ပကဘၪအၪ့နၩ့ဖ့ၪအ့ၪ ဆၧအဂုးအခၧၫ့လၩ့ဆိၩလၩ့ကၠၪအဂဲး

ဆၧအဲၪဆၧကွံၩဖၧၩ့ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအၪ့နၩ့ဖ့ၪအ့ၪ ဆၧအဂုးအခၧၫ့လၩ့ဆိၩလၩ့ကၠၪအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဖါကဆါယွၩဒဲ ပနဲၩ့ပဎီၩ့ ၦၡၩၥံၪအဖၫ့ခိၪ ပအီၪက့ၪထၬ ဆၧအဲၪဆၧကွံၩနီၪ မီၪ့ဎီၩ့ဝ့ၫဒၪလၧ ပဆၧၥၭမၧၫ့ လၧခဲၫ့ထုၬကနံၩ ပကနုၬလၩ့ လၧမူၬခိၪဘၩ့မုးကန့အဂး မွဲဝ့ၫဒၪ စူၪမုခၫ့ဂၬထံၫခးနီၪလီၫႉ လၧဂၫ့ခိၪချိၫ့ဖၧၩ့ ဂၪ့ခိၪဆၧထူၭဆၧလၧၫ့လဖၪနီၪ ကလၩ့မၬခွံၬဘဲၫ ဖံၬမုၬပြံၩပြၩၥိၭနီၪလီၫႉ လါနၫ့ လၧပဂံၪ့ဒီၪ့ႇ လၧပဆၧမၩလးႇ လၧပဆၧအီၪကီၪ့ဒဲ လၧဂၫ့ခိၪချိၫ့ဖၧၩ့ ဆၧအဲၪဆၧကွံၩ လၧပအၪ့နၩ့ဖ့ၪအ့ၪ ၦဂူၫဂၩၥံၪနီၪ ထိးထဲၩ့တၩ့ထဲၩ့ပဝ့ၫၥံၪဂီၩ့ မွဲဝ့ၫပကန့ထၪ့ မူၬခိၪဘၩ့မုးအဂုးအခၧၫ့ အဆိၩအကၠၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫ ဘဲၫယီၩၥိၭနီၪလီၫႉ

မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဖါကဆါယွၩ အဖၫ့ခိၪ ပအီၪက့ၪထၬ ပဆၧအဲၪဆၧကွံၩ ကန့အဂး လံၬဆံၫ့ဎံၪနီၪ မုကိၭနံၩဒ့ၭ ပကဘၪဖီဂီၩ့ ပကဘၪအၪ့က့ၩဘၩဆိၪဖၪဆၧ လိၪဝ့ၫဒၪနီၪလီၫႉ ပအီၪက့ၪထၬ ပဆၧအဲၪဆၧကွံၩလၧ ပနဲၩ့ပဎီၩ့ၦၡၩၥံၪနီၪ ဘဲၫကဆါဎြံၬ ၥီၪ့ၥၫ့ထၬၥိၭ ၦအလိၪဆၧမၩဆၧၩ့လဖၪၥံၪႇ ၦဘၪဒၪဆၧကၪဆၧဂဲၩလဖၪၥံၪနီၪ ပယိထွ့ၫမၩဆၧၩ့ လၧဆၧအဲၪဆၧကွံၩ ဎိၩဒိၪဖၧၩ့နီၪလီၫႉ ဆၧမၩလဖၪၥံၪနီၪ ပမၩဘဲၫနီၪမၬ မွဲကန့ထၪ့ မူၬခိၪဘၩ့မုးဆၧထိးထဲၩ့တၩ့ထဲၩ့နီၪလီၫႉ မွဲဆၧနီၪ ပဆၧၥၭမၧၫ့ မုကိၭနံၩဒ့ၭဖၧၩ့ ပကကျ့ၭစၨၭအီၪၥၭမၧၫ့ ဘဲၫၥၫ့ဎွၩဖရၫ့စ့ၭ ၥီၪ့ၥၫ့ထၬၥိၭဂီၩ့ ပဆၧၥၭမၧၫ့ လခဲၫ့ထုၬကနံၩခိၭ မွဲပကန့ထၪ့ မူၬခိၪဘၩ့မုး ဆၧထိးထဲၩ့တၩ့ထဲၩ့အဂး ပကထုၭဂဲးထုၭဘၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ကဆါယွၩအဆၧအဲၪဆၧကွံၩ လၩ့ယွၩဝ့ၫဒၪလၧနၥံၪကိၭဂၩဒ့ၭ အဖၫ့ခိၪလါဆံၭႉ