ပကဘၪအၪ့န့ ဆၧအၪ့လဲၩထၪ့အၥၭ လၧယွၩအဆၧအဲၪဆၧကွံၩဖၧၩ့အဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအၪ့န့ ဆၧအၪ့လဲၩထၪ့အၥၭ လၧယွၩအဆၧအဲၪဆၧကွံၩဖၧၩ့အဂဲးအကၠီၩ့နီၪလီၫႉ ပကဲၪဘၪကဆါဎြံၬ အထံၩအဖျဲ, အဖိၪအဒံၪဒဲ ပအီၪၥၭမၧၫ့ဝ့ၫဒၪလၧ ဖၧၩ့ၥၭအဆံၫ့အဖျ့ၫဖၧၩ့နီၪ မွဲဝ့ၫဒၪ ဖါကဆါယွၩ အဆၧအဲၪဆၧကွံၩလီၫႉ ပကဘၪအၪ့န့ထၪ့ ဆၧအၪ့လဲၩထၪ့ပၥၭလၧ ဆၧအဲၪဆၧကွံၩဖၧၩ့ယီၩမွဲဝ့ၫအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ပန့ထၪ့ထၬဘၪ ဎြံၬဖိၪအဆၧၥၭမၧၫ့ယီၩနီၪ မွဲဝ့ၫဒၪ ကဆါယွၩအခိးအတၩလီၫႉ ဆၧအခိးအတၩယီၩ ယွၩအဆၧအဲၪဆၧကွံၩအကၠီၩ့ ပၥ့ၪယၫဘၪယွၩ အခွးအယါဒဲ ပအီၪက့ၪထၬန့ ပဆူနဲၩလၧယွၩအီၪ ဘဲၫယီၩၥိၭနီၪလီၫႉ ပၥ့ၪယၫဘၪယွၩ, ပအီၪက့ၪထၬဘၪ ပဆၧဆူနဲၩလၧယွၩအီၪ ဘဲၫယီၩၥိၭအကၠီၩ့ ပကန့ထၪ့ဘၪ ဆၧထိးထဲၩ့တၩ့ထဲၩ့မွဲအ့ၬႉ ပကန့ဘၪဆၧထိးထဲၩ့တၩ့ထဲၩ့အဂးနီၪ ပဝ့ၫဒၪပၧၩ ပကဘၪကျ့ၭစၨၭလိၪဝ့ၫဒၪ တၡါဒ့ၭ နီၪလီၫႉ ဘၪဆၧကွ့ၭထၬဝ့ၫလၧ လံၬဆံၫ့ဎံၪစယ့မံၭ (2: 14-16) ဖၧၩ့ အီၪဝ့ၫဘဲၫယီၩၥိၭနီၪလီၫႉ “ယထၧၫ့ဖုဝဲၥံၪဧ့, ၦအ့ၪစံၭဝ့ၫ အီၪလၧဆၧနဲၩလဂၩဂၩတၭ, အ့ၪလအီၪဘၪလၧဆၧမၩနီၪ မွဲအန့ကဲၩ့န့ကၩဆၧနီၪလမံၩ့လဲၪႉ ဆၧနဲၩနီၪ ထိးထဲၩ့တၩ့ထဲၩ့ အဝ့ၫဘၪမိၥံၪဧၪႉ”

ထၧၫ့ဖုဝဲထံၩၥိၭထီးအလူၬၥံၪဧ့, ပကဘၪထိးဆၧၫ့ ယွၩကဖ့ၪဘၪ ဆၧအၪ့လဲၩထၪ့အၥၭနီၪလီၫႉ ယွၩဖ့ၪအ့ၪဘၪ ဆၧအၪ့လဲၩထၪ့ အခွးအယါ ပကဘၪထိးဆၧၫ့ လိၪဝ့ၫဒၪ တၡါဒ့ၭနီၪလီၫႉ မွဲဆၧနီၪ, ပကကဲၪဘၪ ကဆါဎြံၬ အထံၩအဖျဲအဂး ဆၧအၪ့လဲၩထၪ့အၥၭ အတီၩအလီၩ့ဒဲ  ပကဘၪၥ့ၪယၫ ပကဘၪအၪ့လဲၩထၪ့ပၥၭ မနီလဲၪအဂးနီၪလီၫႉ မွဲဆၧနီၪ, ထၧၫ့ဖုဝဲထံၩၥိၭထီးအလူၬၥံၪဧ့, လၧပဆၧၥၭမၧၫ့ မုကိၭနံၩဒ့ၭဖၧၩ့ ပလကြၨၭ အီၪက့ၪဂုးခၧၫ့ထၬဘၪပၥၭလၧ ဆၧလၧၫ့ဎွ့ၩယူၭ အဖၫ့ခိၪဂီၩ့ ပကဘၪယိခွါလၩ့ပၥၭ, ပကဘၪအၪ့လဲၩထၪ့လၩ့ပၥၭ မနီအီၪလဲၪနီၪလီၫႉ လကၭဒံၭဘၪ ပကဘၪထိးဆၧၫ့ ကဆါယွၩဖ့ၪအ့ၪပၧၩ ဆၧအၪ့လဲၩထၪ့ၥၭအဂဲးအကၠီၩ့ ၥၫ့ဎွၩဖရၫ့စ့ၭ အဆၧဆၪ့ထွ့ၫဆၧချဲၩ့ အီၪဝ့ၫ ဘဲၫယီၩၥိၭအဂဲး ယရၩ့လၩ့ဖ့ၪအ့ၪၥ့ၪယၫဘၪနၥံၪ လၧဆၧအဲၪဆၧကွံၩဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩအဆၧအဲၪဆၧကွံၩ ကိၭဒံၭကိၭဂၩလါဆံၭႉ