ပကဘၪအီၪၥၭမၧၫ့ကၠၧၫ့ကၠၧၫ့လၧၦဂူၫဂၩၥံၪအဂး ကဆါဎြံၬ ကိၭဖံၭၥိၭဆၧအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအီၪၥၭမၧၫ့ကၠၧၫ့ကၠၧၫ့လၧ ၦဂူၫဂၩၥံၪအဂး ကဆါဎြံၬ ကိၭဖံၭၥိၭဆၧအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဆၧၥၭမၧၫ့ ၡၩအဂဲးမွဲဂ့ၩႇ ၡၩခံးဂးအဂဲးမွဲဂ့ၩႇ လၧပဆၧၥၭမၧၫ့ ဆၧအထၧးအလၧး ကိၭမံၩ့ဒ့ၭအဖၧၩ့ ကဆါယွၩ အီၪၥုၪ့လၩ့ထၬအၥၭနီၪလီၫႉ ဆၧကိၭမံၩ့ဒ့ၭအဖၧၩ့ အီၪၥုၪ့လၩ့ထၬၥၭ ကဆါယွၩနီၪ လၧမုလနံၩပဝ့ၫၥံၪအခံၫ့ခၫဆၧၫ့ထီဘဲၫယီၩ အီၪဝ့ၫဒၪဆ့ၭနီၪလီၫႉ လၧပဆၧၥၭမၧၫ့ဖၧၩ့ ပန့ဘၪႇ ပပၧၩ့ထၬဝ့ၫဒၪ ဆၧလဖၪၥံၪနီၪ လၧၦဂူၫဂၩၥံၪကၠၧၫ့ကၠၧၫ့ ပကဘၪအၪ့နၩ့ဖ့ၪလၫ့ဂီၩ့ လၧဂၪ့ခိၪချိၫ့ဖၧၩ့ ပဘၪဒၪဆၧၫ့ယၫ ဆၧၥုၪ့ဎွံၪၥၭမုၬႇ ဆၧၥုၪ့အုၭၥၭလၩ့ ဆၧလဖၪၥံၪနီၪ ပကဘၪအီၪမီၪ့ဎီၩ့ႇ ပကဘၪထိးဆၧၫ့ဝ့ၫဒၪကၠၧၫ့ကၠၧၫ့အဂး ကဆါယွၩ ကိၭဖံၭၥိၭ ပဝ့ၫၥံၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫဒၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဘၪဒၪဆၧၫ့ယၫ ဆၧမုၬလၩၥၭဎွံၪႇ ဆၧၥုၪ့အုၭၥၭလၩ့ႇ ဆၧမၩနၧၩ့ခၫ့ဖျီၫ့ႇ ဆၧစၪခွံၬအခံၫ့ ဆၧလဖၪၥံၪယီၩအဖၧၩ့ ကဆါယွၩ အီၪၥုၪ့လၩ့ထၬၥၭလၧ ပဝ့ၫၥံၪအအီၪ ကိၭကၠၪဒ့ၭနီၪလီၫႉ ကဆါယွၩနီၪ ဖ့ၪထၬအ့ၪပၧၩ ဆၧအုၩ့လၩ့လမံၩ့နီၪ ဆၧၥၭမဲၪ့ၥၭဖျဲၩ့အီၪလဂ့ၩႉ ယဝ့ၫဒၪယီၩ ယအီၪလၧနၥံၪ ကၠၧၫ့ကၠၧၫ့ ဆၧချဲၩ့အယီၩနီၪလီၫႉ လၩ့ဆၫ့ဒၪဆၧ ဆၧဒုၭဆၧယၩအကၠီၩ့ ၦဘၪထိး ဆၧၡၪ့ဆၧနၭဂီၩ့ ဘၪဒၪဆၧကၪဆၧဂဲၩအခံၫ့ အီၪဝ့ၫဒၪလၧ ပဝ့ၫၥံၪကၠၧၫ့ကၠၧၫ့ဂီၩ့ ဖ့ၪအ့ၪ နးၥၭဂဲးဘၭ ကဆါယွၩနီၪ ပကဘၪအီၪက့ၪထၬဆၧနၪ့ဂီၩ့ လၧပနဲၩ့ပဎီၩ့ၦၡၩၥံၪအဂးနးဆ့ၭ ပကဖ့ၪဂဲးဖ့ၪဘၭ ပကယၫ့ၥၭမၩဆၧၩ့ဆၧအဂး ပကကျ့ၭစၨၭကၠၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧဆိၪဂ့ၩဆိၪဘွၩလါဆံၭႉ