ၦဂံၪ့ဒီၪ့ဖိၪၥံၪအဂး ဘၪထိးမၩတုၩ့မၩဎီ ဆၧဆီၫ့မီၪ့ဆီၫ့မၬဆၧအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ  ၦဂံၪ့ဒီၪ့ဖိၪၥံၪအဂး ဘၪထိးမၩတုၩ့မၩဎီ  ဆၧဆီၫ့မီၪ့ဆီၫ့မၬဆၧ  အဂဲးအကၠီၩ့နီၪလီၫႉ ၦမုၪဒဲၦခွၫအကျၩနီၪ န့ၩခၠၧၫ့ဆၧလၩ့ဆၫ့  အီၪဝ့ၫဒၪနီၪလီၫႉ လါနၫ့ဂ့ၩႇ အဝ့ၫၥံၪနီၪ လဂၩဒဲလဂၩ မၩဆၧၩ့လိၬၥၭ လါခီၫလါခီၫန့ဝ့ၫဒၪအကၠီၩ့ ပကဘၪၥ့ၪယၪထၭ အခီၫ့ပယီၫ့လိၪဝ့ၫ ဒၪနီၪလီၫႉ  ယၧၩဝ့ၫမွဲၦခွၫလဂၩႇ ယၧၩဝ့ၫမွဲၦမုၪလဂၩအကၠီၩ့  ပကဘၪၥ့ၪယၪလၩ့ပၥၭထံၫထံၫဆၭဆၭ လိၪဝ့ၫဒၪနီၪလီၫႉ ဘၪမနီၪလဲၪစွါဘဲၫႇ ၦဂံၪ့ဒီၪ့ဖၧၩ့   ပဒၪဘၪဆၧမၩတုၩ့မၩဎီယီၩ အၪမၬဒ့ၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ဆၧလၧၦၡၩကမံၩ့နီၪ ၦမုၪဒဲၦခွၫ ၦမိၡါကၧၩ့ထၪ့ မီၫ့ဎီၩ့လိၬၥၭ အ့ၬနီၪလီၫႉ လါနၫ့ဂ့ၩႇ  ပလကကြၨၭအီၪက့ၪပဲၩလိၬၥၭအဆၫ့ လလိၪဘၪအကၠီၩ့ ပကဘၪထုၪ့လၩ့ၥၭ လိၪဝ့ၫဒၪနီၪလီၫႉ ထီးလကၭဒ့ၭဘၪႇ  ပကဆီၫ့မီၪ့လၩ့ ၦထီအခံၫ့ယီၩစွါဘဲၫ ၦမုၪဒဲၦခွၫၥံၪလဖၪ အၪ့လဲၩ့ထၪ့ မိၡါခံးဂၩ့အမံၩ့မံၩ့နီၪ လၧၦနဲၩ့ၦဎီၩ့ယီၩ ပဒၪဘၪ  ဖျီၪဎိၩဒိၪ အၪမၬဒ့ၭနီလီၫႉ

အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ကဆါကၠဲၭနီၪ  တဲၩ့လၩ့ထၭဂၪ့ခိၪဖိၪၥံၪ ထီးအလူၬနီၪလီၫႉ ၦကဲၪဂၪ့ခိၪဖိၪၥံၪနီၪ လဂၩဒဲလဂၩ  ပတဲၩ့လၩ့လိၬၥၭ လန့ဘၪအကၠီၩ့ ပကဘၪၥ့ၪယၪလၩ့ပၥၭနီၪလီၫႉ ဘၪမနီၪလဲၪစွါဘဲၫႇ  ဆၧလၧၦၡၩကမံၩ့နီၪ အစီၩ့အမၩ့လအီၪဘၪဘဲၫၥိၭ ကဆါကၠဲၭနီၪလီၫႉ ၦဂၪ့ခိၪဖိၪၥံၪထီးအလူၬ အဆၧၥၭမၧၫ့ထၧၫ့ဘီၩ့ယၪအဂးနီၪ  မွဲဝ့ၫဒၪ ကဆါကၠဲၭဖ့ၪလၫ့ထၭပၧၩလၬဆီၫ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ၦကဲၪဂၪ့ခိၪဖိၪလဂၩနီၪ ပလ့ၩအီၪလၧကဆါကၠဲၭအလးန့ၬအ့ၬႇ ပလ့ၩမၩကဆါကၠဲၭအဆၧမၩလန့ဘၪအကၠီၩ့ ပကဘၪဆီၫ့မီၪ့အၪ့ဂၬလၩ့ပၥၭ လိၪဝ့ၫဒၪနီၪလီၫႉ အရ့ၩဒိၪထုၬနီၪ ကဆါကၠဲၭတဲၩ့လၩ့ထးဆၧ ထီးအလူၬနီၪ အလူအဎွ့ၩ ဆၧယုၬယၪ့  ကဘၪအီၪအဂးနီၪ  မွဲဝ့ၫဒၪ ၦဂၪ့ခိၪဖိၪၥံၪ အမူၩဒၩနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၪ့အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬ အဆၧအဲၪဆၧကွံၩ လါဆံၭႉ