ၦအဂ့ၩအဘွၩ မၩဂုထၪ့အၪထၪ့ အဘိၪ့အဘၩအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ၦအဂ့ၩအဘွၩ မၩဂုထၪ့အၪထၪ့ အဘိၪ့အဘၩအဂဲးအကၠီၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့, ဖိၪၥၪအအီၪဖျဲၪၥၫ့ဒဲ ဖိၪၥၪလအီၪဖျဲၪဒ့ၭဘၪ လကၭဒံၭဘၪ ၦၥုၪ့က့ၭၥၭၡါၥံၪဒဲ ၦဘၪၥုၭအီၪအၥၭလဖၪၥံၪနီၪ ဘၪထိးခွံၬၡိၬထၬအၥၭ မုကိၭနံၩဒ့ၭနီၪလီၫႉ လဂၩဘၪလဂၩ ဆၧယိထွ့ၫမၩဆၧၩ့ လအီၪဘၪအကျၩ ၦၡၩလဖၪၥံၪနီၪ ဘၪထိးဖီၪ့ဂုးခၧၫ့ထၬအၥၭလၧ ၦအဲၪလၩ့ၥၭလဖၪၥံၪအဖၫ့လၬနီၪလီၫႉ လါနၫ့ ၦၡၩကိၭဂၩဒ့ၭနီၪ အီၪဝ့ၫလၧ အလူဒိၪဎွ့ၩဒိၪနီၪလီၫႉ ဆၧအဂဲးအဖးယီၩနီၪ ဂၪ့ခိၪဖိၪၥံၪ ဆၧထုၪ့ၥုၪ့ထုၪ့ၥၭ ကအီၪအဂး ဆၧဘိၪ့ဆၧဘၩဆုၬဆုၬၥံၪ ကဘၪမၩဖျီၪထၪ့အဂး မွဲဝ့ၫဒၪအတၩလၫ့အကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬ အီၪဝ့ၫဘဲၫယီၩၥိၭနီၪလီၫႉ 

အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့, တခၩဒၪ ဆၧဘိၪ့ဆၧဘၩနးမံၩ့ ပကဲၪၦၡၩလဂၩနီၪ ဆၧအလူဒိၪဎွ့ၩဒိၪ အီၪဝ့ၫဒၪနီၪလီၫႉ ဆၧဘိၪ့ဆၧဘၩ အဒိၪထုၬ(၄) မံၩ့ ၥီၪ့ၥၫ့ထၬနီၪ မွဲဝ့ၫဒၪ ၦၡၩလဂၩဘၪလဂၩ ကဘၪယူၭယၪ့ပၭကၩလိၬၥၭ ကဘၪအီၪဝ့ၫဒၪနီၪလီၫႉ ၦၡၩအခွးအယါဒဲ ၦၡၩအလူဒိၪဎွ့ၩဒိၪနီၪ အီၪဝ့ၫဒၪ မီၪ့ဎီၩ့လိၬၥၭနီၪလီၫႉ

ထၧၫ့ဖုဝဲထံၩၥိၭ ထီးအလူၬၥံၪဧ့, ၦဎြံၬဖိၪၥံၪအဂး ကဆါယွၩ တဲၩ့လၩ့ထၬၦၡၩနီၪ ဘဲၫအဂၩ့ဒၪအဝ့ၫအၥိၭ, ဘဲၫအနၫ့ဆါဒၪအဝ့ၫအၥိၭနီၪလီၫႉ မွဲဆၧနီၪ, ၦၡၩလဂၩဘၪလဂၩ ဆၧယိခွါမၩဆၧၩ့ လအီၪဘၪဂီၩ့ ခွံၬၡိၬထၬလိၬၥၭနီၪ မီၪ့ဎီၩ့ဝ့ၫဒၪလၧ ခွံၬၡိၬထၬကဆါယွၩနီၪလီၫႉ ဘဲၫၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪထၬၥိၭ ပကဘၪၥ့ၪယၫလၩ့ပၥၭလၧ ပဝ့ၫၦၡၩလဖၪၥံၪယီၩ မွဲဝ့ၫဆၧအလူဒိၪဎွ့ၩဒိၪတၭ ပကဘၪအဲၪ ပဆၧၥၭမၧၫ့, ပကဘၪထိးဆၧၫ့လၩ့ပၥၭ, ပကဘၪအီၪက့ၪ ပၭကၩလၩ့ပၥၭနီၪလီၫႉ လကၭဒံၭဘၪ ပကဘၪဒီၪနါခိၭနၪ, ပကဘၪမၩဖိထွ့ၫလၧ ၦဆၧဘိၪ့ဆၧဘၩ ၥီၪ့ၥၫ့ထၬလဖၪနီၪလီၫႉ ပကလီၩ့မၩဖိထွ့ၫဘဲၫယီၩၥိၭဂီၩ့ ပကကျ့ၭစၨၭ အီၪၥၭမၧၫ့လၧ အလူဒိၪဎွ့ၩဒိၪအီၪ ၦၡၩလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧဆိၪဂ့ၩဆိၪဘွၩလါဆံၭနဲၪႉ

Add new comment

11 + 8 =