ၦထီးအလူၬအဂး အခ့ၫအၡၩ အဆၧမၩနီၪ အလူဒိၪဎွ့ၩဒိၪအီၪအဂဲး

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးလူၬၥံၪဧႉ ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အနိၫ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦထီးအလူၬအဂး အခ့ၫ အၡၩအဆၧမၩနီၪ အလူဒိၪဎွ့ၩဒိၪ အီၪဝ့ၫဒိၪမၬဒ့ၭ အဂဲးအကၠီၩ့နီၪလီၫႉ လၧလံၬဆံၫ့ဎံၪ စမၫကၧၭ (၉:၃၀-၃၇)  ဖၧၩ့ ဘၪဆၧကွ့ၭထၪ့ထၬအီၪဝ့ၫ ကဆါဎြံၬအထံၩအဖျဲ လဆံၫနံၫဂၩ တ့ၭလိၬအၥၭ လၧ ပလၫမိကဲၪအဒိၪထုၬ အဂဲးအကၠီၩ့ နီၪလီၫႉ အဝ့ၫၥံၪတ့ၭ လိၬၥၭအဂဲးနီၪ ကဆါဎြံၬ ၥ့ၪယၫဝ့ၫ တၭ ကဆါဎြံၬစံၭ ဘၪအဝ့ၫၥံၪ  ၦအ့ၪမိကဲၪဘၪအၥၭလၧ အခိၪလဂၩဂၩနီၪ ႇ မိ ဘၪကဲၪဝ့ၫလၧ ၦအဆံၭထုၬလၧ ၦထီးအလူၬအကျၩ ႇ ဒဲ ၦထီးအလူၬ အခ့ၫအၡၩလီၫႉ

            ထၧၫ့ဖုဝဲထံၩၥိၭၥံၪဧႉ ႇ ၦၡၩလဂၩအ့ၪ အဲၪဒိၭကဲၪ ၦအဒိၪထုၬ ႇ ၦအဂုခိၪထုၬနီၪ ကဘၪအီၪဆၧၫ့ထုၪ့လၧ ၦၡၩၥံၪ အလးခဲၫ့ဂီၩ့ ကဘၪမၩခ့ၫၡၩအဆၧမၩလၧ ၦၡၩၥံၪအဂးနီၪလီၫႉ  ၦၡၩလဂၩ အ့ၪပစံၭကန့လၧ အလူဒိၪ ဎွ့ၩဒိၪအီၪ ၦၡၩနီၪ မွဲအီၪၥုၪ့လၩ့ထၬအၥၭ လၧအဝ့ၫၥံၪ အဆၧပၧၩ့ဆၧဎီး အဖၫ့ခိၪ ႇ အဆၧဖံၭဆၧမၩအဖၫ့ခိၪ ႇ အကျိၪစ့ၩ အီၪအၪမၬဒ့ၭအဖၫ့ခိၪမွဲအ့ၬႉ လၧကဆါယွၩ အမ့ၬၥၪ ဖၧၩ့ ဆၧအဎိၩဒိၪထုၬဒဲ ဆၧအဂ့ၩထုၬနီၪ မွဲဝ့ၫဒၪ ၦၡၩလၧ အမၩ ခ့ၫၡၩအဆၧမၩလၧ ၦၡၩၥံၪအဂးနီၪလီၫႉ ၦၡၩၥံၪ အဆၧအီၪထၨၪမုလဲၪ မွဲအ့ၬ ႉ ဖ့ၪလၫ့အ့ၪၦၡၩၥံၪ အီၪဝ့ၫထၨၪမု လဲၪ နီၪလီၫႉ အ့ၪၦၡၩလဂၩ အဲၪဒိၭအီၪလၧ ဆၧအဂုခိၪထုၬအလးစွါ ဘဲၫ ကဘၪမၩ ခ့ၫၡၩ အဆၧမၩ လိၪဝ့ၫဒၪတၡါဒ့ၭနီၪလီၫႉ

            ထၧၫ့ဖုဝဲထံၩၥိၭၥံၪဧႉ ႇ လၧလံၬဆံၫ့ဎံၪဖၧၩ့ ခ့ၫၡၩအဆၧဖံၭဆၧမၩအဂဲးယီၩ ပနါဂၧၫ့ ဘၪ ခိၭမၬခိၭမၬအကၠီၩ့ လမွဲလၧၩ့ ဘၪ ၥၭဆၧဆုးလၩ့ အဂဲးအဖးလါနၫ့ ထုၬထၪ့ထၬ အခီၫပယီၫ အီၪဝ့ၫဒၪ အဂုးအခၧၫ့နီၪလီၫႉ ပကဘၪမၩ ခ့ၫၡၩအဆၧမၩ ဘဲၫ ကဆါဎြံၬၥိၭနီၪလီၫႉ ကဆါဎြံၬမၩခ့ၫၡၩအဆၧမၩနီၪ မွဲလီၩဖျီၪထၪ့ဝ့ၫလၧ အဆၧချဲၩ့ လီၫမွဲအ့ၬ ႉ မၩဖျီၪထၪ့ဝ့ၫလၧ အဆၧဖံၭဆၧမၩဖၧၩ့ အၪနီၪလီၫႉ ၦၡၩကဘၪမၩ ခ့ၫၡၩအဆၧမၩလၧ အဝ့ၫအဂးမွဲအ့ၬႉ အဝ့ၫမၩအ့ၪ ခ့ၫၡၩအဆၧမၩလၧ ၦၡၩၥံၪအဂးလီၫႉ မွဲဆၧနီ အ့ၪပအဲၪ ဒိၭဖိၬထၪ့ ကဆါဎြံၬအခဲၫ့စွါ ဘဲၫ ပကဘၪ မၩခ့ၫၡၩအဆၧမၩ ဘဲၫကဆါဎြံၬၥိၭနီၪလီၫႉ ပၥီၪကၠဲၪအီၪလၧ ကဆါယွၩအဖၫ့ခိၪ ထၨၪမု လဲၪ နီၪ ပယိန့ဝ့ၫဒၪလၧ ခ့ၫၡၩအဆၧမၩဖၧၩ့ ပၥုၪ့ဆုးလၩ့ၥၭဆုးလၩ့ အီၪထၨၪမုလဲၪ အဖၫ့ခိၪနီၪလီၫႉ အ့ၪပမၩခ့ၫၡၩ အဆၧမၩ အၪထၪ့ စွါ ဘဲၫ ပဆၧထုၪ့ၥုၪ့ထုၪ့ၥၭအီၪဝ့ၫဒၪ ပအီၪလၧ ကဆါယွၩအမ့ၬယၫ အဂဲးအကၠီၩ့နီၪလီၫႉ ၦၡၩလၧဖ့ၪကၪထဲၩ့ပၧၩ လန့ ဘၪ နးမံၩ့ ၦၡၩၥံၪလဖၪအဂး ႇ ၦအၡၪ့ၥံၪအဂး ပဖ့ၪအ့ၪခ့ၫၡၩအဆၧမၩနီၪ ဆၧကၪဆၧဂဲၩအီၪလါနၫ့ ပကဘၪယိ ကဆါယွၩ အဆၧအဲၪအဆၧ ယၫ့ ၥုၪ့ယၫ့ၥၭဂီၩ့ ပကဘၪ ထိးဆၧၫ့ မၩကဲၪထၪ့ ခ့ၫၡၩအဆၧမၩနီၪလၧ ၥုၪ့အီၪၥၭအီၪနီၪလီၫႉ

             မွဲဆၧနီ အဲၪကွံၩဘၪထၧၫ့ဖုဝဲၥံၪ ပကဘၪအၪ့စၪ့လၩ့ပၥၭ ပဖိၬကဆါဎြံၬအခဲၫ့နီၪ ပၥုၪ့ၥၭ ဆုးလၩ့အီၪလၧ ၦၡၩၥံၪ ဘၪထိးအီၪပဲၩထၬလဖၪၥံၪအဖၫ့ခိၪဧၪ ႇ ဘဲၫပၥၭအီၪၥိၭ ပမၩလၧၫ့ဎွ့ၩထၪ့ အ့ၪ ပဆၧၥၭလုဧၪ ႇ ပဖ့ၪအ့ၪပဆၧမၩဆၧၩ့ ၦၡၩလဖၪနီၪ လၧ ပထၧၫ့ဖုဝဲ ႇ ပဘူၭပထံးၥၪ ႇ လၧ ပအဲၪဒိၭၦၡၩလဖၪၥံၪ အဂးလီၫဧၪ ႇ လၧၦၡၩအလိၪတၡါၥံၪအဂး ႇ ၦလၧ ဖ့ၪကၪထဲၩ့ပၧၩ လန့ဘၪ နးမံၩ့ ၦၡၩလဖၪၥံၪအဂး ပဖ့ၪအ့ၪပဆၧမၩဆၧၩ့ တၡါဒ့ၭဧၪနီၪ ပကဘၪအၪ့စၪ့လၩ့ပၥၭအကၠီၩ့ ၥၫ့ဎွၩ ဖရၫ့စ့ၭ အဆၧၥီၪ့ဆၧၥၫ့ အီၪဝ့ၫ ဘဲၫယီၩၥိၭအဂဲး ယရၩလၩ့ ဖ့ၪၥ့ၪယၫအ့ၪဘၪနၥံၪလၧ ဆၧအဲၪဆၧ ကွံၩဎိၩဒိၪဖၧၩ့နီၪလီၫႉ