“ပကလီၩ့ဎွါထၪ့ကဆါဎြံၬ လၧၦအၡၪ့ဖိၪၥံၪအကျၩအဂဲး”

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကလီၩ့ဎွါထၪ့ကဆါဎြံၬ လၧၦအၡၪ့ဖိၪၥံၪအကျၩအဂဲး အကၠီၩ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့, ၦကၭၥလ့ၬ ဆၧအီၪကီၪ့ဖိၪကိၭဂၩဒ့ၭယီၩ လၧၦၥၭဝံၥၭဘဲၩ ဆၧအၪ့ဆၧအီၩၥံၪ, လၧၦဆၧကီၩ့ဆၧၥိၭ လအီၪဘၪလဖၪၥံၪ, လၧၦဆၧစူၭဆၧဆၫဒၨၭလဖၪၥံၪ, ၦဘၪလၩ့ထီၫ့ဖၧၩ့လဖၪၥံၪဒဲ ၦလၧပလၥ့ၪယၪဘၪလဖၪၥံၪအကျၩ ပကလီၩ့ဎွါထၪ့ ကဆါဎြံၬ ကန့ဝ့ၫအဂးဂီၩ့ လၧၦၡၩလဖၪၥံၪယီၩ ဘဲၫၦထၧၫ့ဖုထၧၫ့ဝဲၥိၭ ပကမၩဖံၭထံၩဖံၭၥိၭ, ပကဖ့ၪအ့ၪ ပဆၧမၩဆၧၩ့ ကန့ဝ့ၫအကၠီၩ့ ၥၫ့ဎွၩဖရၫ့စ့ၭ အၪ့က့ၩဘၩဆိၪဖၪအ့ၪပဂး ဘဲၫယီၩၥိၭနီၪလီၫႉ ဆၧအၪ့က့ၩဘၩဆိၪဖၪယီၩ အၪ့က့ၩဘၩဆိၪဖၪထၬဝ့ၫလၧ ၦယိထွ့ၫမၩဆၧၩ့ ၦအၡၪ့ဖိၪၥံၪလဂၩမွဲဝ့ၫဒၪ St. Vincent De Paul အဘိၪ့မုနံၩနီၪလီၫႉ

ထၧၫ့ဖုဝဲထံၭၥိၭ ထီးအလူၬၥံၪဧ့, လၧပဆၧၥၭမၧၫ့ မုကိၭနံၩဒ့ၭဖၧၩ့ ပကအီၪၥၭမၧၫ့ဘဲၫ St. Vincent De Paul, St. Mother Teresa ၦဆံၫ့ဎံၪဖိၪလဖၪၥံၪဂီၩ့ ပဆၧၥၭမၧၫ့ဘဲၫယီၩနီၪ မွဲပၥုၪ့ထၪ့ ဆၧဎံၫဆၧလၩ ဂံၪ့ဒီၪ့, ဆၧဎံၫဆၧလၩ နဲၩ့ဎီၩ့ဒဲ ဂၪ့ခိၪချိၫ့ မွဲဝ့ၫဒၪနီၪလီၫႉ လကၭဒံၭဘၪ မွဲဝ့ၫၦစူၭကီၪ့ထၬ လဆိၩကၠၪ မူၭခိၪဘၩ့မုး ဆၧထူၭဆၧလၧၫ့ဆ့နီၪလီၫႉ လၩ့ဆၫ့ဒၪဆၧ Mother Teresa နီၪ အၪ့ဎၬထၪ့ ကဆါဎြံၬလၧ India ထံၫခး Calcutta ဝံးဖၧၩ့ ၦအၡၪ့ဖိၪၥံၪဒဲ ၦအဘၪခွံၬၡိၬထၬလဖၪၥံၪအကျၩဂီၩ့ ယိထွ့ၫမၩဆၧၩ့ အဝ့ၫၥံၪ ဂ့ၩဂ့ၩဘၪဘၪနီၪလီၫႉ လကၭဒံၭဘၪ ၦအဘၪခွံၬၡိၬထၬအၥၭ လၧဖၧၩ့ၥၭနဲၩ့ထံၭ ၦကၥံၪထီလဖၪ အမ့ၬခွၩ့နီၪ ဆီၫ့မီၪ့ထၪ့ဝ့ၫ ဘဲၫကဆါဎြံၬအမ့ၬဂီၩ့ နၧၫ့မၧၫ့ထၪ့ဝ့ၫလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ပဆၧၥၭမၧၫ့ မုကိၭနံၩဒ့ၭဖၧၩ့ ၦအၪ့ခြးဆၧ, ၦအၡၪ့ဖိၪ လၧဖၧၩ့ၥၭနဲၩ့ထံၭ လဖၪၥံၪနီၪ ပဒၪဂီၩ့ ပဂဲၫထဲၩ့မီၪ့ဘံၭခွံၬ အဝ့ၫၥံၪ အီၪဎွ့ၩကၠၪယူၭလဲၪႉ အီၪဎွ့ၩဘျၩ့ယူၭလဲၪႉ အ့ၪမွဲပၥၭကဲၪထၪ့ဘဲၫယီၩၥိၭ ကိၭဘျၩ့ဒ့ၭယူၭစွါဘဲၫ ပကအီၪနၪ့ထၪ့ထဲၩ့ဘၪ ၦဆံၪ့ဎံၪၥံၪအပၩရမံၫလဖၪဒဲ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့လဖၪဂီၩ့တၭ ပကကျ့ၭစၨၭ ဆီၫ့မီၪ့ဒၪထၪ့ ကဆါဎြံၬ လၧဆၧကိၭမံၩ့ဒ့ၭအဖၫ့ခိၪလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မုကိၭနံၩဒံၭဖၧၩ့ မွဲနၥံၪအီၪၥၭမၧၫ့ၥ့ၪဝ့ၫဒၪ ဘဲၫၦဆံၪ့ဎံၪဖိၪၥံၪ အဆၧၥၭမၧၫ့ကိၭဒ့ၭကိၭဂၩလါဆံၭႉ