၥံၪအဂး ဆၪ့လၩ့ဘၧၩ့ထၬအၥၭ ဘဲၫၥ့ၪလဲၪစွါ ဘဲၫ ၦၡၩၥံၪ ကန့ဘၪ ဆၧထိးထဲၩ့တၩ့ထဲၩ့ အဂး ထိးၥံၫခွံၬဝ့ၫဒၪအၥၭနီၪလီၫႉ လူထၪ့လၩ့အၥၭထၧၫ့ဖျိၪ့ယၫဂီၩ့ ထိးထဲၩ့ တၩ့ထဲၩ့ ၦၡၩနီၪလီၫႉ မွဲဆၧနီၪႇ ကဆါဎြံၬအစီၩ့အမၩ့ ႇ ယွၩအစီၩ့အမၩ့နီၪ မွဲဝ့ၫဒၪ ဆၧအဲၪဂီၩ့ အဝ့ၫ အဆၧအဲၪနီၪ မွဲကအၪ့မၧၫ့ ၦၡၩၥံၪအဂးအ့ၬ ႉ မွဲအဂဲၫဒိၭန့ ဆၧအၪ့မၧၫ့နီၪလီၫႉ

          အ့ၪပကယိလၧ လံၬဆံၫ့ဎံၪ (မၫကၧၭ  ၁၀:၃၅-၄၅)  ဖၧၩ့စွါ ဘဲၫ ကဆါဎြံၬအထံၩအဖျဲၥံၪနီၪ အဲၪဒိၭ  အဝ့ၫၥံၪ အဆၧလ့ၩထၪ့လ့ၩထီၫ ကအီၪအဂးဂီၩ့ ကဆါဎြံၬနီၪ ဆၪ့လၩ့ဘၧၩ့ထၬအၥၭ အဂဲး ပကဖီဘၪနီၪလီၫႉ ၦၡၩၥံၪ အဆၧလ့ၩထၪ့လ့ၩထီၫ ကအီၪအဂး လၧၦၡၩလဂၩဘၪလဂၩ အဆၧဆုးကျိၭလိၬၥၭဖၧၩ့မွဲဂ့ၩ ႇ အဆၧ  ထိစိၩ ကလၧၫ့ဎွ့ၩအဂးဖၧၩ့မွဲဂ့ၩ ႇ ကထီၩ့ဝ့ၫလၧ ဆၧအရ့ၩ ဒိၪအလးဖၧၩ့အဂး ႇ ဆၧအလးအထီၫထုၬအလးဖၧၩ့ အဂး မွဲဂ့ၩ ကျ့ၭစၨၭကၠၭဝ့ၫဒၪနီၪလီၫႉ ၦလၧ အအဲၪဒိၭ ဆၧအစီၩ့အမၩ့ဎိၩဒိၪလဖၪၥံၪယီၩနီၪ အဝ့ၫၥံၪ ဆၧလ့ၩထၪ့ လ့ၩထီၫအဂး အဆၧထိစိၩနီၪ မွဲဆၧထိစိၩအဂ့ၩအဘၪလါနၫ့  ကဲၪထၪ့ဝ့ၫန့ ၥၭ အဆၧဆၫလမံၩ့နီၪလီၫႉ ဆၧဂဲၩဝၭ လဖၪၥံၪယီၩနီၪ ကဲၪၥ့ၪဝ့ၫဒၪ ၦၡၩၥံၪ အၥၭ အဆၧဘၪၥၭ ကအီၪလၧပအီၪအဂးႇ ပကထီၩ့လၧ ၦဂူၫဂၩၥံၪ အမ့ၬ ယၫ အဂး ပဆၧကျ့ၭစၨၭမွဲကဲၪၥ့ၪဝ့ၫဒၪနီၪလီၫႉ ပဝ့ၫ ပဆူနဲၩဎြံၬဖိၪလဖၪၥံၪဆ့ ပခိးဂဲးခိးဘၭဆၧ ဘဲၫယီၩၥိၭ အီၪဝ့ၫဎွ့ကၠၪဎွ့ ဘျၩ့ယူၭလဲၪ ႉ လၧပဆၧဖံၭဆၧမၩလဖၪၥံၪအဖၫ့ခိၪ ပလူထၪ့လၩ့ပၥၭ တၡါဂီၩ့ ပဖီၪ့ထၪ့ဖံၭထၪ့ ပဆၧဖံၭဆၧမၩဧၪႉ ပလီၩ့ဎွါ ပၥၭ အဆၧဘၪအၥၭ လၧ ပဆၧဖံၭဆၧမၩ အဖၫ့ခိၪ ၦၡၩၥံၪ ဆၧအၪ့အူၭပၧၩ ကအီၪ အဂးဧၪ နီၪ ပကဘၪအၪ့စၪ့လၩ့ပၥၭလိၪဝ့ၫဒၪနီၪလီၫႉ ပဝ့ၫၦဎြံၬဖိၪၥံၪယီၩ ပကဘၪယိကဆါဎြံၬ နဲၪဖျီၪထၪ့ထၬ အ့ၪပၧၩ ဘဲၫၥ့ၪလဲၪအဂဲးနီၪလီၫႉ ၦၡၩၥံၪ ထီးအလူၬအဖၫ့ခိၪ ကဆါဎြံၬအီၪက့ၪထၬအၥၭလၧ ဆၧထၪ့ထီၫ အလး ဖၧၩ့မွဲအ့ၬ ႉ အီၪက့ၪထၬအၥၭလၧ ၦဂူၫဂၩၥံၪ ကအၪ့မၧၫ့အဂးနီၪလီၫႉ ထီမုဆၫကနံၩယီၩ ၦၡၩၥံၪ ဘၪဒၪခီၩ့ဆၧၫ့ ယၫ ဆၧအၪ့ဆၧအီၩလလၧၫ့ဎွ့ၩဘၪ ႇ ဆၧကၪဆၧဂဲၩၥံၪ အီၪဝ့ၫဒၪအၪမၬဖၧၩ့ ကမၩဆၧၩ့ ၦအလိၪၥံၪယီၩ အဂး လူထၪ့လၩ့ထၬအၥၭနီၪလီၫႉ

          ထၧၫ့ဖုဝဲထံၩၥိၭၥံၪဧ့ႇ ဘဲၫကဆါဎြံၬၥိၭ ပကဘၪ ဆၪ့လၩ့ဘၧၩ့ထၬပၥၭ ဘဲၫၥ့ၪလဲၪစွါ ဘဲၫ လၧပမ့ၬၥၪဖၧၩ့ ပဒၪ ၦအလိၪလဖၪ ပကဘၪအီၪက့ၪထၬ ပဆၧယၫ့ၥုၪ့ယၫ့ၥၭနီၪလီၫႉ ဆၧအၪ့လလၧၫ့ဎွ့ၩဘၪ ၦၡၩၥံၪ အီၪဝ့ၫဒၪ အၪမၬဒ့ၭအကၠီၩ့ ပကဘၪ အီၪက့ၪထၬပဆၧယၫ့ၥုၪ့ယၫ့ၥၭလၧ အဝ့ၫၥံၪအဖၫ့ခိၪဂီၩ့ ပကဘၪဖ့ၪအ့ၪ ဆၧမၩဆၧၩ့ လၧ အဝ့ၫၥံၪအဆၧလိၪနီၪလီၫႉ အ့ၪပအီၪက့ၪထၬ ပၥၭလၧ ဆၧယၫ့ၥုၪ့ယၫ့ၥၭဖၧၩ့စွါ ဘဲၫ ပကန့ထၪ့ဘၪ ဆၧယၫ့ၥုၪ့ယၫ့ၥၭဆ့နီၪလီၫႉ ကဆါဎြံၬနီၪမွဲ ဝ့ၫဆၧအဲၪဂီၩ့ ဆၧအဲၪနီၪ ကဲၪထၪ့ ဆၧဆၪ့လၩ့ၥုၪ့ဆၪ့လၩ့ၥၭလီၫႉ အီၪက့ၪထၪ့ထီၫလၩ့အၥၭအ့ၬႉ ဘဲၫမူၭခိၪဖီၫ လၩ့ဎွံၪလၧ ဂၪ့ခိၪဖံၬဖၫ့ခိၪဂီၩ့ မၩမၧၫ့ထၪ့ ဆၧမုဆၧဘီၩ့ၥံၪၥိၭ ကဆါ ဎြံၬနီၪ အီၪဂဲၫလၩ့ လၧ ထၭဂီၩ့ ဂဲၫမၩမၧၫ့ထၪ့ထဲၩ့ ဂၪ့ခိၪဖိၪၥံၪ အဆၧၥၭမၧၫ့နီၪလီၫႉ ၦအဖိၬကဆါဎြံၬအခဲၫ့ ၦဝ့ၫ လဖၪၥံၪဆ့ ပကဘၪဆၪ့လၩ့ဘၧၩ့ထၬပၥၭဘဲၫကဆါဎြံၬၥိၭ လၧ ၦအလိၪအီၪလဖၪ ကန့ထၪ့ထဲၩ့ ဆၧမၩဆၧၩ့ အဂးနီၪလီၫႉ ဆၧဖံၭဆၧမၩယီၩကၪလါနၫ့ ပမၩကဲၪၥ့ၪအ့ၬ လအီၪဘၪနီၪလီၫႉ ပမၩကဲၪထၪ့ ဘဲၫယီၩၥိၭကန့အဂး ပကအၪ့န့ဆၧမၩဆၧၩ့လၧ ယွၩအမိ မိမၫရံၫအီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪဝ့ၫ ဘဲၫယီၩၥိၭ  အဂဲး ယရၩလၩ့ ဖ့ၪၥ့ၪယၫအ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ