မိမၫရံၫနီၪ အီၪလၧ ၦဘၥံၪလၧ ဆၧဆၫဆီၪ့ၥံၫဆီၪ့ ၦၡၩၥံၪအနဲၩ့နီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧႉ ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ၦဘၪအီၪလဂၩဎးအဆၧၥံၫဖၧၩ့ မိမၫရံၫအီၪလၧ အဝ့ၫၥံၪအနဲၩ့ အကၠီၩ့ နီၪလီၫႉ လၧဎြံၬဖိၪၥံၪ အဆၧဆူနဲၩဖၧၩ့ ဖါကဆါယွၩဒဲ ၦၡၩၥံၪအကျၩ ကဆါယ့ၫၡူၬဎြံၬအီၪၥိၭ ၦၡၩၥံၪ ဒဲ ကဆါဎြံၬ အကျၩနးဆ့ မိမၫရံၫ အီၪဝ့ၫဒၪအကၠီၩ့ ကၭၥလ့ၬဎြံၬဖိၪၥံၪ အီၪက့ၪထၬဆၧဆူ နဲၩ့ ဘဲၫယီၩၥိၭနီၪလီၫႉ မိမၫရံၫနီၪ မွဲဝ့ၫ ကဆါဎြံၬအမိအကၠီၩ့ ကၭၥလ့ၬဆၧအီၪကီၪ့ဖိၪၥံၪ အီၪက့ၪ ထၬဆၧယူၭယၪ့ အဎိၩဒိၪထုၬလၧ ယွၩအမိ မိမၫရံၫ အဖၫ့ခိၪ နီၪလီၫႉ

          ဘၪထွ့ၪလၧ မိမၫရံၫစွါဘဲၫ ထီၩ့ဝ့ၫဒၪလၧ ကဆါဎြံၬအီၪ တၡါဒ့ၭတၭ မိမၫရံၫယီၩ မွဲဝ့ၫ မူၭခိၪအၥီၫ့ အဂုခိၪထုၬလဂၩအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪဝ့ၫဒၪနီၪလီၫႉ စၭထၪ့လၧ ထုၪ့စူၪ ယၫ အခၪ့ထံၭ ကဆါဎြံၬ အီၪက့ၪထးထၬ မိမၫရံၫလၧ အထံၫဖျဲလဂၩ အစူၪဖၧၩ့အခံၫ့အီၩ မိမၫရံၫနီၪ မွဲဝ့ၫဒၪ ပဆၧအီၪကီၪ့ဖိၪၥံၪ အမိလဂၩအကၠီၩ့ ကဆါဎြံၬ ဖ့ၪထၬအ့ၪပၧၩ ယူၭနီၪလီၫႉ မွဲဆၧနီၪ စူၭကီၪ့ထၬပၧၩလၧ အဝ့ၫအဝံၫလၬဖၧၩ့နီၪလီၫႉ မိမၫရံၫယီၩ အဖိၪခွၫ ကဆါဎြံၬ ကဘၪထိး ၥံၫထီ အၥၭအခံၫ့ ဘဲၫအီၪလၧ အဖိၪခွၫအနဲၩ့ၥိၭ ၦၡၩၥံၪ ကၥံၫထီ အခံၫ့နးဆ့ မိမၫရံၫ အီၪလၧ အဝ့ၫၥံၪ အနဲၩ့နီၪလီၫႉ ၦကစဲၪ့ထၪ့လၧ ဂၪ့ခိၪဖၧၩ့ လဖၪအနဲၩ့ မိမၫရံၫ အီၪဝ့ၫဒၪ နီၪလီၫႉ ၦၡၩၥံၪ လဖၪ ခွံၬၡိၬထၬကဆါဎြံၬလါနၫ့ ယွၩအမိမိမၫရံၫနီၪ လခွံၬၡိၬထးဘၪ အဖိၪခွၫ ကဆါဎြံၬနီၪလီၫႉ ဘဲၫယီၫၥိၭဆ့လီၫ ႇ ၦၡၩၥံၪ ဘၪထိးခွံၬၡိၬထၬအၥၭ လဖၪအနဲၩ့ဆ့ မိမၫရံၫ လခွံၬၡိၬထၬဘၪဝ့ၫ လဂၩဎးနီၪလီၫႉ

          ထၧၫ့ဖုဝဲထံၩၥိၭထီးအလူၬၥံၪဧႉ ႇ ပအၪ့ကံၩ့ဘၩဆိၪဖၪဆၧအခံၫ့ အ့ၪပဒိၭနဲၩ့ပၥၭလၧ မိမၫရံၫ အီၪစွါဘဲၫ ဆၧပျီၩပျီၩလကဲၪထၪ့ဘၪနီၪလီၫႉ ပဆၧအၪ့ကံၩ့ဘၩဆိၪဖၪလဖၪ မိမၫရံၫနါဂၧၫ့ဝ့ၫဒၪနီၪ လီၫႉ လၧပၥၭခံဖၧၩ့ ပအဲၪဒိၭအၪ့ကံၩ့ မနီၪလဲၪၥံၪဆ့ မိမၫရံၫ ၥ့ၪယၫဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪဝ့ၫဒၪ နီၪလီၫႉ ကိုဗစ် ဆၧဆၫဘၪဂါဖၧၩ့ ဆၧဆၫဆါလဖၪၥံၪနီၪ ဘၪအီၪယဲၩ့လၧ ၦၡၩၥံၪလါနၫ့ မိမၫရံၫနီၪ အီၪလၧအဝ့ၫၥံၪအနဲၩ့ အကၠီၩ့ ၦဘၪထိးဆၧဆၫဘၪဂါလဖၪၥံၪ ဂဲးဆံၭဘၭဆါလကဲၪထၪ့ဘၪအဂး ၥၫ့ဎွၩဖရၫ့စ့ၭ အဆၧဖ့ၪဂဲးဖ့ၪဘၭ အီၪဝ့ၫဒၪနီၪလီၫႉ

          လၧပဆၧၥၭမၧၫ့ဖၧၩ့ ပဖၧၩ့ၥၭလၩ့မါအခံၫ့စွါဘဲၫ ပဆၧထိးထဲၩ့တၩ့ထဲၩ့ကန့အဂး မိမၫရံၫနီၪ အီၪပဒၩ့ထၬ အ့ၪပၧၩ လၧဆၧကၪဆၧဂဲၩဖၧၩ့နီၪလီၫႉ အ့ၪပဒိၭနဲၩ့ပၥၭလၧ အဝ့ၫအီၪစွါဘဲၫ မိမၫရံၫနီၪ အၪ့ကံၩ့ဘၩဆိၪဖၪ န့အ့ၪ ပၧၩပဂးလၧ ကဆါဎြံၬအီၪနီၪလီၫႉ မိမၫရံၫနီၪ မွဲ ပဝ့ၫၥံၪထီးအလူၬအမိအ ကၠီၩ့ အဖိၪအလံၩပဝ့ၫၥံၪလဖၪ အဂး လိၪမနီၪလဲၪအဂဲး ၥ့ၪယၫဝ့ၫဒၪဂီၩ့ အၪ့ကံၩ့ဘၩဆိၪဖၪန့အ့ၪ ပၧၩအကၠီၩ့ အ့ၪပဒိၭနဲၩ့ပၥၭလၧ မိမၫရံၫအီၪစွါဘဲၫ အခိး အတၩအီၪဝ့ၫ ဘဲၫၥ့ၪလဲၪအဂဲး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭအကၠီၩ့ ယရၩလၩ့ဖ့ၪၥ့ၪယၫ အ့ၪဘၪ နၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ