ပလကြၨၭကဲၪဘၪ ကျိၪစ့ၩႇ ဆၧထူၭဆၧလၧၫ့ႇ ဆၧစီၩ့ဆၧမၩ့ၥံၪအဎီးအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပလကြၨၭကဲၪဘၪ ကျိၪစ့ၩႇ ဆၧထူၭဆၧလၧၫ့ႇ ဆၧစီၩ့ဆၧမၩ့ၥံၪအဎီးအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ဖၧၩ့နီၪ ဆၧလၧကျိၪၥံၪႇ စ့ၩၥံၪႇ ဆၧထူၭဆၧလၧၫ့ႇ ဆၧစီၩ့ဆၧမၩ့လဖၪၥံၪယီၩ အ့ၪကဲၪထၪ့လၧ ပဆၧၥၭမၧၫ့ဖၧၩ့ အရ့ၩဒိၪစွါဘဲၫ ပဘၪထိးဖီၪ့ထၬပၥၭဂီၩ့ ပဂဲၫကဲၪထၪ့လၧ ဆၧလဖၪၥံၪယီၩအဎီးအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫ ဘဲၫယီၩၥိၭနီၪလီၫႉ

ခံၫ့ခၫဆၧၫ့ထီဘိၩ့နဲၪ့ယီၩ လၧဂၪ့ခိၪချိၫ့ဖၧၩ့ႇ လၧနဲၩ့ဎီၩ့ဖၧၩ့ ၦလၧကဲၪထၪ့ ကျိၪစ့ၩႇ ဆၧစီၩ့ဆၧမၩ့အဎီးလဖၪ ပဘၪဒၪအၪဒၪဆၧနီၪလီၫႉ ဘဲၫၦၡၩၥံၪယီၩ လၧအဂံၪ့ဒီၪ့ဖိၪၥံၪဒဲ အထံၩအၥိၭၥံၪ အဖၫ့ခိၪ အီၪက့ၪထၬအဝ့ၫၥံၪ ဘဲၫဒုၪဒၩၥိၭနီၪလီၫႉ အဝ့ၫၥံၪယီၩ လၩ့ဂၬဝ့ၫဒၪလၧ ၦအမ့ၬဘျီၪၥိၭဂီၩ့ လၩ့ၥၭမဲၪ အၪမၬဒံၭနီၪလီၫႉ

လနၩ့နၩ့နီၪ ယိလၩ့ဒၪန့ၩ အဝ့ၫၥံၪအဂးႇ အဆၧဖံၭဆၧမၩ လမံၩ့ဎးလီၫဂီၩ့ လဂၩဒဲလဂၩ မၩနၧၩ့မၩစၪႇ မၩၥံၫခွံၬလိၬၥၭနီၪလီၫႉ လၧဂၪ့ခိၪချိၫ့ဖၧၩ့ ပဘၪဒၪ ၦလၧၦၡၩအၥုၪ့အၥၭလၩ့မါ ၦၡၩ အၪဒၪဆၧနီၪလီၫႉ လၧဖးဖီၩ့ဖၧၩ့ ၦလၧအၪ့န့ဆၧမၩလိၪ လၥ့ၪဘၪၦၡၩလဖၪ အဆၧၥၭမၧၫ့ မုလၩ့နုၬအခံၫ့နီၪ အီၪထုၬခွံၬ ဆၫခိၭထံၭနီၪလီၫႉ

ၦၡၩလဂၩဒဲလဂၩ ဒၪထၪ့လိၬၥၭ ဘဲၫၦၡၩၥိၭႇ အဲၪကွံၩလိၪၥၭႇ ယၫ့ၥၭမၩဆၧၩ့လိၬၥၭ ဘဲၫၥုၪ့ၥၭဘိၩ့ယီၩၥိၭ ပအီၪက့ၪထၬပၥၭကန့အဂး ပကဘၪအီၪၥၭမၧၫ့လၧ ဆၧဘိၪ့ဆၧဘၩ အဆၧၥီၪ့ဆၧၥၫ့ဒဲ တခ့ၭၥနိၫ့ အတရၩဖၧၩ့နီၪလီၫႉ ဆၧနီၪအကၠီၩ့ ပကဘၪအၪ့န့ထၪ့ ဆၧကိၪ့ဘၪကိၪ့ၥ့ၪလၧ ဖးဖီၩ့ဖၧၩ့ဂီၩ့ ၦၡၩထီးအလူၬအဂး ပကဘၪၥုၪ့ထၪ့ ဆၧဎူၫဆၧဎၩ့အဂးႇ ပနၫ့ဆါဒၪပဝ့ၫ ဆၧဘိၪ့ဆၧဘၩ အဆၧၥီၪ့ဆၧၥၫ့နီၪ ပကဘၪအၪ့ဎၬမၩလိၪဂီၩ့ လီၩ့မၩဖိၬထွ့ၫအဂးဒဲ လဂၩဒဲလဂၩ ပကဘၪအီၪက့ၪထၬ ဆၧယၫ့ၥုၪ့ယၫ့ၥၭႇ ဆၧအဲၪဆၧကွံၩအဂး ၥၫ့ဎွၩဖရၫ့စ့ၭ အဆၧဆၪ့ထွ့ၫအီၪဝ့ၫဒၪ ဘဲၫယီၩၥိၭနီၪလီၫႉ

ပဝ့ၫၥံၪထီးအလူၬ ပဆၧၥၭမၧၫ့ဖၧၩ့နးဆ့ ကျိၪၥံၪစ့ၩၥံၪႇ ဆၧထူၭဆၧလၧၫ့ဒဲ ဆၧစီၩ့ဆၧမၩ့လဖၪနီၪ ပၥုၪ့ကွံၩၥၭကွံၩ ဖျီးလၧၫ့ဂီၩ့ မွဲပကဲၪထၪ့လၧ ဆၧလဖၪၥံၪယီၩအဎီး အဆၧမၩဖၧၩ့ ပကမၩဖျီၩ့ဖျ့ၭပၥၭတၭ ဆၧလၧဆၧအဲၪဆၧကွံၩနီၪ ပဆၧၥၭမၧၫ့ ထၧၫ့ဖျိၪ့ယၫအတိၩ့ၥၭၥိၭ ပအီၪက့ၪထၬဂီၩ့ လၧဆၧတီၩဆၧလီၩ့အဂး ပကကျ့ၭစၨၭ အီၪဂုးခၧၫ့ ကိၭကၠၪဒ့ၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ၥုၪ့ထၪ့ဆၧအဲၪဆၧကွံၩလါဆံၭႉ