ဘၪထွ့ၫလၧ ၥၭဘၪ့ဖိၪၥံၪအဂး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪ နၥံၪနီၪ မွဲဝ့ၫဒၪ ဘၪထွ့ၫလၧ ၥၭဘၪ့ဖိၪၥံၪအဂး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အဂဲး အကၠီၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ လၧခးပီၫတူၫဂံၫႇ ဝံးလစဘိၩ့ ခးၥဲၫထၧၫ့ဘံၪ့ယၫ ၥၭဘၪ့ဖိၪၥံၪအဘိၪ့မုနံၩနီၪ ၥၫ့ဎွၩဖရၫ့စ့ၭ ၥီၪ့ၥၫ့ထၬ ၥၭဘၪ့ဖိၪ ထီးအလူၬ ဘဲၫယီၩၥိၭနီၪလီၫႉ လၧၥၭဘၪ့ဖိၪၥံၪ ဖိၪၥၪဆံၭအခံၫ့ ဆၧအၪ့မံၫမးႇ ၥၭအဆၧဆီၫ့မီၪ့ ဎိၩဎိၩဒိၪဒိၪ အီၪဝ့ၫဒၪ လနၫ့ဂ့ၩ ဆၧလဖၪၥံၪနီၪ ကဲၪထၪ့အၡါမၬ လန့ဘၪနီၪ ဆၧအၪ့ယိၪခဲၫ့ကံၭ အီၪဝ့ၫဒၪနီၪလီၫႉ လကၠၪလကၠၪ ၥၭဘၪ့ဖိၪၥံၪ အၪ့ဎၬဆီၫ့မီၪ့ဝ့ၫ ဆၧအၪ့ထၩလဖၪ ဒၪဆၧၫ့ယၫဝ့ၫအဂး လကဲၪၥ့ၪဘၪအကၠီၩ့နီၪလီၫႉ ၥၭဘၪ့ဖိၪၥံၪ ထၨၪအၥုၪ့အၥၭ ဂၭဂီၩ့ဂၭစၪအဂး ကဘၪထိးမၩထံၬထၬအၥၭနီၪလီၫႉ လၧၥၭဘၪ့ဖိၪၥံၪ အဆၧၥၭမၧၫ့ဖၧၩ့ ၥုၪ့ဆၫၥၭဆၫ အဆၧမၩလဖၪ မၩဘံၭမၩဘၧၩ့ဝ့ၫလၧ ဆၧနံမွံၫအဂး အခံၫ့အီၪဝ့ၫဒၪ ၡၩၡၩလီၫ စီၪဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ လီၩထၬဝ့ၫနီၪ ဆၧလၧၥၭဘၪ့ဖိၪၥံၪနီၪ ဂၪ့ခိၪထၧၫ့ဘံၪ့ယၫ ဆၧအၪ့လဲၩထၪ့ၥၭ ကန့အဂးႇ ဆၧမီၪ့ဎီၩ့ထၨၪဎီၩ့ဒဲ ဆၧဎူၫဆၧဎၩ့ ကအီၪအဂး အဆၧမၩၥံၪနီၪ ကဖီၪ့ထၪ့ဖံၭထၪ့ဝ့ၫအဂး အၥၭအီၪဝ့ၫဒၪနီၪလီၫႉ ဘဲၫဆၧထိးဆၧၫ့ထၬ အဆၧမၩယီၩ ၥၭဘၪ့ဖိၪၥံၪ အဂဲးအဘၭဒဲ အဆၧကိၪ့ဆၧတဲၩ့လဖၪ ဖ့ၪဆၧၫ့လၩ့ထၬဝ့ၫလါနၫ့ ဆၧလၧၫ့ဆၧဎွ့ၩ လအီၪဘၪဒံၭနီၪလီၫႉ မွဲဆၧနီၪ ဘဲၫဂၪ့ခိၪနီၪ အလိၪအီၪ ဆၧဆၧၩ့ထံၫၥိၭ ကၭၥလ့ၬ ဆၧအီၪကီၪ့ဒဲ ဂၪ့ခိၪချိၫ့ အလိၪအီၪဝ့ၫနီၪ မွဲဝ့ၫဒၪ ၥၭဘၪ့ဖိၪၥံၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ ဘၪထွ့ၫလၧ ၥၭဘၪ့ဖိၪၥံၪအဂး လခဲၫ့ကထံၪ စံၭဝ့ၫဒၪနီၪ ၥၭဘၪ့ဖိၪၥံၪ ကိၭၥၭမဲၪၥၭဖျဲၩ့ အီၪလဂ့ၩႉ ၥၫ့ဎွၩဖရၫ့စ့ၭ လီၩထဲၩ့ဝ့ၫ အရ့ၩဒိၪထုၬ အီၪကမံၩ့နီၪ ကဆါဎြံၬ အနၫ့ဆါဒၪအဝ့ၫနီၪ ယိထုၪၥၭဘၪ့ဖိၪၥံၪနီၪတၭ ၥ့ၪယၫအဝ့ၫၥံၪနီၪလီၫႉ လၧၥၭဘၪ့ဖိၪၥံၪ အၥၭခံဖၧၩ့ အီၪဝ့ၫဒၪ ဆၧလဖၪဒဲ ဆၧထိးဘၪၥၭလဖၪနီၪ ကဆါဎြံၬ ၥ့ၪယၫဝ့ၫဂီၩ့ ကဆါဎြံၬနီၪ အဲၪၥၭဘၪ့ဖိၪၥံၪ လူၬၥုၪ့လူၬၥၭ ကိၭကၠၪဒ့ၭအကၠီၩ့ ၥၭဘၪ့ဖိၪၥံၪ ဆၧၥၭမဲၪၥၭဖျဲၩ့ လအီၪဘၪတၭ ပဘၪအီၪလၧ ဆၧၥုၪ့ဒုၩၥၭဒုၭအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪ့ထၪ့ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪ နၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭ အဖၫ့ခိၪလါဆံၭႉ