ပကဘၪဖ့ၪအၪ့ခွံၬ ဆၧလဂ့ၩဆၧလဘၪဘၪၥံၪလၧ လံၬဆံၫ့ဎံၪဆၧၥၭထိၬအပရၧၫ့အမ့ၪအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪဖ့ၪအၪ့ခွံၬ ဆၧလဂ့ၩဆၧလဘၪဘၪၥံၪလၧ လံၬဆံၫ့ဎံၪဆၧၥၭထိၬအပရၧၫ့အမ့ၪအဂဲး အကၠီၩ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့, လံၬဆံၫ့ဎံၪဆၧၥၭထိၬအပရၧၫ့နီၪ အ့ၪပမၩဂုးထၪ့မၧၫ့ထၪ့လၧ ပၥၭခံဖၧၩ့ စွါဘဲၫ ကဆါယွၩဒဲ ၦထၧၫ့ဖုဝဲၦၡၩၥံၪအီၪ ပဒၪပျၩ့ပျၩ့ကန့အဂး ဆၧဆၪ့ထွ့ၫဂဲးဘၭမွဲဝ့ၫလီၫႉ လံၬဆံၫ့ဎံၪ အဆၧၥၭထိၬအပရၧၫ့နီၪ မီၪ့ဎီၩ့ဝ့ၫဒၪလၧ မ့ၪနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ဆၧလၧလံၬဆံၫ့ဎံၪအဆၧၥၭထိၬအပရၧၫ့နီၪ မၩဝၩ့ဖီၩ့ထၬပၧၩလၧ ယွၩအဆၧအဲၪဆၧကွံၩတၭ ဆၧအဲၪလၩ့ၥၭလဂၩဎး အဆၧဖံၭဆၧမၩၥံၪ မၩလၩ့မၬခွံၬဝ့ၫဒၪနီၪလီၫႉ ပဆၧၥၭမၧၫ့လၧ ဆၧခံၭအကျၩလဖၪၥံၪအဂး ဖ့ၪအ့ၪဆၧပျၩ့ဂီၩ့ ဆၧဒဲၭဘၭ အဆၧမၩလဖၪၥံၪ ပခွံၬၡိၬထးကန့အဂး ကဆါယွၩအလိၪ အီၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬ အီၪဝ့ၫဘဲၫယီၩၥိၭနီၪလီၫႉ

မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့, ဘဲၫၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪထၬၥိၭ မုကိၭနံၩဒ့ၭဖၧၩ့ ပအၪန့အခံၫ့ဂီၩ့ ပဖီလံၬဆံၫ့ဎံၪ, လၧလံၬဆံၫ့ဎံၪယီၩ အဖၫ့ခိၪ ပအီၪက့ၪထၬ ဆၧဆီၫ့မီၪ့ဧၪ? အ့ၪလမွဲဘၪ ပဖီလံၬဆံၫ့ဎံၪ, ပအၪ့က့ၩဘၩဆိၪဖၪဆၧဂီၩ့ ပအၪ့နၩ့အ့ၪ ဆၧၥၭထိၬအပရၧၫ့ဧၪ? လခဲၫ့ကမံၩ့ ၦအလိၪလဖၪၥံၪအီၪ ပကဖ့ၪအ့ၪ ဆၧမၩဆၧၩ့, ပကမၩဘိၪ့မၩထးဆၧ ကဲၪလၫ့လၧ ပၥၭခံဖၧၩ့ဧၪ? ထၧၫ့ဖုဝဲမုခွၫထီးအလူၬၥံၪဧ့, ဆၧလဖၪၥံၪယီၩ အ့ၪကဲၪထၪ့လၧ ပၥၭခံဖၧၩ့ယူၬစွါဘဲၫ ကဆါယွၩအမ့ၪဖၩ့နီၪ ခဲၩထၪ့လၧ ပၥၭခံဖၧၩ့ယူၬ ပလီၩန့ဝ့ၫဒၪနီၪလီၫႉ ၦလၧအၪ့န့ထၪ့ထၬ ဆၧၥူၫဝၭဆံၫ့ စကရမ့ၫတူၩ ၦဎြံၬဖိၪၥံၪထီးအလူၬနီၪ ပကဘၪအီၪၥၭမၧၫ့ဝ့ၫဒၪ ဘဲၫယီၩၥိၭအဂး ပတၩလၫ့မူၩဒၩ အီၪဝ့ၫဒၪ တၡါဒ့ၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, မံၫဒံၫယၫ အဆၧလ့ၩထၪ့လ့ၩထီၫအီၪထီဘဲၫယီၩ ၦၡၩၥံၪထီးအလူၬဆၭဆၭနီၪ ဖီၪ့ခွ့ၩဒိၭနါတၭ လၧခွ့ၩဒိၭနါဖၧၩ့ ပကအီၪက့ၪ ထံၭလၩ့ထၬ လံၬဆံၫ့ဎံၪဂီၩ့ ပကဖီလံၬဆံၫ့ဎံၪ, ပကအၪ့န့ထၪ့ဂဲးဘၭလၧ လံၬဆံၫ့ဎံၪ အဆၧဘၩဆိၪဖၪဖၧၩ့လါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ဘဲၫၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪၥိၭ မွဲနၥံၪအၪ့န့ထၪ့ဂဲးဘၭလၧ လံၬဆံၫ့ဎံၪဖၧၩ့န့ဝ့ၫဒၪ ကိၭနံၩကိၭဂၩလါဆံၭႉ