ၦၡၩလဂၩဘၪလဂၩ လတီၩလဘၪ ဆၧဖံၭထံၩဖံၭၥိၭအဂဲး

လၧဎြံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ  ၦၡၩလဂၩဘၪလဂၩ လတီၩလဘၪ ဆၧဖံၭထံၩဖံၭၥိၭ အဂဲးအကၠီၩ့နီၪလီၫႉ ပကဲၪၦၡၩၥံၪလဖၪယီၩ  ပၥၭလုအီၪပဖ့ၪဆိၫဒၪ ဆၧၥၭမၧၫ့အဂးဂီၩ့  ၦၡၩၥံၪအဂ့ၩဒိၪနီၪ  ပၥၭနၪ့ခွံၬၥ့ၪဝ့ၫဒၪနီၪလီၫႉ ၦၡၩအဆၧလၩဆၧဖၩ့ ပကဘၪပဒၩ့ထၬနီၪ  ပၥၭနၪ့ၥ့ၪ  လါနၫ့ဂ့ၩႇ ဆၧၥၭမၧၫ့ၥံၪအဂးနီၪ ပကဘၪမၩအ့ၪမနီၪလဲၪနီၪ  ပနၪ့ထၪ့ကိၭနံၩနီၪလီၫႉ ၦၡၩလနၩ့နၩ့နီၪ  အီၪက့ၪပဲၩ့ထၬ လဂၩဘၪလဂၩဂီၩ့  အခံၫ့လူၬဝ့ၫဒၪလၧ ဆၧၥၭမၧၫ့ၥံၪအဂး နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦၡၩလနၩ့နၩ့နီၪ  ဘၪအီၪၡၪ့ၡၪ့ယၬယၬအၪမၬဒ့ၭနီၪလီၫႉ  ဆၧနီၪအကၠီၩ့ႇ  အဝ့ၫၥံၪနီၪ လၩ့ထွံၩလၩ့ယွၩလၧ ဆၧၡၪ့ဖၧၩ့ နီၪလီၫႉ  ၦၡၩလနၩ့နၩ့နီၪ  ကဲၪဒိၪကဲၪမုဂီၩ့  အဆၧပိၭဆၧလၫ့ အီၪအၪမၬဒ့ၭနီၪအကၠီၩ့ႇ ၥိၩ့ထၪ့ဝ့ၫဘဲၫ ၥၭအီၪအၥိၭဂီၩ့ လလိၪလၧဘၪ ခွံၬၡိၭခွံၬဝ့ၫဘုၪဘုၪယီၫယီၫနီၪလီၫႉ  ၦၡၩအဂူၫဂၩနးဆ့ၭ  ကမၩဝ့ၫဘဲၫၥိၭအဝ့ၫၥံၪယီၩစွါဘဲၫႇ ၦဂၪ့ခိၪယီၩ ကလၩ့မၬခွံၬဒၪပၧၩဂီၩဂီၩနီၪလီၫႉ ပကဆီၫ့မီၪ့လၩ့ လၧခဲၫ့ကမံၩ့ခီၫ့စွါဘဲၫႇ ဆၧမၩအယီၩနီၪ ၦၡၪ့ဖိၪၥံၪအဂး  ဘၪထံၭဘၪဆၫ အီၪဝ့ၫအၪမၬဒ့ၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦၡၩလနၩ့နၩ့နီၪ စီၪဎိၩလၩ့အၥၭဂီၩ့  ၦၡၩအဂူၫဂၩနီၪ လ့ၩဖိးထဲၩ့ဖိးလအီၪဘၪ  ဘဲၫၥိၭအဝ့ၫၥံၪနီၪအကၠီၩ့ ဆီၫ့မီၪ့ဝ့ၫနီၪလီၫႉ လၩ့ဆၫ့ဒၪဆၧ  အဝ့ၫၥံၪယီၩ  ယိၬဖၬခွံၬ ၦၡၪ့ဖိၪၥံၪ ထီးအလူၬနီၪလီၫႉ ဆၧလၧပကဲၪၦၡၩနီၪ ဖူၬလူၭကူၭၥံၪဒဲ ဆၧယၫ့ၥုၪ့ယၫ့ၥၭၥံၪ  ပဆၧၥၭမၧၫ့  မီၫ့ဎီၩ့လိၬၥၭ အဖၫ့ခိၪ ပဆၧဒီၩ့ဘၪဎီၩ့ ကဘၪအီၪဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါကၠဲၭနီၪ တဲၩ့လၩ့ထၬပၧၩ မီၪ့ဎီၩ့မီၪ့လ့ၬနီၪလီၫႉ ဆၧနီၪအကၠီၩ့ႇ ပအီၪဂၪ့ခိၪဖၧၩ့ ၦထၧၫ့ဖုဝဲၥံၪလဖၪယီၩ လဂၩဘၪလဂၩ  ပကဘၪ ဖံၭထံၩဖံၭၥိၭလိၬၥၭ ဂ့ၩဂ့ၩဘၪဘၪလိၪဝ့ၫဒၪအကၠီၩ့  ၥၫ့ဎွၩဖရၫ့စ့ၭ  အဆၧၥီၫ့ဆၧၥၫ့အီၪဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ