ပကဘၪအီၪလၧ ဆၧဆၪ့လၩ့ၥုၪ့ဆၪ့လၩ့ၥၭအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအီၪလၧ ဆၧဆၪ့လၩ့ၥုၪ့ဆၪ့လၩ့ၥၭအဂဲး အကၠီၩ့နီၪလီၫႉ ထၧၫ့ဖုဝဲမုၪခွၫထီးအလူၬၥံၪဧ့, ၦၡၩလၧအဆၪ့လၩ့ၥုၪ့ဆၪ့လၩ့ၥၭ လအီၪဘၪလဂၩနီၪ ကဆါယွၩဒဲ ကဆါယွၩအဆၧထိးထဲၩ့တၩ့တဲၩ့နီၪ ဒၪခီၩ့ဆၧၫ့ယၫဝ့ၫ လကဲၪၥ့ၪဘၪနီၪလီၫႉ လကၭဒံၭဘၪ လၧအဝ့ၫနဲၩ့ဎီၩ့ၦၡၩၥံၪဆ့ အီၪဆုးကျိၭလိၬၥၭ လန့ဘၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၪ့ အီၪဝ့ၫဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ဂၪ့ခိၪချိၫ့ယီၩ ၦၡၩလၧအၥၭ အီၪက့ၪထၬအၥၭထၪ့ထီၫဒဲ စီၪဎိၩလၩ့အၥၭ လဖၪၥံၪနီၪ အီၪဘူၭဘူၭထံးထံး လၧၦဂူၫဂၩၥံၪ လအီၪဘၪနီၪလီၫႉ ၦဂူၫဂၩၥံၪနးဆ့ အဲၪဒိၭအီၪဘူၭထံးလၧ အဝ့ၫၥံၪအ့ၬနီၪလီၫႉ လါနၫ့, ၦလၧဆၪ့လၩ့ၥုၪ့ဆၪ့လၩ့ၥၭအီၪ, ဆၧအဲၪဆၧကွံၩအီၪ, ဖံၭထံၩဖံၭၥိၭအီၪ ၦၡၩလဖၪၥံၪနီၪ န့ဘၪၦဂူၫဂၩ အဆၧအဲၪဆၧကွံၩ အၪမၬဒ့ၭနီၪလီၫႉ ၥၫ့ဎွၩဖရၫ့စ့ၭ ၥီၪ့ၥၫ့ထၬ အီၪဝ့ၫဒၪ ဘဲၫယီၩၥိၭအကၠီၩ့ ပကဘၪအီၪလၧ ဆၧဆၪ့လၩ့ၥုၪ့ဆၪ့လၩ့ၥၭနီၪလီၫႉ ပဆၧၥၭမၧၫ့ ကိၭနံၩဒ့ၭဖၧၩ့ ပကဘၪအီၪၥၭမၧၫ့ဝ့ၫလၧ ဆၧဆၪ့လၩ့ၥုၪ့ဆၪ့လၩ့ၥၭဂီၩ့ ပကဘၪကျ့ၭစၨၭဖ့ၪအ့ၪ ပဆၧမၩဆၧၩ့, ပဆၧအဲၪဆၧကွံၩလၧ ၦနဲၩ့ၦဎီၩ့ၦၡၩၥံၪအီၪ, ပဘုၭပထံး ၦၡၩၥံၪနီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့, ပကအီၪၥၭမၧၫ့ ဘဲၫဆၧၥီၪ့ဆၧၥၫ့ယီၩၥိၭဂီၩ့ ပကအၪ့နၩ့ဖ့ၪအ့ၪ ယွၩဆၧအဲၪဆၧကွံၩ ဘဲၫယီၩၥိၭလါဆံၭႉ အဲၪကွံၩဘၪ ထၧၫ့ဖုဝဲထံၩၥိၭထီးအလူၬ မွဲနၥံၪ အဖၫ့ခိၪ ကဆါယွၩ အဆၧဆိၪဂ့ၩဆိၪဘွၩ လၩ့ယွၩဝ့ၫ ကိၭနံၩကိၭဂၩလါဆံၭနဲၪႉ