ၥၭခ့ၬအဆၧမၩနီၪ မၩလၩ့ဖၭလိၬၥၭ ဆၧမၩမွဲဝ့ၫလီၫႉ

ထၧၫ့ဖုဝဲထံၩၥိၭထီးအလူၬၥံၪဧႉ ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အနိၫ့အဆၧရၩလၩ့ဖၧၩ့ မုက နံၩယီၩ ယအဲၪဒိၭရၩလၩ့ န့အ့ၪဘၪ နၥံၪနီၪ မွဲဝ့ၫဒၪ ဆၧလၧ ဆၧၥၭခ့ၬအဆၧမၩနီၪ မၩကဲၪထၪ့ ၦၡၩၥံၪ လၩ့ဖၭလိၬၥၭ အဂဲးမွဲဝ့ၫအကၠီၩ့နီၪလီၫႉ လၧလံၬဆံၫ့ဎံၪ (၉:၃၈-၄၁)  ဖၧၩ့နီၪ ၦၡၩလဂၩ နၫ့ထၪ့ခွံၬ ဆၧနၪလၧ ကဆါဎြံၬအမံၩ့တၭ ႇ ကဆါဎြံၬအထံၩအဖျဲၥံၪ အီၪပဒၩ့ထၬအဝ့ၫ နီၪလီၫႉ ကဆါဎြံၬ ဒုၭအီၪပဒၩ့ထၬအထံၩအဖျဲၥံၪအ့ၬဂီၩ့ စံၭဝ့ၫဒၪ ၦလၧအမၩလၩ့လၬဆၧလၧ ယမံၩ့နီၪ ႇ စံၭအၧၩ့ယၧၩနး ဂၩအ့ၬႉ ၦလၧအလ ထၪ့ဒုၪဒၩ ဘၪပၧၩနီၪ မွဲအအီၪလၧ ပဂးလီၫႉ ကဆါဎြံၬၥီၪ့ထဲၩ့ၥၫ့ထဲၩ့ အထံၩအဖျဲ ၥံၪ ဘဲၫယီၩၥိၭနီၪလီၫႉ ပဝ့ၫၥံၪကိၭဂၩနးဆ့ ပကဘၪ အီၪက့ၪထၬ ဆၧထုၪ့ၥုၪ့ထုၪ့ၥၭလၧ ပအီၪက့ၪ ထၬ ပၥၭအဖၫ့ခိၪအဂး ကဆါဎြံၬ ကိၭထၪ့ထၬပၧၩ မွဲဝ့ၫဒၪနီၪလီၫႉ ပလကြၨၭထိးစၪ ဘၪပၥၭလၧ မုၪခီၩလဲ အီၪဒဲ ၦဂူၫဂၩၥံၪအဂး လကဲၪထၪ့ဘၪ ဆၧထိးၥၭအၧၩ့အဂး ပကဘၪအီၪက့ၪထၬ ဆၧထုၪ့ၥုၪ့ထုၪ့ၥၭ တၡါဒ့ၭ နီၪလီၫႉ

            ထၧၫ့ဖုဝဲထံၩၥိၭၥံၪဧႉ ႇ ဆၧလၧ ဆၧပလၧၫ့နီၪ အီၪလၧပၧၩယဲၩ့ယဲၩ့အ့ၬအဂဲး ကဆါဎြံၬ ဖ့ၪနဲၪထၪ့အ့ၪပၧၩနီၪလီၫႉ ကဆါဎြံၬ အထံၩအဖျဲၥံၪနီၪ လၧၦၡၩနၪ့စဲၪ့ထၪ့ခွံၬဆၧနၪလၧ ကဆါဎြံၬ အမံၩ့နီၪ မွဲဝ့ၫဆၧမၩအဂ့ၩလါနၫ့ လမွဲဘၪအဝ့ၫၥံၪအလိၬၥၭအကၠီၩ့ ဆၧမၩအဂ့ၩယီၩ ၦၡၩနီၪ လဆုး မၩဘၪအဂး အီၪပဒၩ့ထၬ ဝ့ၫဒၪနီၪလီၫႉ ကဆါဎြံၬအထံၩအဖျဲလဖၪနီၪ လၧအဝ့ၫၥံၪအၥၭဖၧၩ့ လၧကဆါဎြံၬအီၪ ဆၧအခွးအယါ အလၩ့ဆၫ့လဖၪနီၪ အဝ့ၫၥံၪလီၫ ကဘၪန့ဘၪအဂး အီၪက့ၪ ထၬအၥၭဘဲၫယီၩၥိၭနီၪလီၫႉ အဝ့ၫၥံၪလီၫကဘၪမွဲဝ့ၫ ကဆါဎြံၬအထံၩအဖျဲဂီၩ့ ၦဂူၫဂၩလဖၪနီၪ အဝ့ၫၥံၪ မိအီၪပဲၩခွံၬထၬဝ့ၫနီၪလီၫႉ ပဝ့ၫၦၡၩလဖၪၥံၪနီၪ ဘဲၫပဆၧကိၪ့ဆၧတဲၩ့အီၪ ႇ ဘဲၫပဆၧဖံၭ ဆၧမၩအီၪၥိၭ ၦဂူၫဂၩၥံၪ လကိၪ့တဲၩ့ဘၪ ႇ လမၩကဲၪထၪ့ဘၪ ဆၧမၩမီၪ့ဎီၩ့လၧပၧၩနီၪ ပအီၪက့ၪပဲၩ ထၬ ၥ့ၪဝ့ၫဒၪ ယဲၩ့ယဲၩ့ဒ့ၭနီၪလီၫႉ ဆၧလဂ့ၩလဘၪဘၪ ဆၧအဝံအစၧၩ့နီၪ အီၪဂဲၫစဲၪ့ထၪ့လၧ ၦၡၩအီၪ က့ၪထၬၥၭ ဘဲၫယီၥိၭဖၧၩ့ဂီၩ့ အဝ့ၫၥံၪနီၪ အီၪက့ၪထၬအၥၭ ဘဲၫ ၦၡၩအစီၩ့အမၩ့ဎိၩဒိၪၥိၭတၭ မၩနၧၩ့မၩစၪ ၦလၧ လမီၪ့ဎီၩ့ဘၪ အဝ့ၫၥံၪနီၪလီၫႉ

            လၧဆၧအီၪကီၪ့ဖၧၩ့နးဆ့ ပကဘၪအီၪက့ၪထၬ ဆၧထုၪ့ၥုၪ့ထုၪ့ၥၭ လၧ ၦၡၩလမီၫ့ဎီၩ့ဘၪလၧ ပၧၩအဖၫ့ခိၪ ႇ ၦအၡၪ့ၥံၪ အဖၫ့ခိၪ ႇ ၦဘၪထိးအီၪပဲၩထၬလဖၪၥံၪအဖၫ့ခိၪ ပလမၩနၧၩ့မၩစၪဘၪ လၧ ပဆၧချဲၩ့မွဲဂ့ၩ ႇ ပဆၧဖံၭဆၧမၩမွဲဂ့ၩ ဖၧၩ့နီၪလီၫႉ ပကဘၪ ၥုၪ့ထၪ့ ခရၧၫ့လၧ ဆၧဆၫ့လၩ့ၥုၪ့ဆၫ့ၥၭ အလး နီၪ ပအီၪက့ၪထၬၥနိၫ့လဖၪဂီၩ့ ပအီၪက့ၪထၬ ၦဂူၫဂၩၥံၪ ယဲၩ့ယဲၩ့ ကဲၪထၪ့ဝ့ၫဒၪ ႇ ပကဘၪလ့ၩဆၧကၠၧၫ့ကၠၧၫ့လၧ ၦဂူၫဂၩၥံၪ အလးနီၪ ပအီၪက့ၪဘံၭထၬပၥၭလၧ ပကဲၪဆၧဆူနဲၩဖိၪၥံၪအကၠီၩ့ ဘဲၫပလမီၫ့ဎီၩ့ဘၪ ၦဂူၫဂၩၥံၪၥိၭႇ ပလူဒိၪဎွ့ၩဒိၪ အီၪနဲၪ့န့ ၦဂူၫဂၩၥံၪၥိၭ နီၪလီၫႉ ယၧၩဝ့ၫနီၪ မွဲဎြံၬဆၧဆူနဲၩဖိၪ ႇ ယၧၩဝ့ၫနီၪ မွဲဝ့ၫ ကၭၥလ့ၬ ဆၧဘိၪ့ ဆၧဘၩဖိၪ ႇ ယၧၩဝ့ၫနီၪ မွဲ ခရၧၫ့ ထနီၪ ႇ ခရၧၫ့ ထယီၩ ပအီၪက့ၪ ဘံၭထၬပၥၭၥ့ၪဝ့ၫဒၪနီၪလီၫႉ ၦဂူၫဂၩလဖၪၥံၪနီၪ ပအီၪ က့ၪပဲၩ ထၬၥ့ၪဝ့ၫ ႇ ပအီၪက့ၪထၬလၧ ပဆၧစ့ၩရၫ့ဖၧၩ့ ၥ့ၪဝ့ၫဒၪနီၪလီၫႉ ပကဘၪအၪ့ကံၩ့ ခိးတၩလၧ ယွၩအီၪ ဘဲၫပကနၧၩ့ဆၧၫ့ဘၪ ဆၧပလၧၫ့ လဖၪယီၩအဂးနီၪလီၫႉ ၥၭမုဆံၫ့ဎံၪနီၪ လအဲၪဒိၭဘၪ ၦအီၪက့ၪ ဘံၭထၬအၥၭဂီၩ့ အဲၪဒိၭၦဝဲထၪ့ထၬအၥၭလဖၪနီၪလီၫႉ ခရံၬကၭၥလ့ၬ  ဆၧအီၪကီၪ့လး နီၪ မွဲ ဆၧမၩလၩ့ဖၭဆၧအလးမွဲအ့ၬ ႉ ဆၧကၧၩ့ဖျိၪ့ထၪ့ဆၧ အလးမွဲဝ့ၫဒၪနီၪလီၫႉ ပကဘၪအီၪၥၭ မၧၫ့ ဘဲၫပၥၭဘၪၥၭ လမွဲဘၪဂီၩ့ ပကဘၪအီၪ ဘၪလိၬအိၭလိၬလၧ ၦဂူၫဂၩၥံၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪဝ့ၫဘဲၫယီၩၥိၭအဂဲး ယရၩလၩ့ဖ့ၪၥ့ၪ ယၫ အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ