မုကိၭနံၩဒ့ၭဖၧၩ့ ပလကြၨၭၥၭနၪ့ဘၪ ဆၧဘၩဆိၪဖၪဆၧအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ မုကိၭနံၩဒ့ၭဖၧၩ့ ပလကြၨၭၥၭနၪ့ဘၪ ဆၧဘၩဆိၪဖၪဆၧအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧပဆံၭဆံၭခီၩဒၪအိၩ ပဂံၪ့ဒီၪ့ဖိၪၥံၪကၠၧၫ့ကၠၧၫ့ ပမၩလိၪထၬ ဆၧဘၩဆိၪဖၪလဖၪနီၪ ပလကြၨၭခွံၬၡိၬခွံၬဘၪနီၪလီၫႉ ဆၧဘၩဆိၪဖၪလဖၪယီၩ ပကဘၪအီၪက့ၪပၧၩ့ထၬလၧ ပဆၧထီးန့ဒဲ ပၥၭခံဖၧၩ့အဂး ၥၫ့ဎွၩဖရၫ့စ့ၭ ဆၫ့ထွ့ၫထၬဝ့ၫ ဘဲၫယီၩၥိၭနီၪလီၫႉ ဆၧလၧဆၧဘၩဆိၪဖၪဆၧယီၩလီၫ ထီၩလၧဖါကဆါယွၩ အၥၭခံဖၧၩ့ ဂ့ၩဘၪစဲၪအဂး မွဲဝ့ၫဒၪ အကၠီၪ့အဖျီၩ့အဂ့ၩလဖၪနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

မွဲဆၧနီၪ လၧပၥၭခံဖၧၩ့ ဂဲၫကဲၪထၪ့လၧ ဆၧအၪ့က့ၩဘၩဆိၪဖၪဆၧ လအီၪဘၪအခၫ ပကဘၪ ထုၪ့ၥုၪ့ထုၪ့ၥၭ ဘဲၫပၥ့ၪလဲၪစွါဘဲၫ လၧဆၧအၪ့က့ၩဘၩဆိၪဖၪဆၧအဖၧၩ့လီၫ မွဲပကၥ့ၪယၫထၪ့ႇ မွဲပကထီၩၥ့ၪထၪ့လၧ ကဆါယွၩ အၥၭခံဖၧၩ့အီၪနီၪလီၫႉ အ့ၪမွဲပၥ့ၪယၫထၪ့ ကဆါဎြံၬ အၥုၪ့အၥၭမၬ ဆၧချံၫ့ဆၧဘၩႇ ဆၧဂုးဆၧခၧၫ့ ကအီၪလၧပအီၪဂီၩ့ ပယၫ့ၥၭမၩဆၧၩ့ ပနဲၩ့ပဎီၩ့ ၦၡၩၥံၪလၧ ဆၧအဲၪဆၧကွံၩဖၧၩ့ ကန့ဝ့ၫဒၪနီၪလီၫႉ ဆၧဆူဆၧနဲၩ ဎိၩထၪ့ဒိၪထၪ့ႇ ဆၧအဲၪဆၧကွံၩ ဂုးထၪ့အၪထၪ့အဂးနီၪ ကဲၪထၪ့ဝ့ၫဒၪလၧ ပအၪ့က့ၩဘၩဆိၪဖၪဆၧႇ မုကိၭနံၩ ပချဲၩ့ဒီၪနါလၧ ကဆါယွၩအီၪ မွဲဝ့ၫဒၪနီၪလီၫႉ

လၩ့ဆၫ့ဒၪဆၧ ခံၫ့ခၫဘဲၫယီၩ ဆၧကၪဆၧဂဲၩ အမံၩ့မံၩ့ ပဘၪဒၪထၪ့လၧ ပနဲၩ့ပဎီၩ့အခံၫ့ လၧဆၧအၪ့ကၩဘၩဆိၪဖၪဆၧအဖၧၩ့လီၫ ဆၧကိၭမံၩ့ကိၭဆံၩ့နီၪ ပခၪ့ဂၬခွံၬလၧ ဆၧၥုၪ့ဒူၩၥၭဒူၩ တီၩလီၩ့ဂဲးဘၭဖၧၩ့ န့ဝ့ၫဒၪနီၪလီၫႉ ပနၫ့ဆါဒၪပဝ့ၫႇ ပဂံၪ့ဒီၪ့ဒဲ ပထံၩပၥိၭၥံၪအဂးႇ ၦလၧအဘၪထိးဖီၪထၬၥၭ အဘၪထိးမၩနၧၩမၩစၪ မၩၥံၪခွံၬၦၡၩလဖၪအဂးႇ ၦလၧအဘၪထိးဒၨၭလၩ့အၥၭလၧ ဆၧစူၭဆၧဆါႇ ဆၧကၪဆၧဂဲၩၥံၪအဂးႇ ၦလၧအီၪဝံအီၪဆံၩ့လဖၪအဂး မွဲကန့ထၪ့ဘၪ ယွၩအခိးအတၩအဂး မုကိၭနံၩ ပကအၪ့က့ၩဘၩဆိၪဖၪဆၧလါဆံၭႉ မုကိၭနံၩ ဆၧဖၪဆိၪဖၪလဖၪနီၪ ပလကြၨၭၥၭနၪ့ဘၪ မွဲဝ့ၫနးၥၭဂဲးဘၭနီၪလီၫႉ မွဲဆၧနီၪ အဲၪကွံၩဘၪ ထၧၫ့ဖုဝဲထံၩၥိၭထီးအလူၬ လၧဂဲးဘၭယီၩ မုကိၭနံၩ ဆၧတတုၭတနၭဖၧၩ့ နၥံၪခွံလၫ့ၥၭကန့အဂး မွဲနၥံၪ န့ထၪ့ဘၪဂဲးဘၭ ကိၭဒံၭကိၭဂၩလါဆံၭႉ

Add new comment

1 + 7 =