ၥၭမုဆံၫ့ဎံၪကဆါနီၪ ဖ့ၪအ့ၪပၧၩ ဂဲး ဘၭ ႇ ဆၧယိလါ ဒဲ ဆၧဆူနဲၩနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧႉ ႇ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ ဆၧ ၥၫ့နီၪမွဲဝ့ၫဒၪ ၥၭမုဆံၫ့ဎံၪကဆါနီၪ ဖ့ၪအ့ၪပၧၩ ဂဲး ဘၭ ႇ ဆၧယိလါ ဒဲ ဆၧဆူနဲၩနီၪ လီၫႉ ၥၭမုဆံၫ့ဎံၪဖ့ၪအ့ၪပၧၩ အခိးအတၩလဖၪ ပကန့ဘၪအဂး ပကဘၪဝဲထၪ့ထၬ ပၥုၪ့ပၥၭ ဒဲ ကဆါဎြံၬအဆၧအဲၪနီၪ လၧဂဲးဆီၪ့ဘၭ ဆီၪ့ ဖၧၩ့ ႇ ဆၧယိလါဖၧၩ့ ဒဲ ဆၧဆူနဲၩဖၧၩ့ ပကဘၪကဲၪ ၦအထိးၥၭ လၧ ၦၡၩၥံၪအကျၩနီၪလီၫႉ ဆၧလၧၥၭမုဆံၫ့ဎံၪနီၪ ဘဲၫလံၩဖၭဒိၪၥိၭ ဂဲးဆီၪ့ဘၭဆီၪ့အီၪ ဝ့ၫဂီၩ့ ပဖီၪ့ဂုးထၬအဝ့ၫလန့ဘၪ ႇ ပအီၪဖျါပထုၬအဝ့ၫလန့ဘၪ ႇ ပထိၪတွၭ အဝ့ၫလန့ဘၪ ဒဲ လံၩယီၩ ကလ့ၩအူၪဘံၩ အလးထခီၫလဲၪ ပထယါဆိၪထၬ လန့ဘၪနီၪလီၫႉ

          ၥၭမုဆံၫ့ဎံၪနီၪ ဖ့ၪအ့ၪၦၡၩၥံၪအၥၭ ကဆါမွဲဝ့ၫလီၫႉ ၥၭမုဆံၫ့ဎံၪယီၩ အီၪဂဲၫလၩ့လၧ ဖါကဆါႇ ဖိၪက ဆါ အီၪဂီၩ့ လၧပဝ့ၫၥံၪ ကိၭဂၩအအီၪ ဂဲၫလၩ့ဝ့ၫ ႇ ဂဲၫဖ့ၪအ့ၪပၧၩ ၥၭအဆၧမၧၫ့ နီၪလီၫႉ ဘဲၫဆၧဆူနဲၩအဖၨၪဖၧၩ့ ၥိၭ ၥၭမုဆံၫ့ဎံၪနီၪ ဖ့ၪအ့ၪၦၡၩၥံၪ ဆၧၥၭမၧၫ့အကဆါ မွဲဝ့ၫလီၫႉ လၧ ပၫ့တ့ၫကီၭ ဘိၪ့မုနံၩအခံၫ့အိၩ ကဆါဎြံၬ အထံၫအဖျဲၥံၪ ဆၧၥၭမဲၪကဲၪထၪ့ဎိၩဒိၪအခံၫ့ အီၪဝ့ၫ ဒၪအကၠီၩ့ စဲၪ့ထၪ့လၧခီၫ့ လဘုၪ့ဘၪနီၪလီၫႉ ပဝ့ၫၥံၪနးဆ့ ကကၠၪကကၠၪပမိအီၪဝ့ၫဒၪ လၧ ပလး ဝၩ့ ့ဖၧၩ့နီၪလီၫႉ လါနၫ့ ကဆါယွၩနီၪ ၥ့ၪယၫ ပကဘၪၥီၪ့ၥၫ့ဆၧ ဘဲၫၥ့ၪလဲၪ ႇ ပကဘၪဝဲထၪ့ထၬ ပၥုၪ့ပၥၭဘဲၫၥ့ၪလဲၪ တၭ ဖျါလၩ့ ၥၭမုဆံၫ့ဎံၪလၧ ပအီၪနီၪလီၫႉ မွဲဆၧနီၪ ၥၭမုဆံၫ့ဎံၪနီၪ အီၪဝၩ့ဖီၩ့ ထၬပၧၩဂီၩ့ ပၥၭဝံၩ့ဝၩ့ ကဲၪထၪ့လဖၪၥံၪ ႇ ပဆၧနဲၩ အဘၪမၪလဖၪၥံၪ နီၪ မၩဖီၩ့ဖျ့ၭခွံၬအ့ၪပၧၩဂီၩ့ မၩဎွ့ၩထၪ့အ့ၪပၧၩလၧ ဂဲးဘၭနီၪလီၫႉ ဖ့ၪထဲၩ့အ့ၪပၧၩ ဆၧၥၭမၧၫ့အၥၫ့နီၪလီၫႉ

          ကဆါဎြံၬအထံၩအဖျဲၥံၪနီၪ အၪ့န့ထၪ့ ၥၭမုဆံၫ့ဎံၪဂီၩ့ ကကၠၪ ဆၧၥၭမဲၪဆၧ လအီၪလၧၩ့ဘၪ ဂီၩ့ လ့ၩလီၩ့ လၩ့လၬလၩ့ ဎြံၬကဆါအဂဲး အလးဎံၩ့လၩ့ယၫနီၪလီၫႉ ၥၭမုဆံၫ့ဎံၪနီၪ အၪ့လဲၩထၪ့ခွံၬ ထဲၩ့ ပၥုၪ့ပၥၭနီၪလီၫႉ ဖ့ၪအၪထၪ့အ့ၪပၧၩ ဆၧၥ့ၪယၫနၪၥ့ၪဂီၩ့ ပကရၩလၩ့ ယွၩအစူၪလးခၪ့ထွ့ၪ ဎိၩဒိၪ အဂဲး လၧၦၡၩၥံၪ အီၪအဂး ဖ့ၪအ့ၪပၧၩဂဲးဘၭနီၪလီၫႉ

          ဂၪ့ခိၪချိၫ့ယီၩ အလိၪအီၪလၧ ၦအလၧၫ့ဎွ့ၩလၧ ဆၧယိလါ ႇ ဆၧဆူနဲၩ ဒဲ ဂဲးဆီၪ့ဘၭဆီၪ့အီၪ ၦၡၩၥံၪနီၪလီၫႉ ဂၪ့ခိၪဖိၪၥံၪနီၪ လဂၩဘၪလဂၩ ဆၨးဎံၫဆၨးလၩဂဲးဖၧၩ့ ႇ ၡၩခံးဂးဂဲးဖၧၩ့ လမီၪ့ဎီၩ့ ဘၪအကျၩ ပဝ့ၫၥံၪယီၩ ပကဘၪကဲၪဝ့ၫ ဆၧဖၩ့ ႇ ထံၫလၫနီၪလီၫႉ ၦအနၧၩ့ ဆၧၥံၫဒိၪ ကဆါဎြံၬ အဆၧအဲၪ ႇ အဆၧတီၩဆၧလီၩ့ ဒဲ အဆၧဂ့ၩဆၧဘွၩလဖၪ ပကၥ့ၪယၫနၪၥ့ၪအဂး ၦအဖ့ၪအ့ၪပၧၩ ဂဲးဘၭ မွဲဝ့ၫ ၥၭမုဆံၫ့ဎံၪ ကဆါအခိးအတၩ အဆၧဖ့ၪလၫ့လဖၪ ပကန့ဘၪအဂး ပကဝဲထၪ့ထၬ ပၥၭ ကိၭဒံၩကိၭဂၩလါဆံၭႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬ မွဲနၥံၪဒိၭန့ ၥၭမုဆံၫ့ဎံၪ အဆၧ စီၩ့ဆၧမၩ့ ကိၭဂၩလါဆံၭႉ