ပကန့ဘၪ ဆၧမၧၫ့အဆိၩအကၠၪအဂး ပကဘၪမၩမနီၪလဲၪ

 ထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪနီၪမွဲဝ့ၫဒၪ ပကန့ ဘၪဆၧမၧၫ့အဆိၩအကၠၪအဂး ပက ဘၪမၩမနီၪ လဲၪ အဂဲးအကၠီၩ့နီၪလီၫႉ လၧလံၬဆံၫ့ဎံၪ စမၫကၧၭ (၁၀:၁၇)  ဖၧၩ့ ၦကဲၪဒိၪဖိၪလဂၩ အၪ့စၪ့ ဘၪ ကဆါဎြံၬ  ဘဲၫၥိၭယမိန့ဘၪ ဆၧမၧၫ့အဆိၩအကၠၪအဂး မွဲယမိ ဘၪမၩဆၧနီၪလမံၩ့လဲၪ နီၪလီၫႉ ကဆါဎြံၬစံၭထဲၩ့ ဘၪအဝ့ၫ နကန့ထၪ့ ဘၪ ဆၧၥၭမၧၫ့အဆိၩအကၠၪအဂးနီၪ နက ဘၪ လီၩ့မၩဖိၬ ထွ့ၪ ယွၩအဆၧမၪလူၬလဖၪအကၠီၩ့ အနီၪလကၭဒံၭ ဘၪ လၧ နဆၧအီၪလဖၪနီၪ လ့ၩအၪ့ဆၫလၩ့ ခွံၬတၭ ဖ့ၪလၫ့ၦအၡၪ့ဖိၪယၬဖိၪလါဆံၭႉ အ့ၪနမၩ ဘဲၫယီၩၥိၭစွါ ဘဲၫ နမိအီၪ ဘၪလၧ နစူၪလးနခၪ့ ခိၪလၧ မူၭခိၪအဖၧၩ့လီၫႉ ၦကဲၪဒိၪဖိၪလဂၩ နါဂၧၫ့ ဘၪ ကဆါဎြံၬ အဆၧချဲၩ့ ဘဲၫယီၩၥိၭကကၠၪ အမ့ၬလၩ့ၡါဂီၩ့ အၥုၪ့အုၭအၥၭအုၭကဲၪထၪ့ ဂီၩ့ ထဲၩ့ထဲၩ့ဝ့ၫဒၪနီၪလီၫႉ ဘၪမနီၪလဲၪစွါ ဘဲၫ ၦကဲၪဒိၪ ဖိၪယီၩ အစူၪလးအခၪ့ခိၪ အီၪဝ့ၫဒၪအၪမၬဒ့ၭ အကၠီၩ့နီၪလီၫႉ

          ထၧၫ့ဖုဝဲထံၩၥိၭၥံၪဧ့ႇ လၧၦကဲၪဒိၪဖိၪအလးယီၩ ပအီၪက့ၪထၬလၩ့ပၥၭ န့ဝ့ၫဒၪ ကိၭဂၩဒ့ၭနီၪ လီၫႉ ပက ဘၪယိလၩ့ထဲၩ့ ၦဆၧဆူနဲၩ မွဲဝ့ၫဒၪလီၫႉ အ့ၪပကယိထဲၩ့ ၦကဲၪဒိၪဖိၪလဂၩ အဆၧအၪ့ စၪ့ယီၩစွါ ဘဲၫ အဝ့ၫကန့ ဘၪ ဆၧၥၭမၧၫ့ အဆိၩအကၠၪအဂး က ဘၪမၩမနီၪလဲၪ ႉ က ဘၪမၩ မနီၪလဲၪအဂး အတၩလၫ့ အီၪလဲၪ ႉ ဆၧၥၭမၧၫ့ အဆိၩအကၠၪယီၩ အဝ့ၫကန့ ဘၪအဂး အဲၪဒိၭမၩ လၧၫ့ဎွ့ၩထၪ့ အတၩလၫ့နီၪလီၫ ႉ ဆၧလၧ ဆၧဆူနဲၩနီၪ ပထိၪတွၭလၧ ပတၩလၫ့န့အ့ၬနီၪလီၫႉ ပအီၪ က့ၪထၬ ပဆၧဆူနဲၩလၧယွၩအီၪနီၪ ပကဘၪမၩလၧၫ့ဎွ့ၩထၪ့ ပတၩလၫ့မုၩဒၩ လၧယွၩအဆၧမၪလူၬ လဖၪၥံၪအဖၫ့ခိၪလီၫမွဲအ့ၬ ႉ ပဆၧဆူနဲၩနီၪ ကဘၪအီၪပျီၩပျီၩဖျ့ၭဖျ့ၭ ႇ ကဘၪအီၪၥုၪ့လၩ့ထၬအၥၭ လၧ ဆၧအဲၪဖၧၩ့နီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪနီၪလီၫႉ ဘၪမနီၪလဲၪစွါဘဲၫ ကဆါယွၩထိးထဲၩ့တၩ့ထဲၩ့ထၬပၧၩလၧ ဆၧၥံၫဒိၪပကဖီၩ့ဖျ့ၭအဂးနီၪ မွဲဝ့ၫဒၪအဝ့ၫဖ့ၪလၫ့ ပၧၩ အဆၧအဲၪ အဆၧဖ့ၪလၫ့မွဲဝ့ၫဒၪအကၠီၩ့နီၪလီၫႉ ကဆါယွၩဖ့ၪပျီၩပၧၩ နီၪလီၫႉ ပကဲၪဒိၪကဲၪမု ပကျိၪစ့ၩ အီၪဝ့ၫအၪမၬလါနၫ့ ပအၪ့ဎွ့ၩကဆါ အဆၧဖ့ၪလၫ့ယီၩ လၧ ကျိၪစ့ၩလန့ဘၪနီၪလီၫႉ

          ထၧၫ့ဖုဝဲထံၩၥိၭၥံၪဧႉႇ လၧလံၬဆံၫ့ဎံၪဖၧၩ့ ၦကဲၪဒိၪဖိၪလဂၩ အဆၧအၪ့စၪ့ယီၩ အဖၫ့ခိၪ ကဆါဎြံၬ အဆၧယၫ့ၥၭ ႇ အဆၧအဲၪ လၩ့ဝ့ၫဒၪလၧ ၦကဲၪဒိၪဖိၪယီၩအဖၫ့ခိၪတၭ ယိစဲၪဘၪ ၦကဲၪဒိၪဖိၪယီၩလၧ ဆၧအဲၪအဆၧယိနီၪလီၫႉ ကဆါဎြံၬအဆၧယိယီၩ မွဲဝ့ၫ ဆၧဆူနဲၩဂုထၪ့ မၧၫ့ထၪ့အလးမွဲဝ့ၫဒၪနီၪလီၫႉ ကဆါဎြံၬယိစဲၪ ၦကဲၪဒိၪဖိၪယီၩနီၪ မွဲအဝ့ၫ အစူၪလးခၪ့ခိၪ အီၪဝ့ၫဒၪ အၪမၬဒ့ၭအကၠီၩ့မွဲအ့ၬႉ မွဲအဝ့ၫလီၩ့မၩဖိၬထွ့ၪ ကဆါယွၩ အဆၧမၪလူၬန့ဝ့ၫအကၠီၩ့ မွဲဧၪအ့ၬႉ လၧကဆါဎြံၬအဆၧအဲၪ ပျီၩပျီၩဖျ့ၭဖျ့ၭဖၧၩ့ အကၠီၩ့ ယိစဲၪဘၪအဝ့ၫလၧ ဆၧအဲၪအဆၧယိ ဖၧၩ့နီၪလီၫႉ မွဲဆၧနီၪ ပကန့ဘၪကဆါဎြံၬအဆၧအဲၪအဂး ပကလ့ၩဘိၪ့ထၪ့ဘၩထၪ့ ကဆါဎြံၬလၧ ဎြံၬကဆါအီၪ ကိၪဘိၪ့ဆံၫ့ဎံၪ အမ့ၬယၫႇ ပကအီၪက့ၪလၩ့ပၥၭလၧ ဆၧကွဲၪဖျါဆၧမၪအလး ဆၧလီၩလၩ့ဆၧဒဲၩဘၭ စကရမ့ၫတူၩဖၧၩ့ ႇ ပကဆၧၫ့ထုၪ့လၧ စူၪယၫထုၪ့ အမ့ၬယၫဂီၩ့ ပကအၪ့န့ ထၪ့ ကဆါဎြံၬအဆၧအဲၪ အဆၧယိစဲၪ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧဆၪ့ထွ့ၪ အီၪဝ့ၫဒၪ နီၪလီၫႉ

          လခဲၫ့အထုၬ ကဆါဎြံၬစံၭဘၪ ၦကဲၪဒိၪဖိၪ နန့ဘၪ ဆၧအလးနီၪ ႇ အီၪဒံၭလမံၩ့ဒံၭႉ နဆၧအီၪလဖၪနီၪ လ့ၩအၪ့ဆၫခွံၬတၭ ဖ့ၪလၫ့ၦၡၪ့ဖိၪယၬဖိၪဆံၭႉ ဆၧမၩယီၩ ၦၡၩၥံၪ ၥၭနၪ့မၩဝ့ၫဒၪ အၪမၬဒ့ၭနီၪလီၫႉ ၦၡၩၥံၪနီၪ လၧ အဝ့ၫၥံၪ အစူၪလးခၪ့ခိၪအီၪအဖၫ့ခိၪ ဖ့ၪလၫ့အ့ၪၦၡၩ ဆၧမၩဆၧၩ့ အီၪဝ့ၫဒၪ ကဆံၭကခ့ၭလီၫဂီၩ့ ကဆါယွၩနီၪ အဲၪဒိၭ ၦၡၩၥံၪ အဆၧဖ့ၪလၫ့မၩဆၧၩ့လိၬၥၭ ကအီၪ အၪအၪဂီဂီနီၪလီၫႉ ပကဘၪအၪ့စၪ့လၩ့ပၥၭ ၦအဖ့ၪအ့ၪပၧၩ ဆၧၥၭမၧၫ့ ကဆါယွၩအဖၫ့ခိၪ ပဖ့ၪဆၧၫ့ထဲၩ့အ့ၪ မနီၪလဲၪ အီၪလဲၪ ႉ ပအီၪက့ၪထၬပဆၧမံၫ့ၥုၪ့မံၫ့ၥၭလၧ မုထၧၫ့နံၩယၫဖၧၩ့ ပဆၧဘၩဆိၪဖၪ အခံၫ့ကဆံၭကခ့ၭဖိၪနီၪဧၪႉ

          ထၧၫ့ဖုဝဲထံၩၥိၭၥံၪဧႉ ႇ ပစံၭလၩ့ပၥၭ ပဝ့ၫၥံၪနီၪ ဆၧဆူနဲၩဖိၪဂီၩ့ ပဖ့ၪအ့ၪၦဂူၫဂၩၥံၪ ဆၧနးမံၩ့အ့ၬစွါဘဲၫ ပဆၧဆူနဲၩနီၪ လလၧၫ့ဎွ့ၩဘၪနီၪလီၫႉ ပဘိၪ့ထၪ့ဘၩထၪ့ ကဆါယွၩနီၪ ပကဘၪဘိၪ့ထၪ့ဘၩထၪ့ ပတၩလၫ့အီၪအကၠီၩ့နီၪ ပမၩလၧၫ့ဎွ့ၩထၪ့ ပမုၩဒၩဧၪႉ ပအဲၪကဆါယွၩ အကၠီၩ့ ပဘိၪ့ထၪ့ဘၩထၪ့ဧၪ နီၪ ပကဘၪအၪ့စၪ့လၩ့ပၥၭနီၪလီၫႉ လၧကဆါယွၩ အဆၧအၪ့မၧၫ့လၩ့ ထီးအလူၬအဖၫ့ခိၪ မိမၫရံၫ စံၭဆၧၫ့ထဲၩ့ဝ့ၫဒၪ  မွဲ ကဖျိၪ့လီၫ နီၪလီၫႉ မွဲ ဆၧချဲၩ့ အလးခဲၫ့နီၪ လါနၫ့ ဆၧချဲၩ့ဖျိၪ့ လပၫဘၪနီၪလီၫႉ ဘဲၫပစံၭ ဆၧချဲၩ့ဖျိၪ့ မွဲ ယီၩကန့ဝ့ၫဘဲၫ မိမၫရံၫအဂး ပကအၪ့ကံၩ့ ဆၧမၩဆၧၩ့လၧ ယွၩအမိ မိမၫရံၫအီၪ လါဆံၭႉ