ပကဘၪအဲၪလိၬကွံၩလိၬၥၭ လဂၩဒဲလဂၩအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအဲၪလိၬကွံၩလိၬၥၭ လဂၩဒဲလဂၩအဂဲး အကၠီၩ့နီၪလီၫႉ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ၦလၧအၪ့န့ထၪ့ထၬ ကဆါဎြံၬအလးႇ ၦယူၬၥိၪအလး မွဲဝ့ၫ ၥၫ့ဎွၩဖရၫ့စ့ၭ အဆၧအဲၪဆၧကွံၩႇ အဆၧဆၪ့လၩ့ၥုၪ့ဆၪ့လၩ့ၥၭဖၧၩ့ ၥူၫဝၭ ၦခမျၧးၥံၪအခၪ့ဂီၩ့ နၧၩ့မၧၫ့ဝ့ၫ အဆၧနၧၩ့မၧၫ့နီၪ ဂၪ့ခိၪထၧၫ့ဖျိၪ့ယၫ ခိၪနါလဖၪၥံၪ ထီးအလူၬႇ ပဝ့ၫၦၡၩၥံၪ ထီးအလူၬ ပကြၨၭအၪ့န့ထၪ့ ဆၧဒီၩ့ဆၧထ့ၬႇ ပကြၨၭလီၩ့မၩဖိၬထွ့ၫဝ့ၫ ပၩရမံၫမွဲဝ့ၫလီၫႉ

ဘၪမနီၫလဲၪစွါဘဲၫ ၥၫ့ဎွၩဖရၫ့စ့ၭနီၪ အၥၭဆုးလီၩ့အီၪလၧ ဆၧဒဲၭဘၭဖိၪႇ ၦအဘၪထိးပဲၩထၬၥၭအီၪဂီၩ့ ဘဲၫၥိၭကဆါဎြံၬၥိၭ ဆၧအီၪဘုၭထံၭၥၭနီၪ နဲၪဖျီၪဝ့ၫအဂး မုဆံၫ့ဎံၪပြီပတံၬမုနံၩဎိၩ ကနံၩနီၪ ၥူၫဝၭထၪ့ ၡၩခမျၧးၥံၪ အခၪ့နီၪလီၫႉ

ဆၧလၧပြီပတံၬမုနံၩဎိၩယီၩ ပကိၭဝ့ၫဒၪလၧ Maundy Thursday နီၪလီၫႉ ဘၪမနီၫလဲၪ ပကိၭဝ့ၫလၧ Maundy Thursday နီၪ ဆၧလၧ Maundy နီၪ အီၪဂဲၫစဲၪလၩ့လၧ လဲၪတ့ၫအဆၧချဲၩ့ Mandate ဂီၩ့ အခီၫပယီၫနီၪ မွဲဝ့ၫဒၪ ဆၧအလူႇ ဆၧမၪလူၬနီၪလီၫႉ လံၬဆံၫ့ဎံၪ စယီဟၫ့ (15: 12-13) ဖၧၩ့ ဘၪစကွ့ၭထၬဝ့ၫနီၪ “အယီၩမွဲယဆၧမၪလူၬႇ ဘဲၫယအဲၪ နၥံၪအၥိၭနီၪႇ အဲၪလိၬကွံၩလိၬ နၥံၪအၥၭ ဘဲၫနီၪအၥိၭဆံၭႉ” ဆၧလၧ လံၬဆံၫ့ဎံၪယီၩ ပဝ့ၫၦၡၩၥံၪ လဂၩဒဲလဂၩ ဆၧအဲၪဆၧကွံၩ ကအီၪအဂး မွဲဝ့ၫကဆါဎြံၬ ဖ့ၪထးထၬ အဆၧမၪလူၬ မုနံၩဎိၩဒိၪနီၪလီၫႉ

လၧကၬၥလ့ၭ ဆၧအီၪကီၪ့ဖၧၩ့ မုဆံၫ့ဎံၪပြီပတံၬမုနံၩဎိၩနီၪ ဂၪ့ခိၪထၧၫ့ဖျိၪ့ယၫ ဆၧအီၪကီၪ့ဖိၪလဖၪ ကဆါဎြံၬ ၥူၫဝၭအထံၩအဖျဲၥံၪ အခၪ့ၥိၭ ၦလၧအၪ့န့ထၪ့ထၬ ကဆါဎြံၬအလး ၦယူၬၥိၪၥၫ့ခၫလဖၪ အဝ့ၫၥံၪအၥိၪ အဆၧအီၪကီၪ့ဖိၪဖၧၩ့ ဆၧအီၪကီၪ့ဖိၪ (၁၂) ဂၩ အခၪ့နီၪ ၥူၫဝၭဝ့ၫနီၪလီၫႉ လၧခဲၫ့မုကနံၩ အၥၧၭမုနံၩနီၪ ကၬၥလ့ၭ ဆၧအီၪကီၪ့ဖိၪၥံၪ ဒုၪအၪ့ဒုၪအီၩႇ ဒုၪဆၧဖံၭဆၧယၪႇ ဆၧလဂ့ၩဆၧလဘၪဘၪၥံၪဂီၩ့ ထီၩ့လၧအတုၬမုနံၩနီၪ မၩဘိၪ့ထၪ့ဘၩထၪ့ ကဆါဎြံၬ မၩနၧၩ့ဆၧၥံၪဒိၪဂီၩ့ မၧၫ့ထၪ့ထဲၩ့ ပၫစကၩဘိၪ့လ့ၩဖၭအကၠီၩ့ ယရၩလၩ့အ့ၪဘၪနၥံၪ ထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလဂၩဒဲလဂၩ အဲၪကွံၩယၫ့ၥၭ မၩဆၧၩ့လိၬၥၭ နၧၩ့ဝ့ၫဒၪ ကိၭဒ့ၭကိၭဂၩလါဆံၭႉ