“ၥၭဘၪ့ဖိၪၥံၪ ကဘၪအီၪက့ၪထၬ ဆၧမံၫမးဆၧ, ဆၧထိစိၩဎိၩဒိၪဒဲ ကဘၪလီၩ့မၩဖိၬထွ့ၫ ဆၧယိထွ့ၫမၩဆၧၩ့ဆၧလုၫလါအဂဲး”

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ “ၥၭဘၪ့ဖိၪၥံၪ ကဘၪအီၪက့ၪထၬ ဆၧမံၫမးဆၧ, ဆၧထိစိၩဎိၩဒိၪဒဲ ကဘၪလီၩ့မၩဖိၬထွ့ၫ ဆၧယိထွ့ၫမၩဆၧၩ့ဆၧလုၫလါအဂဲး” အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ၥၭဘၪ့ဖိၪၥံၪနီၪ ကဘၪအီၪက့ၪထၬ ဆၧမံၫမး, ဆၧထိစိၩဎိၩဒိၪဂီၩ့ ကအၪ့မံၫမးဆၧအဂး ဆၧၥုၪ့ဒူၩၥၭဒူၩ လလၩ့မၬခွံၬဘၪ နးဆိၩတၭ အဆၧၥၭမၧၫ့နီၪ ကဘၪအီၪၥၭမၧၫ့ဝ့ၫ လၧၫ့လၧၫ့ဎွ့ၩဎွ့ၩအကၠီၩ့ ၥၫ့ဎွၩဖရၫ့စ့ၭ ဆၪ့ထွ့ၫထၬ ၥၭဘၪ့ဖိၪၥံၪ အီၪဝ့ၫဒၪ ဘဲၫယီၩၥိၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ၥၭဘၪ့ဖိၪလဖၪ ဆၧယိထွ့ၫမၩဆၧၩ့ဆၧလုၫလါနီၪ ကဘၪလီၩ့မၩဖိၬထွ့ၫဂီၩ့ ဆၧလဖၪၥံၪနီၪ ကဘၪမၩဂုထၪ့အၪထၪ့ဝ့ၫနီၪလီၫႉ ၥၭဘၪ့ဖိၪလဖၪၥံၪနီၪ ကဘၪအီၪက့ၪလၩ့ထၬအၥၭလၧ ကဆါဎြံၬ အဆၧၥီၪ့ၥၫ့ အဂုးအခၧၫ့ဖၧၩ့ဂီၩ့ ကဘၪအၪ့န့ထၪ့ ဆၧဖ့ၪကိၪ့လၧ ၦအဂ့ၩအဘွၩ ဖ့ၪကိၪ့ဆၧလဖၪၥံၪအီၪနီၪလီၫႉ အီၪက့ၪလၩ့ထၬအၥၭ ဘဲၫယီၩၥိၭ, အၪ့န့ထၪ့ထၬ ဘဲၫယီၩၥိၭအဖၧၩ့ တခၩဒၪ ဆၧၥၭမၧၫ့ ဆၧအၪ့ထၩနးမံၩ့ ဒၪဆၧၫ့ယၫ န့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ လီၩဖျီၪထၪ့ထၬဝ့ၫနီၪလီၫႉ

ၥၫ့ဎွၩဖရၫ့စ့ၭ ကိၭဖံၭၥိၭဘၪ ၥၭဘၪ့ဖိၪၥံၪလၧ ဆၧယိထွ့ၫမၩဆၧၩ့ဆၧ လုၫလါနီၪ ကဘၪလီၩ့မၩဖိၬထွ့ၫဝ့ၫအဂးဂီၩ့ ဆၧယိထွ့ၫမၩဆၧၩ့ဆၧ ဆၧမၩယီၩ မၩဂုထၪ့အၪထၪ့ ပၥၭခံဖၧၩ့ ဆၧယၫ့ၥုၪ့ယၫ့ၥၭဆၧနီၪလီၫႉ ခံၫ့ခၫဆၧၫ့ထီဘဲၫယီၩ ဆၧယိထွ့ၫမၩဆၧၩ့ဆၧလုၫလါယီၩ မွဲဝ့ၫဒၪ ၥံၪ့ဎွံၪလၧ အမၩဘျၪထဲၩ့ဆၧနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့, ပယိထွ့ၫမၩဆၧၩ့ ၦဂူၫဂၩကန့အဂး အဆိၫထုၬနီၪ ဆၧချဲၩ့လၩ့ဎိၭလၧ ကဆါယွၩ ကဘၪအီၪဝ့ၫနီၪလီၫႉ ပကဘၪယိလၩ့ပၥၭ, ၦဂူၫဂၩၥံၪ အၥၭခံဖၧၩ့ ကဲၪဘဲၫၥ့ၪလဲၪ ပကဘၪဒီၪနါဂီၩ့ အဝ့ၫၥံၪအဆၧၥၭမၧၫ့ဖၧၩ့ ဆၧၥုၪ့ထိၥၭထိ, ဆၧၥုၪ့အုၭၥၭအုၭ လဖၪၥံၪနီၪ ပကဘၪအၪ့နၩ့ဝ့ၫနီၪလီၫႉ ပအီၪဆုးကျိၭလိၬၥၭလၧ ကဆါယွၩအီၪစွါဘဲၫ ၦဂူၫဂၩၥံၪ ဒၪထၪ့ကဆါယွၩလၧပအီၪ ကၥ့ၪဝ့ၫဒၪနီၪလီၫႉ မွဲဆၧနီၪ ပကဘၪၥုၪ့ထၪ့ ဆၧဆုးကျိၭလိၬၥၭလၧ ကဆါယွၩအီၪအဂး ၥၫ့ဎွၩဖရၫ့စ့ၭ ဆၫ့ထွ့ၫထၬဝ့ၫဒံၭနီၪလီၫႉ

ပကဘၪအၪ့က့ၩဘၩဆိၪဖၪဆၧ ကစုၩယၫဂီၩ့ ပကချဲၩ့ဒုၪ့ ကဆါဎြံၬလၧ ဆၧၥုၪ့ထံးၥၭထံးဖၧၩ့ မွဲကဆါဎြံၬအလူနီၪ ပကၥ့ၪယၫထၪ့ ပျၩ့ပျၩ့အဂး, ဆၧၥၭမၧၫ့ဖၧၩ့ ဆၧအလိၫဆၧဖ့ၪကိၪ့လဖၪၥံၪနီၪ အဆိၫထုၬ ပလီၩ့ဎွါထၪ့လၧ ဆိၫၡဲၫမံၫဒံၫယၫအ့ၬဂီၩ့ ဆၧလီၩ့ဎွါထၪ့ ကဘၪအီၪလၧ ၦအဂ့ၩအဘွၩဖ့ၪကိၪ့ဆၧလဖၪၥံၪအီၪအဂး ၥၫ့ဎွၩဖရၫ့စ့ၭ ဆၫ့ထွ့ၫထၬအ့ၪ ၥၭဘၪ့ဖိၪၥံၪ ဘဲၫယီၩၥိၭနီၪလီၫႉ မွဲဆၧနီၪ အဲၪကွံၩဘၪၥၭဘၪ့ဖိၪ ထီးအလူၬ ၥၫ့ဎွၩဖရၫ့စ့ၭ အဆၧဆၫ့ထွ့ၫအီၪဝ့ၫဘဲၫယီၩၥိၭ မွဲနၥံၪ လီၩ့မၩဖိၬထွ့ၫန့ဝ့ၫဒၪ ကိၭဒံၭကိၭဂၩလါဆံၭႉ