ၦလၧအၪ့က့ၩဘၩဆိၪဆၧအခံၫ့ လအီၪဘၪၥံၪအဂး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦလၧအၪ့က့ၩဘၩဆိၪဆၧအခံၫ့ လအီၪဘၪၥံၪအဂး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပနါဂၧၫ့ ယံၫယါဘၪ ခိၬမၬခိၬမၬဆၧ လမံၩ့နီၪ “ယကြၨၭအ့ၪက့ၩဘၩဆိၪဖၪဆၧ အၪအၪလ့ၪႇ ယမိအၪ့က့ၩဘၩဆိၪဖၪဆၧႇ လါနၫ့ဂ့ၩ အခံၫ့လအီၪဘၪႇ ယဖ့ၪအ့ၪအခံၫ့န့အ့ၬ” ဘဲၫၥိၭဆၧဂၪ့အံၪဂၪ့အူၭ ဆၧချဲၩ့ဘဲၫနီၪ ပဘၪနါဂၧၫ့ ခိၬမၬခိၬမၬဆၧနီၪလီၫႉ ပဆၧၥၭမၧၫ့ မုကိၭနံၩနီၪ ခံၫခုၪ ဘံၪဘူၪၥၭလၧ ဆၧဖံၭဆၧမၩဖၧၩ့ ကိၭကၠၪဒ့ၭနီၪလီၫႉ လၧဂံၪ့ဒီၪ့အဂဲးအဖးအဂး ပဖီၪ့ထၪ့ဖံၭထၪ့ဆၧအဖၧၩ့ ဆၧခံၫခုၪၥၭအီၪႇ ဆၧအၪ့ယိၪခဲၫ့ကံၭ အီၪဝ့ၫဒၪနီၪလီၫႉ ပစီၪဘၪ ပၥၭလၧ အခံၫ့ၡၩႇ မုကနံၩကနံၩ ပန့ထၬဘၪ အခံၫ့နီၪ ပစီၪဘၪလၧ လၧၫ့ထၪ့ဎွ့ၩထၪ့ လအီၪဘၪနီၪလီၫႉ လါနၫ့ ဂံၪ့ဒီၪ့ဖိၪၥံၪ လနၩ့နၩ့နီၪ န့ထၬဘၪအခံၫ့ (၂၄) နၩရံၩအခံၫ့နီၪ ဖီၪ့ထၪ့ဖံၭထၪ့ အဆၧမၩ န့ဝ့ၫဒၪ နံၪဆၬ (၄၈) နၩရံၩနီၪလီၫႉ မၩဝ့ၫနၧၩ့ ဘဲၫနီၪၥိၭအကၠီၩ့ ကြၨၭန့ဘၪဝ့ၫလၧ (Nobel) ခိၪဖၭနီၪအကၠီၩ့ ၥၫ့ဎွၩဖရၫ့စ့ၭ လီၩထၬဝ့ၫ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧဂံၪ့ဒီၪ့ကဖျိၪ့ဖၧၩ့ ဆၧဖံၭဆၧမၩနီၪ အီၪဝ့ၫဒၪ အၪမၬလ့ၬနီၪလီၫႉ လါနၫ့ ဆၧနဲၩၡၪ လအီၪဘၪ ပကဘၪဆူနဲၩထၬ ကမံၩ့နီၪ ပဖီၪ့ထၪ့ဖံၭထၪ့ ဘဲၫနီၪၥိၭန့ဝ့ၫဒၪနီၪ မွဲပဖိၭဂိၫ့ထၬ ဆၧဘၩဆိၪဖၪ အဆၧၥၭမၧၫ့အကၠီၩ့နီၪလီၫႉ ၦလၧၥုၪ့အီၪၥၭအီၪလၧ အဲၪဒိၭအၪ့က့ၩဘၩဆိၪဖၪဆၧလဂၩနီၪ ကဆါကၠဲၬအဂး ဖ့ၪအ့ၪအဝ့ၫအခံၫ့ တၡါၡါနီၪလီၫႉ ပမၩဘဲၫနီၪၥိၭအဆၧမၩနီၪ မီၪ့ဎီၩ့ဝ့ၫဒၪလၧ ပမၩလၩ့မၬခွံၬ ဆၧကိၪ့လၧ ပအၪ့က့ၩဘၩဆိၪဖၪဆၧအဂး အခံၫ့လအီၪဘၪ ဆၧကိၪ့ဆၧကဲၪ့နီၪလီၫႉ ပဖ့ၪအ့ၪ ဆၧအၪ့က့ၩဘၩဆိၪဖၪဆၧ န့ဝ့ၫဒၪအခံၫ့အဖၧၩ့ လၧပအလိၪလဖၪ မွဲဝ့ၫဒၪ ဆၧဎူၫဆၧဎၩ့ႇ ဆၧၥုၪ့ဎွံၫၥၭထိၬလဖၪနီၪ ပကလီၩ့ဎွါဒၪန့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ လီၩလၩ့ရါလၩ့ထၬဆၧ အီၪဝ့ၫဒၪ ဘဲၫယီၩအကၠီၩ့ ယလီၩဖ့ၪၥ့ၪယၫအ့ၪဘၪ နၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬ လၧဆၧအၪ့က့ၩဘၩဆိၪဖၪဆၧအဖၧၩ့ မွဲနၥံၪ အဆၧၥၭမၧၫ့ လၧၫ့ထၪ့ဎွ့ၩထၪ့ဒၪဝ့ၫလၧ ကဆါဎြံၬ အဆၧအဲၪဆၧကွံၩလါဆံၭႉ