ၦၡၩအဆၧလူၬဒိၪဎွ့ၩဒိၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ၦၡၩအဆၧလူၬဒိၪဎွ့ၩဒိၪအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧဂၪ့ခိၪချိၫ့ဖၧၩ့ယီၩ ဆၧဘၪဖျ့ၬဘၪမၪလဖၪ ပကဘၪအီၪ ထုၪ့ၥုၪ့ထုၪ့ၥၭနီၪလီၫႉ ဆၧအနီၥံၪနီၪ မနီၪလဲၪစွါဘဲၫ

ၦအမၩဆံၬဖိၪၥံၪ အီၪဝ့ၫဒၪ အၪမၬလါနၫ့ ကမၩဆၧမၩအဂး ဖံၬလအီၪဘၪနီၪလီၫႉ

ဂံၪ့ဒီၪ့ဖိၪၥံၪ အီၪဝ့ၫဒၪ အၪမၬလါနၫ့ အီၪအလး ဂံၪ့လအီၪဘၪနီၪလီၫႉ

ၦအမၩဆၧဖိၪၥံၪ အီၪဝ့ၫဒၪ အၪမၬလါနၫ့ ဆၧမၩပၧၩ့ အခွးအယါ လအီၪဘၪနီၪလီၫႉ

ၦအၪဒၪဆၧ အဆၧလူၬဒိၪဎွ့ၩဒိၪမွဲဂ့ၩ ဆၧယူၭဆၧယၪ့ လအီၪလၧၩ့ဘၪနီၪအကၠီၩ့ ၥၫ့ဎွၩဖရၫ့စ့ၭ လီၩဖ့ၪနဲၪထၬ အီၪဝ့ၫဒၪ ဘဲၫယီၩၥိၭနီၪလီၫႉ

            အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧခးပယၩ့ယီၩ ဘဲၫနီၪၥိၭ ဆၧဘၪမၪအီၪဝ့ၫဒၪ အၪမၬလ့ၬအကၠီၩ့ ၦၡၩကိၭဂၩဒ့ၭ ကန့ဘၪ ဆၧလူၬဒိၪဎွ့ၩဒိၪ လၧၫ့လၧၫ့ဎွ့ၩဎွၩအဂး ပနၫ့ဆါဒၪပဝ့ၫ လၧပမၩအန့ႇ လၧပမၩအနၧၩ့လဖၪ ပကဘၪကျ့ၭစၨၭမၩ လိၪဝ့ၫဒၪနီၪလီၫႉ ဆၧလၧဆၧမၩအဂ့ၩအဘွၩဒဲ ဆၧအၪ့လဲၩထၪ့ၥၭနီၪ ပကြၨၭ စႇထၪ့လၧ ပၥုၪ့ပၥၭႇ တီၩလီၩ့ ဆၧကိၪ့ၥ့ၪႇ ဆၧၥ့ၪယၫနၪၥ့ၪနီၪလီၫႉ မွဲဆၧနီၪ လၧဂၪ့ခိၪချိၫ့ဖၧၩ့ ကဲၪထၪ့ဝ့ၫဒၪ ဆၧဘၪဖျ့ၬဘၪမၪလဖၪ ပကဘၪအၪ့ဎၬ နၪၥ့ၪဂီၩ့ ပကအီၪလၧ ဆၧထုၪ့ၥုၪ့ထုၪ့ၥၭဖၧၩ့တၭ ပနၫ့ဆါဒၪပဝ့ၫမွဲဂ့ၩႇ ပဂံၪ့ဒီၪ့မွဲဂ့ၩႇ ပနဲၩ့ပဎီၩ့မွဲဂ့ၩ ဆၧအၪ့လဲၩထၪ့ၥၭ ကန့အဂး ပကဘၪ ခိးဂဲးခိးဘၭနီၪလီၫႉ လၧအလိၪဝ့ၫဒၪ ဂဲးဘၭလဖၪ ပကအၪ့က့ၩဘၩဆိၪဖၪလၧ ကဆါယွၩအီၪလါဆံၭႉ လၧခးပယၩ့ယီၩ ဆၧဎူၫဆၧဎၩ့ ကန့ဝ့ၫဒၪဂီၩ့ ၦၡၩအဆၧလူၬဒိၪဎွ့ၩဒိၪ ကထၪ့ထီၫ့ႇ ကဂုထၪ့အၪထၪ့အဂး ထံၫခးဖိၪၥံၪထီးအလူၬ ပကဖီၪ့ထၪ့ဖံၭထၪ့ဆၧ ကၠၧၫ့ကၠၧၫ့လိၪဝ့ၫဒၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ပကအၪ့က့ၩဘၩဆိၪဖၪအ့ၪ ပထံၫခး ခးပယၩ့အဂးလါဆံၭႉ