ပအၪ့ကံၩ့ဘၩဆိၪဖၪဆၧအခံၫ့ ပကဘၪခၪ့ဂၬခွံၬ ဆၧကၪဆၧဂဲၩလဖၪ

ထၧၫ့ဖုဝဲထံၩၥိၭထီးအလူၬၥံၪဧ့ ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ နီၪ မွဲဝ့ၫဒၪ ပအၪ့ကံၩ့ဘၩဆိၪဖၪဆၧအခံၫ့ ပဘၪဒၪခီၩ့ ဆၧကၪဆၧဂဲၩလဖၪနီၪ ပကဘၪခၪ့ဂၬခွံၬလိၪဝ့ၫဒၪ အဂဲးအ ကၠီၩ့နီၪလီၫႉ ပအၪ့ကံၩ့ဘၩဆိၪဖၪဆၧအခံၫ့ ပၥၭလ့ၩဝံၩ့ဝၩ့ကဲၪထၪ့ၥ့ၪဝ့ၫ ႇ ပၥၭဆုးလၩ့လအီၪဘၪကဲၪထၪ့ၥ့ၪဝ့ၫ ႇ ပကဘၪအၪ့ကံၩ့ဘၩဆိၪဖၪဆၧအဂး ဆၧကၠုၪ့ဆၧဘျီၩ့ ကဲၪထၪ့ၥ့ၪဝ့ၫဒၪနီၪလီၫႉ လၧဆၧအၪ့ကံၩ့ဘၩဆိၪဖၪဖၧၩ့လီၫ လမွဲဘၪတၭ ဆၧဖံၭဆၧမၩဖၧၩ့ၥံၪနးဆ့ ပၥၭဆုးလၩ့လအီၪဘၪကဲၪထၪ့ဝ့ၫဒၪနီၪ ၦၡၩၥံၪအဆၧၥ့ၪယၫဒၪမ့ၬကအီၪ ယံၫယါဝ့ၫဒၪနီၪလီၫႉ

             ဆၧလၧၦၡၩအၥၭနီၪ ဆၧလမံၩ့လီၫအဖၫ့ခိၪ ၥၭဆုးလၩ့ကအီၪယံၬယံၬအဂး ကၪဂဲၩဝ့ၫဒၪနီၪ လီၫႉ ဆၧလၧၥၭနီၪ လ့ၩဝံၩ့ဝၩ့ အလး ကိၭစီၪ့ဒ့ၭနီၪလီၫႉ လၧ ၦၡၩၥံၪ အမံၫမးဖၧၩ့ဆ့ လ့ၩထီၩ့ဝ့ၫဒၪနီၪလီၫႉ အ့ၪပက ဆုးအီၪလၧ ပၥၭလ့ၩဝံၩ့ဝၩ့ အလးယီၩစွါဘဲၫ မွဲပမၩဆၧကန့ဂ့ၩဂ့ၩနးမံၩ့အ့ၬနီၪလီၫႉ ၥၭလ့ၩဝံၩ့ဝၩ့ယီၩနီၪ မွဲဆၧဒဲၩဘၭ အ့ၬလီၫႉ လါနၫ့ပကဘၪဒုၭဆၧၫ့ခွံၬလိၪဝ့ၫဒၪနီၪလီၫႉ ဘၪမနီၪလဲၪစွါဘဲၫ ကဆါဎြံၬကဂဲၫအခံၫ့ ပလၥ့ၪယၫဘၪ အကၠီၩ့ လၧပမၩပဆၧဖံၭဆၧမၩၥံၪအဖၫ့ခိၪ ပကဘၪအီၪလၧ ဆၧထုၪ့ၥုၪ့ထုၪ့ၥၭႇ ပကဘၪမၩ ဂ့ၩဂ့ၩဘၪဘၪ လိၪဝ့ၫ ဒၪတၡါဒ့ၭနီၪလီၫႉ

            ကကၠၪကကၠၪ ပဆၧဘၩဆိၪဖၪနီၪ ပစီၪဘၪပၥၭလၧ အခီၫပယီၫလအီၪဘၪ ႇ ဆၧမုၬဆၧလၩလအီၪဘၪ ႇ လဖ့ၪအ့ၪဘၪပၧၩ ပဂဲးပဘၭ ပၥၭစီၪကဲၪထၪ့ဝ့ၫဒၪ ဘဲၫယီၩၥိၭနီၪလီၫႉ ပၥၭအ့ၪကဲၪထၪ့ဘဲၫယီၩၥိၭစွါဘဲၫ ပကဘၪ အီၪလၧ ဆၧဆူနဲၩဖၧၩ့လိၪဝ့ၫဒၪနီၪလီၫႉ ဆၧကၠုၪ့ဆၧဘျီၩ့နီၪ ဎြံၬဖိၪၥံၪအဂး ဆၧပလၧၫ့လမံၩ့မွဲဝ့ၫလီၫႉ ပကၠုၪ့ပဘျီၩ့ အကၠီၩ့ ပဆၧဖံၭဆၧမၩအဖၫ့ခိၪ ဆၧကျ့ၭစၨၭလအီၪလၧၩ့ဘၪ ႇ  ၥုၪ့ဆုးလၩ့ၥၭဆုးလၩ့လအီၪလၧၩ့ဘၪ ႇ အီၪက့ၪထၬ ဆၧအရ့ၩဒိၪလအီၪလၧၩ့ဘၪနးမံၩ့အကၠီၩ့ ဆၧကၠုၪ့ဆၧဘျီၩ့ယီၩအကၠီၩ့ ကဲၪထၪ့ထဲၩ့ ၥုၪ့လၩ့ဂီၫ့ၥၭလၩ့ဖျီၫ့နီၪလီၫႉ ဆၧကၠုၪ့ဆၧဘျီၩ့ယီၩ မၩၥံၫနးၥၭ (၇)  မံၩ့ဖၧၩ့ ပၫဝ့ၫ လမံၩ့နီၪလီၫႉ မီၫ့ဎီၩ့လၧ ၥၭထၪ့ထီၫၥိၭလီၫ ႇ ဆၧကၠၧၫ့ဆၧဘျီၩ့ ယီၩ မၩၥံၫခွံၬ ပနးၥၭန့ဝ့ၫဒၪနီၪလီၫႉ

            လၧပအၪ့ကံၩ့ ဘၩဆိၪဖၪဆၧအခံၫ့နးဆ့ ႇ အ့ၪပဒၪခီၩ့ ဆၧကၪဆၧဂဲၩၥံၪယီၩစွါဘဲၫ ပကဘၪဒုၭဆၧၫ့အကၠီၩ့ ၥၫ့ဎွၩဖရၫ့စ့ၭ ဆၪ့ထွ့ၫထၬအ့ၪ အၥိၪၥံၪနီၪလီၫႉ ၦဆံၫ့ဎံၪၥံၪလဖၪနီၪ ဂဲၫထဲၩ့ခၪ့ဂၬဝ့ၫဘဲၫယီၩၥိၭနီၪလီၫႉ ပဝ့ၫၥံၪယီၩ ပကဘၪအီၪဂုးခၧၫ့လၧ ဆၧဘၩဆိၪဖၪဖၧၩ့ လိၪဝ့ၫဒၪနီၪလီၫႉ ၦလၧအဆၧဆူနဲၩအီၪလဂၩနီၪ အၪ့ကံၩ့ဘၩဆိၪဖၪဆၧ လအီၪဖျါထုၬဘၪဝ့ၫနီၪလီၫႉ ဘဲၫၦဆံၫ့ဎံၪယိဘၭၥိၭ ချဲၩ့ဆၧၫ့ထဲၩ့ကဆါယွၩ လၧ ဆၧဂၪ့အံၪဂၪ့အူၭဖၧၩ့အီၪလါနၫ့ ဆၧကၪဆၧဂဲၩအခံၫ့စွါဘဲၫ ကဆါယွၩနီၪ ဒီၪနါပဆၧအၪ့ကံၩ့အၪ့ယၫ အကၠီၩ့ ပကဘၪၥ့ၪယၫဝ့ၫဒၪနီၪလီၫႉ

             ပဆၧ ကၪဆၧဂဲၩအဎိၩထုၬႇ ပဆၧလူဆၧချဲၩ့ အီၪဆၧၫ့တံၩ့ ၥံၪနီၪ ယွၩဒီၪနါခိၭနၪအ့ၪပၧၩ ဘဲၫ ဖါလဂၩအဆၧအဲၪၥိၭဂီၩ့  ကထိးဆၧၫ့ဝ့ၫဘဲၫ ဆၧဆူနဲၩၥိၭႇ ဆၧဘၩဆိၪဖၪၥိၭအကၠီၩ့ ဘၪထွ့ၪလၧ ပအၪ့ကံၩ့ဘၩဆိၪဖၪဆၧအခံၫ့ ဘၪဒၪခီၩ့ၥ့ၪ ဆၧပလၧၫ့လဖၪ ပကဘၪခၪ့ဂၬဘဲၫၥ့ၪလဲၪအဂဲး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪဝ့ၫဘဲၫယီၩၥိၭအဂဲး ယရၩလၩ့ ဖ့ၪၥ့ၪယၫအ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪခၪ့ဂၬခွံၬ ဆၧပလၧၫ့လဖၪၥံၪယီၩ န့ဝ့ၫဒၪကိၭဒံၩကိၭဂၩလါဆံၭႉ