ပကဘၪၥုၪ့ထၪ့ ဆၧဆၧးဎံၫဆၧးလၩ လၧဆၧဎူၫဆၧဎၩ့ဖၧၩ့အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪၥုၪ့ထၪ့ ဆၧဆၧးဎံၫဆၧးလၩ လၧဆၧဎူၫဆၧဎၩ့ဖၧၩ့အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လမွဲဘၪ ဆၧမၩဆီၪ့မၩနီၩ့ဆၧ ဆၧလီၩဆၧချဲၩ့ႇ ဆၧမၩၥုၪ့မၩၥၭဒဲ ဆၧအီၪဆၧလးလဖၪၥံၪယီၩ ဆၧလမံၩ့မၬ လဆိၫ့ခွံၬဘၪဂီၩ့ ဆၧကိၭမံၩ့ကိၭဆံၩ့အဂး မွဲဝ့ၫ ဆၧၥၭအီၪအဂ့ၩဒိၪဆၧနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့ႇ နံၫ ၂၀၂၃နံၫယီၩ ၥၫ့ဎွၩဖရၫ့စ့ၭ အဆၧဘၩဆိၪဖၪ ဆၧထိစိၩနီၪ မွဲဝ့ၫဒၪ လမွဲဘၪ ဆၧမၩဆီၪ့မၩနီၩ့ဆၧ ဆၧဆၧးဎံၫဆၧးလၩကန့အဂးနီၪလီၫႉ လၧဖီၩ့ခွံၬ နံၫ ၆၀ခီၩဒၪအိၩ ၦဆံၫ့ဎံၪ ဂၠိၫပီၩ (၂၃) အလံၬဖ့ၪစဲၪ “Pecem in Terri`s”ဖၧၩ့နီၪ ကွ့ၭထၬဝ့ၫ မွဲဝ့ၫဒၪ  ဆၧလၧဆၧဒုၭဆၧယၩနီၪ မွဲဝ့ၫဒၪ ဆၧဂီၩ့စိၩၥၭနီၪလီၫႉ ၦဆံၫ့ဎံၪလီၩထးထၬဝ့ၫဒၪနီၪ ဆၧလၧဆၧဒုၭဆၧယၩယီၩ ဆၧမိဆီၫ့မီၪ့အၪ့ဎၬပၥၭ နးဆံၭအ့ၬအကၠီၩ့ လီၩထးထၬဝ့ၫဒၪနီၪလီၫႉ တခၩဒၪ ဆၧဒုၭဆၧယၩႇ ဆၧစူၪဝဲၩဒၪဆၧၫ့ယၫနးမံၩ့ ထီးအလူၬနီၪ လခဲၫ့ထုၬကကၠၪ အီၪထုၬခွံၬအၥၭလၧ အစၪ ကိၭကၠၪဒ့ၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ လီၩထၬဝ့ၫနီၪ မွဲပကၥုၪ့ထၪ့ကၠၭ ဆၧဆၧးဎံၫဆၧးလၩလၧ အအီၪလၧ ဆၧဎူၫဆၧဎၩ့နီၪလါဆံၭႉ ပဘၪဒၪဆၧၫ့ယၫ ဆၧဒုၭဆၧယၩလါနၫ့ ပကအီၪပဒၩ့ထၬ ပနၫ့ဆါဒၪပဝ့ၫတၭ ဆၧဎူၫဆၧဎၩ့နီၪ ပကအီၪက့ၪထၬ အခၪ့ထံၭဆၧထိမၩဂီၩ့ ၥုၭစူၪဝဲၩၥံၪ အ့ၪလအီၪဘၪမၬ ဆၧဎူၫဆၧဎၩ့ အဂုးခၧၫ့အဆၧၩ့ထီၫ ကဲၪထၪ့ဝ့ၫကန့နီၪ ပကထုၪ့ၥုၪ့ထုၪ့ၥၭလါဆံၭႉ

ပဆၧၥၭမၧၫ့မုကိၭနံၩဒ့ၭဖၧၩ့ လကၭဒံၭဘၪ ဆၧဖံၭထံၩဖံၭၥိၭလၧ ဂၪ့ခိၪချိၫ့ထံၫခးလဖၪဖၧၩ့ လမွဲဘၪ ဆၧမၩဆီၪ့ဆၧဖံၭမၩနီၪ ပအီၪက့ၪထၬကိၭ ဆၧနဲၪစိၩဝ့ၫၥိၭလါဆံၭႉ လမွဲဘၪ ဆၧမၩဆီၪ့ ဆၧဆၧးဎံၫဆၧးလၩ ကဂုးထၪ့အၪထၪ့လၨၪအဂး ပကအၪ့က့ၩဘၩဆိၪဖၪဆၧလါဆံၭႉ လၧထံၫၥံၪခးၥံၪဖၧၩ့ ၦၡၩၥံၪ ဒိၭနဲၩ့ၥၭလၧ စူၪဝဲၩႇ ၥိၩ့ထၪ့စူၪဝဲၩ အ့ၪလၩ့ၡၩမၬ ဆၧဎူၫဆၧဎၩ့ ကဂုးထၪ့အၪထၪ့အကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪထၪ့ အီၪဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬႇ ၥုၪ့ထၪ့ဆၧဎူၫဆၧဎၩ့လါဆံၭႉ