ပကဘၪအီၪပဒၩ့ထၬ ပဝ့ၫၥံၪထီးအလူၬအဂံၪ့ ဂၪ့ခိၪအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအီၪပဒၩ့ထၬ ပဝ့ၫၥံၪထီးအလူၬအဂံၪ့ ဂၪ့ခိၪအဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬၥံၪဧ့ႇ ပဝ့ၫထီးအလူၬၥံၪယီၪ ဂၪ့ခိၪ မွဲဝ့ၫပဝ့ၫၥံၪထီးအလူၬအဂံၪ့ ဂၭဂီၩ့ဂၭစၪလဖၪနီၪ ပကဘၪမၩထုၬခွံၬဂီၩ့ နဲၩ့ဎီၩ့လုၫလါ ကဂဲၫကၧၩ့ထၪ့ထဲၩ့အဂး ပကဘၪ ခိးဂဲးမၩဆၧၩ့ လိၪဝ့ၫဒၪနီၪလီၫႉ လၩ့ဆၫ့ဒၪဆၧ ၦဒိၪအခရၧၫ့လဖၪႇ ခီၫ့ၡၩဂးအဆၧမၩလဖၪဒဲ ထံၫဖိၪခးဆါ ထီးအလူၬနီၪ ကဘၪအီၪက့ၪထၬအၥၭ ဘဲၫထၧၫ့ဖုထၧၫ့ဝဲၥိၭဂီၩ့ လၧကဆါဎြံၬ တဲၩ့လၩ့ထၬအ့ၪပၧၩ ပဝ့ၫၥံၪထီးအလူၬအဂံၪ့ မွဲဝ့ၫဂၪ့ခိၪယီၩ ပကဘၪ အၪ့နၩ့ယိထွ့ၫယိလၩ့ဝ့ၫနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧဂၪ့ခိၪချိၫ့ယီၩ ၦၡၩၥံၪ ဘၪဒၪအၥၭ မၩဂၭဂီၩ့ဂၭစၪ ဂၪ့ခိၪလုၫလါအကၠီၩ့ ပဝ့ၫၥံၪထီးအလူၬအဂံၪ့ ဂၪ့ခိၪယီၩ ခိဆၧၩ့ချံၫ့ထီ အၪ့လဲၪထၪ့အၥၭနီၪ လအီၪဂုးလၧဘၪနီၪလီၫႉ ဆၧအခိအၪလၨၪႇ ဆၧအချံၫ့ဖျီးလၨၪႇ ဆၧဆၧၩ့ လံၩလဖုၬလၩ့ ဆၧနီၪၥံၪအကၠီၩ့ ၦၡၩဘၪၥံၪဘၪဆၫ အၪမၬဒ့ၭနီၪလီၫႉ ၦအၪ့ဎၬနၪၥ့ၪ ၦကိၪ့ဘၪၥံၪ ဆီၫ့မီၪ့အၪဎၬဝ့ၫနီၪ လၧဂၪ့ခိၪချိၫ့ဖၧၩ့ယီၩ ၦၡၩၥံၪ ဘၪဒၪဆၧၫ့ယၫ ဆၧတတုၬတနၭ အၪမၬလါနၫ့ ခိဆၧၩ့ချံၫ့ထီအကၠီၩ့ ၦၡၩၥံၪ ဘၪၥံၪဘၪဆၫနီၪ ဆၧတတုၬတနၭ ဂီၩ့ထဲၩ့ကကၠၪ ဆၧအနီၪၥံၪနီၪ ကလ့ၩဆုးလီၩ့ဝ့ၫဒၪနီၪလီၫႉ ခိဆၧၩ့ချံၫ့ထီ အၪ့လဲၪထၪ့ၥၭနီၪ လအီၪဂုးလၧဘၪအကၠီၩ့ ဂၪ့ခိၪဖိၪၥံၪ အဆၧၥၭမၧၫ့ၥၭၡီၩ့ႇ ဂံၪ့ဎၫ့ႇ ဆၧထုၭဆၧလၧၫ့လဖၪ ဂၭဂီၩ့ဆိၫ့ခွံၬ အအၪထုၬ ကဲၪၥ့ၪဝ့ၫအကၠီၩ့ ၦကိၪ့ဖိၪၥံၪ လီၩထၬဝ့ၫဒၪ ဘဲၫယီၩၥိၭနီၪလီၫႉ

မွဲဆၧနီၪအကၠီၩ့ တခၩဒၪ ဆၨၩနးမံၩ့ႇ တခၩဒၪ ဆၧဘိၪ့ဆၧဘၩနးမံၩ့ ၦၡၩထီးအလူၬနီၪ ဘဲၫၥၫ့ဎွၩဖရၫ့စ့ၭ ၥီၪ့ၥၫ့ထၬၥိၭ လဂၩဘၪလဂၩ ဘဲၫထၧၫ့ဖုထၧၫ့ဝဲၥိၭ ကဘၪယၫ့ၥၭမၩဆၧၩ့လိၬၥၭဂီၩ့ ဖီၪ့ထၪ့ဖံၭထၪ့ဆၧ ကၠၧၫ့ကၠၧၫ့မၬ ၦၡၩၥံၪအဆၧၥၭမၧၫ့ၥၭၡီၩ့ ဆၧလၩ့အၪ့ယိၪဒဲ ဂၪ့ခိၪလုၫလါ ဆၧဂၭဂီၩ့ဂၭစၪ လဖၪနီၪ အီၪပဒၩ့ထၬ ကန့ဝ့ၫဒၪ အဂ့ၩထုၬနီၪလီၫႉ ပဝ့ၫၥံၪနးဆ့ ဘဲၫပဂဲးပဘၭအီၪၥိၭ ခးပယၩ့ဒဲ ဆၧဆီၪ့ဆၧချဲၫ့ လအီၪဘၪ ပဝ့ၫၥံၪထီးအလူၬအဂံၪ့ ဂၪ့ခိၪယီၩ ဆၧဎူၫဆၧဎၩ့ႇ ဆၧမီၪ့ဎီၩ့ထၨၪဎီၩ့ ကအီၪအဂး ဆၧအၪ့က့ၩဘၩဆိၪဖၪဆၧအဖၧၩ့ ပကကျ့ၭစၨၭမၩကဲၪထၪ့ကၠၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪ အီၪပဒၩ့ထၬ နဲၩ့ဎီၩ့လုၫလါ န့ဝ့ၫဒၪကိၭဒ့ၭကိၭဂၩလါဆံၭႉ

Add new comment

1 + 0 =