ပကြၨၭအီၪလၧဆၧဘၩဆိၪဖၪဖၧၩ့အဆိၩဆိၩအကၠၪကၠၪအဂဲး

    လၧဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးလူၬၥံၪဧ့ ႇ မုကနံၩယီၩ ယအဲၪဒိၭရၩ လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭအဆၧၥီၫ့ဆၧၥၪ့နီၪ မွဲဝ့ၫဒၪ ၦၡၩၥံၫအဆၧၥၭမၧၫ့ဖၧၩ့ ဆၧအၪ့ကံၩ့ဘၩဆိၪဖၪနီၪ အရ့ၩဒိၪအီၪထၨၪ မုလဲၪအဂဲးအကၠီၩ့နီၪလီၫႉ ကဆါဎြံၬ အနၫ့ဆါဒၪအဝ့ၫနးဆ့ လၧဆၧ ဘၩဆိၪဖၪဖၧၩ့ အီၪက့ၪထၬၥၭအဆၧဂုးခၧၫ့ အဆိၩအ ကၠၪနီၪလီၫႉ လၧလံၬဆံၫ့ဎံၪဖၧၩ့နးဆ့ ဘၪထွ့ၪလၧ ဆၧဘၩဆိၪဖၪအဆၧဒီၩ့လၩ့လဖၪ မွဲဝ့ၫ “ မုနၩလခီၫ ၦမွံၩဂဲၫထီၩ့အကၠီၩ့ ၦမွံၩကအၪ့အဂး လ့ၩအၪ့ကံၩ့ဆၧအၪ့လၧ အထံၩၥိၭအဂံၪ့”အဂဲး အကၠီၩ့နီၪလီၫႉ

   ပလိၪမနီၪလဲၪနီၪ ဖါကဆါယွၩ ၥ့ၪယၫဝ့ၫဒၪ အကၠီၩ့ ၊ ပလိၪလဖၪပအၪ့ကံၩ့ အၪကၠၪအၪဘျၩ့နီၪ ဘဲၫဖါကဆါယွၩ ကၥ့ၪယၫ ပအလိၪၥိၭ ဒဲ ယွၩကထိးဆၧၫ့ ပဆၧအၪ့ကံၩ့အၪ့ယၫအဂးမွဲအ့ၬ ႉ ပအလိၪလဖၪ ဒဲ ပဆၧယိလါၥံၪ ပကဘၪမၩ ဎိၩထၪ့ဒိၪထၪ့ မွဲဝ့ၫဒၪနီၪလီၫႉ လၧ ဆၧတီၩဆၧလီၩ့လအီၪဘၪ ၦစ့ၩရၫ့ဆၧ အဆၧဒီၩ့ လၩ့ဖၧၩ့နီၪနးဆ့ ပအီၪက့ၪထၬပဆၧဆူနဲၩလၧ ယွၩအီၪနီၪ လမွဲဘၪကဆိကလး အဂးအကၠီၩ့ နီၪလီၫႉ

   ဆၧချဲၩ့ဒီၩ့လၩ့ ဘၪဆဲၫ့လၧ ၦဖၫရစံၫ ဒဲ ၦအၪ့ကံၩ့အခီၫ့ ဖၧၩ့နီၪနးဆ့ ယွၩနီၪ လခိၭနၪဘၪၦၡၩၥၭ အဆၧထၪ့ထီၫအီၪ အဆၧအၪ့ကံၩ့အၪ့ယၫလါနၫ့ ခိၭနၪ ၦဆၧဆၪ့ လၩ့ၥုၪ့ၥၭအီၪ အဆၧအၪ့ကံၩ့ အၪ့ယၫနီၪလီၫႉ ဆၧဆၪ့လၩ့ၥုၪ့ၥၭလအီၪဘၪဂီၩ့ ပအၪ့ကံၩ့ ဘၩဆိၪဖၪဆၧစွါဘဲၫ လမွဲဘၪ ဆၧအၪ့ကံၩ့ဘၩဆိၪဖၪအတီၩအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့အီၪဝ့ၫဒၪနီၪလီၫ ႉ

   လၧဂၪ့ခိၪချိၫ့ဖၧၩ့ယီၩ ဆၧအမံၩ့အစံၩ့နီၪ ဂုးခၧၫ့ဝ့ၫအဆိၩအကၠၪ လအီၪဘၪနးမံၩ့အကၠီၩ့ ပကဘၪ အၪ့ကံၩ့ဘၩဆိၪဖၪဆၧ လိၪဝ့ၫဒၪတၡါဒ့ၭနီၪလီၫႉ ၦအၪ့ကံၩ့ဘၩဆိၪဖၪ ဆၧအခံၫ့ ဎြံၬကဆါနီၪ အီၪလၧပၧၩ ကၠၧၫ့ကၠၧၫ့အကၠီၩ့  ဆၧမၩယီၩမွဲဝ့ၫ ၥၭမုဆံၫ့ဎံၪ အဆၧမၩအကၠီၩ့ ၊ ဎြံၬဖိၪလၧ အၪ့ကံၩ့ ဘၩဆိၪဖၪဆၧလဂၩနီၪ လၥၭမဲၪ ဘၪဆၧနးမံၩ့ အကၠီၩ့ ၊ ဆၧလၧၦၡၩလဖၪၥံၪနီၪ မၩကဲၪထၪ့ဆၧ ထီးလူၬထီးဆံၫ့ လန့ဘၪတၭ ပဘၪ ဒိၭနဲၩပၥၭလၧယွၩအီၪ မွဲဝ့ၫအကၠီၩ့ ၊ ဎြံၬကဆါနီၪ မွဲဝ့ၫၦၡၩၥံၪထီးအလူၬ အခိၪနါတၭ အီၪလၧပဆူၭပကျၩ ဂီၩ့ ပအၪ့ကံၩ့ဘၩဆိၪဖၪဆၧအခံၫ့ အီၪလၧပၧၩကၠၧၫ့ကၠၧၫ့အကၠီၩ့ ၊ မွဲဆၧနီၪ ၦအၪ့ကံၩ့ ဘၩဆိၪဖၪ ဆၧ ဎြံၬဖိၪလဂၩနီၪ လဘၪၥၭမဲၪဘၪဆၧနးမံၩ့ အကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭအဂဲး ယရၩလၩ့ဖ့ၪၥ့ၪယၫ အ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ

 

 

Add new comment

3 + 11 =