ဆၧဆၪ့လၩ့ၥုၪ့ဆၪ့လၩ့ၥၭနီၪ ၥိၪ့ၦၡၩၥံၪလၧ မူၭခိၪ ဘၩ့မုးအဂဲး

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉ ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အဆၧရၩလၩ့ဖၧၩ့ မုကနံၩ ယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ဆၧဆၪ့လၩ့ၥုၪ့ဆၪ့လၩ့ၥၭနီၪ ၥိၪ့ၦၡၩလၧ မူၭခိၪ ဘၩ့မုး အဂဲး အကၠီၩ့နီၪလီၫႉ အ့ၪပကယိထဲၩ့လၧ လံၬဆံၫ့ဎံၪ လုကၭ (၁:၄၇-၄၈)  ဖၧၩ့ စွါဘဲၫ ကဆါဎြံၬအမိ မိမၫရံၫ စံၭထၪ့အၪ့ အူၭအီၪဝ့ၫဒၪ “ တၭယၥုၪ့ထိၬၥၭထိၬလၧယွၩ ႇ ယဆၧထိးထဲၩ့တၩ့ထဲၩ့ အဖၧၩ့လီၫႉ အဂဲး ဘဲၫယီၩ မွဲအယိထဲၩ့ယူၭ အခ့ၫအၡၩမုၪ အဆၧၡၪ့ယူၭႉ အဂဲး ဘဲၫယီၩ ႇ ယိခွါ ႇ ထီးယီၩစူၩယၫခိၬ ႇ ကယဲၦအဆိၩဆိၩအကၠၪကၠၪ မိကိၭယၧၩ လၧ  ၦ ဘၪဆၧဆိၪဂ့ၩလီၫႉ ”

            ထၧၫ့ဖုဝဲထံၩၥိၭၥံၪဧႉ ႇ လၧကဆါဎြံၬအမိ မိမၫရံၫအီၪ ကဆါယွၩအဆၧဘၪအၥၭအီၪဝ့ၫဒၪနီၪ မွဲဝ့ၫဒၪ  ဆၧဆၪ့လၩ့ၥုၪ့ဆၪ့လၩ့ၥၭနီၪလီၫႉ မိမၫရံၫအဆၧဆၪ့လၩ့ၥုၪ့ဆၪ့လၩ့ၥၭနီၪ မၩဂဲၩဝၭထၪ့ ယွၩအၥုၪ့အၥၭ ယွၩ အဆၧဘၪအၥၭ အဂးနီၪလီၫႉ  ဂၪ့ခိၪၦၡၩၥံၪ အဆၧဘၪအၥၭနီၪ မွဲဝ့ၫဒၪ ဆၧလၧၫ့ဆၧဎွ့ၩ ႇ ဆၧထူၭဆၧလၧၫ့ႇ ဆၧအဂ့ၩ ႇ ဆၧအဒိၪအမုၥံၪနီၪလီၫႉ ယွၩနီၪ အီက့ၪထၬဆၧအရ့ၩဒိၪလၧ ဆၧလဖၪၥံၪယီၩအဖၫ့ခိၪမွဲအ့ၬ ႉ ယိၦၡၩ အီၪက့ၪထၬၥုၪ့ၥၭ ဆၧဆၪ့လၩ့ၥုၪ့ဆၪ့လၩ့ၥၭ အီၪဝ့ၫ ဘဲၫၥ့ၪလဲၪအဂဲးနီၪလီၫႉ ၥုၪ့ၥၭလၧ ဆၧဆၪ့လၩ့ၥုၪ့ဆၪ့လၩ့ၥၭအီၪ နီၪ ကၠူၭကဆါယွၩလၧ အဝ့ၫၥံၪအီၪ န့ဝ့ၫဒၪနီၪလီၫႉ အ့ၪပယိထဲၩ့ မိမၫရံၫ အဂဲးအဖးယီၩစွါ ဘဲၫ ပစံၭထၪ့န့ဝ့ၫဒၪ ဆၧဆၪ့လၩ့ၥုၪ့ဆၪ့လၩ့ၥၭနီၪ ပကထီၩ့ မူၭခိၪ ဘၩ့မုးအဂး ဖၧၩ့ၥၭလ ဘီၩ့မွဲဝ့ၫအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪဝ့ၫဒၪဘဲၫယီၩၥိၭနီၪလီၫႉ လၧလံၬဆံၫ့ဎံၪ စလုကၭ (၁၄:၁၁ )  ဖၧၩ့နးဆ့ ကဆါဎြံၬ အဆၧချဲၩ့ အီၪဝ့ၫဒၪ “ ၦလၧ အဆၪ့လၩ့ဒၪအၥၭနီၪ မိ ဘၪဆၧအီၪက့ၪထၪ့ထီၫဝ့ၫလီၫႉ”

            ထၧၫ့ဖုဝဲထံၩၥိၭၥံၪဧ့ႇ ပကဲၪဒိၪကဲၪမုအကၠီၩ့ ကဆါဎြံၬအီၪက့ၪထၪ့ထီၫပၧၩအ့ၬႉ ပဆၧၥ့ၪယၫနၪၥ့ၪအီၪ အမံၩ့အစံၩ့အကၠီၩ့ ႇ ပမၩဆၧၥ့ၪကိၭမံၩ့ဒ့ၭအကၠီၩ့ ႇ ပထံၩၥိၭၥံၪအီၪ အၪအၪဂီဂီအကၠီၩ့ ႇ ၦန့ထၪ့ ဘၪ ဆၧအဲၪအဆၧ နဲၪ အီၪအၪမၬဒ့ၭအကၠီၩ့ ကဆါယွၩ အီၪက့ၪထၪ့ထီၫပၧၩမွဲအ့ၬ ႉ လါနၫ့ အ့ၪပအီၪက့ၪထၬ ပၥၭ ဆၧဆၪ့လၩ့ၥုၪ့ဆၪ့ လၩ့ၥၭအီၪစွါ ဘဲၫ ပက ဘၪထိး ဆၧအီၪက့ၪထၪ့ထီၫလၧ ယွၩအစူၪနီၪလီၫႉ ကဆါယွၩနီၪအဲၪ ဆၧဆၪ့လၩ့ၥုၪ့ ဆၪ့လၩ့ၥၭ ႇ ၦအဖ့ၪလၫ့လၩ့အၥၭလၧ ၦၡၩၥံၪအဂး လဖၪၥံၪ အဖၫ့ခိၪနီၪလီၫႉ ဖီၩ့ဖျ့ၭလၧ ဆၧဆၪ့လၩ့ၥုၪ့ဆၪ့လၩ့ၥၭ ဒဲ ဆၧဖ့ၪလၫ့လၩ့အၥၭနီၪ မိမၫရံၫအီၪ အဂူၫဂၩ ဆၧလအီၪ ဘၪနီၪလီၫႉ

            ထၧၫ့ဖုဝဲထံၩၥိၭၥံၪဧ့ႇ ပဝ့ၫၥံၪကိၭဂၩနးဆ့ ပကအၪ့စၪ့လၩ့ထဲၩ့ပၥၭ ပဖီၪ့ထၪ့ဖံၭထၪ့ ပဆၧဖံၭဆၧမၩၥံၪ အဖၫ့ခိၪ ပအီၪက့ၪထၬ ဆၧဆၪ့လၩ့ၥုၪ့ဆၪ့လၩ့ၥၭဧၪ ႉ ၦၡၩၥံၪ အဆၧ ဘၪၥၭ ကအီၪအဂး ပမၩဧၪႇ ၦၡၩၥံၪ ကအၪ့အူၭပၧၩအဂး ပမၩပဆၧမၩၥံၪဧၪ ႇ ပမံၩ့ကဎိၩအဂးဧၪ ႇ ပက ဘၪအၪ့စၪ့လၩ့ထဲၩ့ပၥၭနီၪလီၫႉ မိမၫရံၫ အဆၧဒီၪနါခိၭနၪလၧ ယွၩ အဆၧချဲၩ့အဖၫ့ခိၪ အီၪဝ့ၫ ဘဲၫၥ့ၪလဲၪ အဂဲးဆ့ ပက ဘၪ အၪ့ဎၬထၪ့ထဲၩ့နီၪလီၫႉ

            မိမၫရံၫအဆၧမၩဆံၭခိၬဖိၪယီၩ န့ ဘၪဆၧအဎိၩဒိၪထုၬ မူၭခိၪ ဘၩ့မုးနီၪလီၫႉ လၧပၥၭခံဖၧၩ့ အ့ၪပကအီၪ က့ၪဎွ့ၩထၪ့ထၬလၧ ဆၧအရ့ၩဒိၪအလးနီၪ လၧဆၧအဂူၪဂၩၥံၪစွါ ဘဲၫ ပကယဲၩထၪ့ဝ့ၫဒၪလၧ ယွၩအဆၧ ဘၪၥၭ အၡါဒ့ၭနီၪလီၫႉ  မိမၫရံၫ အီၪက့ၪထၬ ဆၧဆၪ့လၩ့ၥုၪ့ဆၪ့လၩ့ၥၭ ဘဲၫယီၩၥိၭအကၠီၩ့  မွဲကဲၪထၪ့ဝ့ၫဒၪ ၦလၧ အလၧၫ့ ထၪ့ဎွ့ၩထၪ့လၧ ယွၩအခိးအတၩ ၦၡၩၥံၪထီးအလူၬဖၧၩ့ ဘၪဆၧဆိၪဂ့ၩဝ့ၫဒၪအကၠီၩ့ ႇ ဆၧဆၪ့လၩ့ၥုၪ့ဆၪ့လၩ့ၥၭနီၪ မွဲဝ့ၫ ဆၧမၩဆံၭခိၬဖိၪလီၫလါနၫ့ ဖ့ၪအ့ၪပၧၩ ဆၧအဎိၩဒိၪထုၬအကၠီၩ့ ႇ ဘၪထွ့ၪလၧ ဆၧဆၪ့လၩ့ၥုၪ့ဆၪ့လၩ့ၥၭအဂဲး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪဝ့ၫ ဘဲၫယီၩၥိၭ ယရၩလၩ့ဖ့ၪၥ့ၪယၫအ့ၪ ဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪ လီၫႉ