ပနးၥၭကဆံၫ့ဖျ့ၫအဂးနီၪ လိၪဝ့ၫဒၪ အရ့ၩဒိၪနဲၪ့န့ ပမိၡါဆၧဆံၫ့ဆၧဖျ့ၫကအီၪအဂးလီၫႉ

လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧႉႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အနိၫ့ အဆၧရၩ လၩ့ဖၧၩ့ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪနီၪမွဲဝ့ၫဒၪ ပကဘၪအီၪက့ၪထၬ ပနးၥၭ ဆံၫ့ဆံၫ့ဖျ့ၫဖျ့ၫနီၪ အရ့ၩဒိၪနဲၪ့န့ ပအီၪက့ၪထၬ ပမိၡါဆံၫ့ဆံၫ့ဖျ့ၫဖျ့ၫ အကၠီၩ့နီၪလီၫႉ လၧလံၬဆံၫ့ဎံၪ စမၫကၧၭ ( 7:2-5 ) ဖၧၩ့ ၦဖၫရစံၫၥံၪဒဲ ၦကွ့ၭလံၬၥံၪလနၩ့နၩ့ ဒၪကဆါဎြံၬအထံၩအဖျဲၥံၪ အၪ့ကိၪလၧ လၥူၫဝၭဆံၫ့ဘၪ အစူၪအကၠီၩ့ အီၪက့ၪထၬကဆါဎြံၬအထံၩအဖျဲၥံၪ လၧ အဝ့ၫၥံၪ အဆၧမၪ အီၪအကၠီၩ့နီၪလီၫႉ

          ၦမွံၩၦၡါၥံၪ လီၩဆိၩလၬဆိၩထၬ ဆၧချဲၩ့အီၪဝ့ၫနီၪ လချုၭ ပလအၪ့ဒံၭဘၪ ဆၧအၪ့လမံၩ့မံၩ့ ပကဘၪ အၪ့ၥူၫဝၭဆံၫ့ ၦစူၪဂီၩ့မၬ ပကဘၪအၪ့ အကၠီၩ့နီၪလီၫႉ ပကအၪ့ထီဆၧလမံၩ့မံၩ့ ပအၪ့ၥူၫဝၭ ဆံၫ့ပစူၪနီၪ မွဲဝ့ၫ ဆၧဖံၭဆၧမၩအဂ့ၩလါနၫ့ ပအၪ့ၥူၫဝၭဆံၫ့ပစူၪအ့ၬဂီၩ့ ပအၪ့စွါဘဲၫ လကဲၪထၪ့ဘၪ ဆၧအအၧၩ့နီၪလီၫႉ ကဆါဎြံၬဒဲ အထံၩအဖျဲၥံၪ လခိၭနၪဘၪ ၦမွံၩၦၡါၥံၪ လီၩဆိၩလၬဆိၩထၬ ဆၧချဲၩ့နီၪ ဘၪနီၪလဲၪ ႉ ကဆါဎြံၬနီၪ လယိဘၪ ၦၡၩၥံၪ မၩထၪ့ဖျီၪ ဆၧဖံၭဆၧမၩၥံၪအဖၫ့ခိၪဂီၩ့ ယိဝ့ၫဒၪမွဲ ၦၡၩၥံၪ အီၪက့ၪထၬ အၥုၪ့အၥၭ ဘဲၫၥ့ၪလဲၪနီၪလီၫႉ လၧပမိၡါ ပဖံၭခိၪဖၧၩ့ ပအီၪက့ၪထၬ ဆၧကၠၧၩ့ဆၧကၠီၩ ဎံၫဎံၫလၩလၩဂီၩ့  လၧပၥၭခံဖၧၩ့ ပအီၪက့ၪထၬဆံၫ့ဆံၫ့ ဖျ့ၫဖျ့ၫအ့ၬ စွါ ဘဲၫ ကဆါဎြံၬ လအဲၪဒိၭ ဘၪဂီၩ့ ပလမွဲဘၪ ကဆါဎြံၬ အထံၩအဖျဲနီၪလီၫႉ

          ထၧၫ့ဖုဝဲထံၩၥိၭၥံၪဧႉ ႇ ပဝ့ၫၥံၪကိၭဂၩနးဆ့ ပယိဝ့ၫဒၪၥ့ၪ ၦၡၩၥံၪအဖံၭခိၪ ပဖံၭခိၪနီၪလီၫႉ လၧပဘိၪ့ထၪ့ ဘၩထၪ့ယွၩဖၧၩ့နးဆ့ ဘဲၫၦၡၩၥံၪဒၪပၧၩ ဆၧန့ဂဲးန့ဘၭ ကအီၪအဂး ပဖ့ၪနဲၪအ့ၪ ၦဂူၫဂၩၥံၪ ပဆၧဘိၪ့ထၪ့ ဘၩထၪ့ အဂဲးအဖးၥံၪနီၪလီၫႉ ပဘိၪ့ထၪ့ဘၩထၪ့ယွၩနီၪ ကဘၪမွဲဝ့ၫ ႇ ကဘၪအီၪဂဲၫကဲၪထၪ့ဝ့ၫလၧ ပဆၧဆူနဲၩယွၩအီၪဖၧၩ့ နီၪလီၫႉ လၧပဆၧ ဘိၪ့ထၪ့ဘၩထၪ့ယွၩဖၧၩ့ အ့ၪပကအီၪၥုၪ့လၩ့ထၬဝ့ၫဒၪလၧ ဆၧဖံၭခိၪ အဆၧယိကဎံၫလၩ အဂး လီၫစွါ ဘဲၫ ပဆၧဖံၭဆၧမၩ ယီၩ ပဝ့ၫၥံၪဒဲယွၩ အဆၧဆုးကျိၭ အဂး ကကဲၪထၪ့ဝ့ၫဒၪ ပလၧၫ့မၩထံၭထၬဆၧ အဆၧမၩနီၪလီၫႉ ကဆါဎြံၬအဲၪဒိၭ ၦၡၩၥံၪ အဆၧဘိၪ့ထၪ့ဘၩထၪ့နီၪ ကဘၪအီၪဂဲၫထၪ့လၧ ၦၡၩၥံၪ အၥၭခံဖၧၩ့ နီၪလီၫႉ

          ထၧၫ့ဖုဝဲထံၩၥိၭၥံၪဧႉႇ လၧပမိၡါဖၧၩ့ ဆၧလဂ့ၩဆၧလဘၪထီးအလူၬနီၪ မွဲဂဲၫနုၬလၩ့လၧ ခီၫ့လခီၫမွဲအ့ၬ ႉ အီၪဂဲၫစဲၪ့ထၪ့လၧ ပၥၭခံဖၧၩ့နီၪလီၫႉ ပၥၭစီၪဝ့ၫၥ့ၪခိၭမၬခိၭမၬ လၧပအီၪ ဆၧအၧၩ့ ဆၧၥၫ့ ဘၪကဲၪထၪ့နီၪ မွဲဝ့ၫ ၦနီၪအကၠီၩ့ ႇ ၦယီၩအကၠီၩ့ ႇ ခရၧၫ့နီၪအကၠီၩ့ ႇ ထံၫခးအနီၪအကၠီၩ့ ပစံၭၥ့ၪဝ့ၫဒၪ ၦဂူၫဂၩၥံၪအကၠီၩ့ ဆၧအၧၩ့ဆၧၥၫ့ နီၪ ဘၪကဲၪထၪ့လၧ ပအီၪ ဘဲၫယီၩၥိၭ ခိၭမၬခိၭမၬ ဒ့ၭနီၪလီၫႉ ပစံၭဝ့ၫဒၪန့ၫ ၦဂူၫဂၩၥံၪ အဆၧမၪလီၫဂီၩ့ ပၥၭထၪ့ ၦဂူၫဂၩၥံၪနီၪလီၫႉ ပဖ့ၪအ့ၪအခံၫ့လၧ ပလီၩဖျီၪထၪ့ ၦဂူၫဂၩၥံၪ အဆၧမၪနီၪ မွဲဝ့ၫ ပမၩလူၬဂီၩ့လူၬစၪအခံၫ့ အဆၧမၩလီၫႉ လၧပၥၭခံဖၧၩ့ ပၥၭထၪ့ ကဲၪထၪ့စွါ ဘဲၫ မီၫ့ဎီၩ့ဝ့ၫဒၪလၧ ပမၩယဲၩ့ထၪ့ပၥၭလၧယွၩအီၪနီၪလီၫႉ လၧပၥၭခံဖၧၩ့ ပကအီၪက့ၪထၬဝ့ၫဒၪန့ၫ ၦဂူၫဂၩၥံၪအဆၧမၪ ႇ ပကဂဲးလိၬတ့ၭလိၬၥၭလၧ ၦဂူၫဂၩၥံၪလီၫစွါ ဘဲၫ ပကထိးဆၧၫ့ကဆါဎြံၬအဂး အလးလအီၪ ဘၪနီၪလီၫႉ ပလီၩဝ့ၫဒၪန့ၫ ၦဂူၫဂၩၥံၪအဆၧမၪ ဆၧအစုၪယီၩ မၩထၪ့ပၥုၪ့ပၥၭဂီၩ့ ပကလ့ၩလၧ ယွၩအီၪအဂး ဆၧဖၭဘံၭထၬတရၫ့ အဆၧမၩလမံၩ့ မွဲဝ့ၫဒၪနီၪလီၫႉ

          မွဲဆၧနီၪ ပလမၩလူၬခွံၬ ဘၪအခံၫ့လၧ ပချဲၩ့ ၦၡၩအဆၧမၪအဂဲး အဂး ႇ လၧပၥၭခံဖၧၩ့ ဆၧလဖၪၥံၪယီၩ ကစဲၪ့ထၪ့ခွံၬအဂး ပက ဘၪအၪ့ကံၩ့ ဂဲး ဘၭလၧ ကဆါယွၩအီၪအကၠီၩ့ ႇ ယွၩကမၩဆံၫ့ခွံၬအ့ၪ ပၥုၪ့ပၥၭအဂး ပက ဘၪ အၪ့ကံၩ့ ဘၩဆိၪဖၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ ဆၧၥၫ့ အီၪဝ့ၫ ဘဲၫယီၩၥိၭအဂဲး ယရၩလၩ့ဖ့ၪၥ့ၪယၫ အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့ နီၪလီၫႉ