ပဆၧၥၭမၧၫ့ဖၧၩ့ ပကဘၪအီၪၥၭမၧၫ့ဘဲၫ ထၧၫ့ဖုထၧၫ့ဝဲၥိၭအဂဲး

ဆၧအဲၪဆၧကွံၩဖၧၩ့ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပဆၧၥၭမၧၫ့ဖၧၩ့ ပကဘၪအီၪၥၭမၧၫ့ဘဲၫ ထၧၫ့ဖုထၧၫ့ဝဲၥိၭအဂဲး အကၠီၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬၥံၪဧ့ႇ ပဝ့ၫၥံၪယီၩ မွဲဝ့ၫဒၪ ထၧၫ့ဖုထၧၫ့ဝဲ အထိးဆၧၫ့ဒိၭန့ဘၪ ဖါကဆါယွၩလဂၩဎး အဆၧအဲၪဆၧကွံၩလဖၪနီၪလီၫႉ ပဝ့ၫၦၡၩၥံၪယီၩ ပကဘၪၥုၪ့ထၪ့ ဆၧယၫ့ၥုၪ့ယၫ့ၥၭ ထီလၧယၫအဂးႇ ဆၧလမီၪ့ဎီၩ့ဘၪၥံၪ ပခၫ့ဂၬခွံၬကန့အဂးႇ ဆၧဎူၪဆၧဎၩ့ ကဂုးထၪ့အၪထၪ့အဂး ပကဘၪဖီၪ့ထၪ့ဖံၭထၪ့ ဆၧမၩထဲၩ့ဎုၬလိၬၥၭ လိၪဝ့ၫဒၪနီၪလီၫႉ လဂၩဘၪလဂၩ ပကဘၪထိးဆၧၫ့လိၬၥၭႇ ပကဘၪကၧၩ့ဖျိၪ့ထၬပၥၭ ဘဲၫထၧၫ့ဖုထၧၫ့ဝဲၥိၭဂီၩ့ ပကဘၪလ့ၩဆၧ ကၠၧၫ့ကၠၧၫ့အဂး လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပကဲၪဎြံၬဖိၪလဂၩယီၩ မုဎိၩနံၩနီၪ ပအီၪက့ၪကီၪ့ပၥၭ မီၪ့ဎီၩ့ဂီၩ့ မံဆၩဆၧလုထၪ့ဆံၫ့ဎံၪဖၧၩ့ ကဆါဎြံၬအဆၧဘၩဆိၪဖၪနီၪ ပအၪ့က့ၩဘၩဆိၪဖၪကၠၧၫ့ကၠၧၫ့ မွဲဝ့ၫ ပဖါလၧအီၪလၧမူၭခိၪအခံၫ့ဒဲ ပဒိၭန့အၪ့ ကိၪဘိၪ့ဆံၪ့ဎံၪအခံၫ့ ဆၧအခံၫ့လဖၪနီၪ မၩၥ့ၪယၫနၪ့ထၪ့အ့ၪပဝ့ၫၥံၪ ထီးအလူၬနီၪ လၧကဆါယွၩအမ့ၬယၫ ပမွဲဝ့ၫ ထၧၫ့ဖုထၧၫ့ဝဲၥံၪနီၪလီၫႉ မွဲဆၧနီၪ ပဆၧဆူၩနဲၩ ဆၧဘၩဆိၪဖၪဖၧၩ့ ပနးၥၭဂဲးဘၭ ကန့ထၪ့အဂး ပကဘၪကျ့ၭစၨၭနီၪလီၫႉ ပနဲၩ့ပဎီၩ့ ၦၡၩလဖၪၥံၪ ပကဘၪဖ့ၪဂဲးဖ့ၪဘၭႇ ပကဘၪယၫ့ၥၭမၩဆၧၩ့ ဘဲၫပထၧၫ့ဖုထၧၫ့ဝဲၥိၭနီၪလီၫႉ ဆၧလဖၪၥံၪယီၩ ပမၩကဲၪထၪ့ဆၧအဖၧၩ့ မွဲကဆါယွၩအစီၩ့အမၩ့ ကဎိၩထၪ့ဒိၪထၪ့အဂး ပကကျ့ၭစၨၭလါဆံၭႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬႇ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪလၧ နၥံၪကိၭဂၩဒ့ၭအဖၫ့ခိၪလါဆံၭႉ