ယွၩအဆၧအဲၪဆၧကွံၩနီၪ လၩ့ဘျိၪလၩ့ၡၩ့အီၪအ့ၬလီၫ

ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪ ၥၫ့ဎွၩဖရၫ့စ့ၭ အဆၧၥၫ့နီၪ မွဲဝ့ၫဒၪဆၧလၧ ယွၩအဆၧအဲၪနီၪ လၩ့ဘျိၪလၩ့ၡၩ လအီၪဘၪအဂဲးအကၠီၩ့နီၪလီၫႉ လၧကဆါဎြံၬလီၩ့လၩ့လၬလၩ့ဆၧၥၭထိၬအပရၧၫ့အခံၫ့အိၩ နဲၪဖျီၪထၪ့အဆၧဖံၭဆၧမၩအလၩ့ဆၫ့အီၪဝ့ၫအၪမၭဒ့ၭလါနၫ့ ဘၪဒၪခီၩ့ဆၧၫ့ယၫဆၧကၪဆၧဂဲၩဆ့ အီၪဝ့ၫဒၪနီၪလီၫႉ ကဆါဎြံၬနီၪ ဘၪဒၪခီၩ့ဆၧၫ့ယၫဆၧကၪဆၧဂဲၩလါနၫ့ဂ့ၩၥံၫကျံၩအၪ့အူၬထၪ့ကဆါယွၩစံၭခိးစံၭတၩဘၪ ကဆါယွၩ ကိၭအဆၧၫ့ခိၭအထီဒ့ၭနီၪလီၫႉ ကဆါဎြံၬၥံၫကျံၩအၪ့အူၭထၪ့ဖါကဆါယွၩနီၪ အီၪဂဲၫစဲၪ့ထၪ့လၧ အဝ့ၫနီမွဲဝ့ၫဖါကဆါယွၩ အဖိၪခွၫအဆၧထိးၥၭဖၧၩ့နီၪလီၫႉ

ကဆါဎြံၭစံၭခိးစံၭတၩဘၪ ဖါကဆါယွၩအဆၧယိထွ့ၪမၩဆၧၩ့အီၪလၧ ၦအဆံၭထုၬၦအဂဲးဆါဘၭဆါအီၪ ၦၡၩၥံၪအဂးနီၪလီၫႉ ၦလၧအဒီၪနါခိၭနၪကဆါဎြံၬအဆၧရၩလၩ့လဖၪၥံၪဖၧၩ့နီၪၦအစီၪဎိၩလၩ့အၥၭအီၪဝ့ၫဒၪဂီၩ့ ၦလဖၪၥံၪယီၩ ခိၭယိ ကဆါဎြံၬအဆၧဘၪမၪၥံၪနီၪလီၫႉ ၦအဆံၭထုၬၦအဂဲးဆါဘၭဆါအီၪလဖၪၥံၪနီၪ ဒီၪနါခိၭနၪကဆါဎြံၬဂီၩ့ ကဆါဎြံၬနီၪ မွဲဝ့ၫယွၩအဖိၪခွၫလဂၩအကၠၩ့အဆၧဆူနဲၩအီၪဝ့ၫဒၪနီၪလီၫႉ ဆၧလဖၪၥံၪယီၩ ကဲၪထၪ့ဘဲၫယီၩၥိၭနီၪမွဲဝ့ၫဖါကဆါယွၩအလိၪတၭကဆါဎြံၬနးဆ့ဘၪမၩလၧၫ့ဎွၩဖါကဆါယွၩအလိၪဘဲၫယီၩၥိၭနီၪ ဆၧမုၬလၩၥၭဎွံၫ ဆၧမံၫ့ၥုၪ့မံၫ့ၥၭ အီၪဝ့ၫဒၪနီၪလီၫႉ ပဝ့ၫၦၡၩလဖၪၥံၪဆ့ ပကဘၪမၩလၧၫ့ဎွၩထၪ့ကွၩအလိၪအဂးပကဘၪအီၪလၧ ဆၧမုၬလၩၥၭဎွံၫနီၪလီၫႉ ပကဘၪထိးဆၧၫ့ဆၧၥၭထိၬအပရၧၫ့လၧ ဆၧဆၪ့လၩ့ၥုၪ့ဆၪ့လၩ့ၥၭ ဆၧတီၩဆၧလီၩ့ဖၧၩ့နီၪလီၫႉ

ဒီၪနါခိၭနၪ ဆၧဂၩ့မၧၫ့လါဆံၭ