ပကဘၪဖ့ၪအ့ၪၦဂူၫဂၩၥံၪ ဆၧမၩဆၧၩ့ ဘဲၫပထၧၫ့ဖုထၧၫ့ဝဲအထံၭၥိၭအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪဖ့ၪအ့ၪၦဂူၫဂၩၥံၪ ဆၧမၩဆၧၩ့ ဘဲၫပထၧၫ့ဖုထၧၫ့ဝဲအထံၭၥိၭအဂဲးအကၠီၩ့နီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ၦဂူၫဂၩၥံၪ အဆၧၥၭမၧၫ့ဆၧထီ အီၪဝ့ၫဘဲၫၥ့ၪလဲၪ ပကၥ့ၪယၫအဂး ပကဘၪကျ့ၭစၨၭနီၪလီၫႉ အဝ့ၫၥံၪ အဆၧဂ့ၩ, အဆၧအၧၩ့အီၪၥံၪအဖၫ့ခိၪ ပကြၨၭစ့ၩရၫ့အ့ၬဂီၩ့ ပကၥ့ၪယၫအဝ့ၫၥံၪ အဆၧၥၭမၧၫ့ ဂ့ၩဂ့ၩဘၪဘၪအဂး ပကဘၪအၪ့န့ အခံၫ့နီၪလီၫႉ အဝ့ၫၥံၪအဆၧပွံၭဆၧထၩ့ ကဲၪထၪ့အခံၫ့, ဘၪဒၪခီၩ့ဆၧၫ့ယၫ ဆၧကၪဆၧဂဲၩအခံၫ့ ပကဘၪဖ့ၪအ့ၪ ပဆၧမၩဆၧၩ့ ဘဲၫလံၬဆံၫ့ဎံၪဖၧၩ့ စမ့ရအၫ ဖ့ၪအ့ၪဆၧမၩဆၧၩ့ၥိၭနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ၦၡၩဘၪဒၪခီၩ့ဆၧၫ့ယၫ ဆၧကၪဆၧဂဲၩနီၪ ၥ့ၪယၫလၧပၧၩ လမွဲဘၪလါနၫ့ ပကဘၪဖ့ၪအ့ၪ ဆၧမၩဆၧၩ့နီၪလီၫႉ ၦဝ့ၫၦၡၩလဖၪၥံၪယီၩ အီၪၥၭမၧၫ့ၥ့ၪဝ့ၫဒၪ အ့ၪလၥ့ၪယၫဘၪၦၡၩစွါဘဲၫ လအဲၪဒိၭဖ့ၪအ့ၪဘၪဝ့ၫ ဆၧမၩဆၧၩ့နီၪလီၫႉ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪဝ့ၫ ပကဘၪအီၪက့ၪထၬ ၥုၪ့ၥၭဘဲၫ ထၧၫ့ဖုထၧၫ့ဝဲၥိၭအဂဲးနီၪ ဘၪဆၧကွ့ၩထၬဝ့ၫလၧ လံၬဆံၫ့ဎံၪဖၧၩ့  ဎြံၬဖိၪၥံၪ အဆၧဆူနဲၩ အခၪ့ထံၭခၪ့ဎၧၩ့မွဲဝ့ၫလီၫႉ ဘၪနီၪလဲၫစွါဘဲၫ လံၬဆံၫ့ဎံၪစမိၭစ့ၭဖၧၩ့ ၦၡၩနီၪဘၪဆၧတဲၩ့လၩ့ထၬဘဲၫ ကဆါယွၩအဂၩ့ဒၪအဝ့ၫအၥိၭ ဘဲၫအနၪ့ဆါဒၪအဝ့ၫအၥိၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ကဆါဎြံၬအဆၧၥီၪ့ဆၧၥၫ့နီၪ ပကဘၪဖီၪ့ဝၬထၬ ဆၧအဲၪဆၧကွံၩဂီၩ့ ဘဲၫပၥၭဆိၫ့မုလါအီၪ ၦဂူၫဂၩၥံၪ ကအီၪက့ၪထၬအၥၭလၧ ပဖၫ့ခိၪၥိၭ ၦဝ့ၫၥံၪနးဆ့ၭ ပကဘၪအီၪက့ၪထၬ ပၥၭဘဲၫနီၪၥိၭလီၫႉ မွဲဆၧနီၪ ၦၡၩလၧ ပၥ့ၪယၫမွဲဂ့ၩ, ပလၥ့ၪယၪဘၪမွဲဂ့ၩ အ့ၪအဝ့ၫၥံၪ ဆၧမၩဆၧၩ့ အီၪကမံၩ့မံၩ့စွါဘဲၫ ပကဘၪဖ့ၪအ့ၪ ဆၧမၩဆၧၩ့ ဘဲၫၦထၧၫ့ဖုထၧၫ့ဝဲအထံၭၥိၭအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭနီၪလီၫႉ ထၧၫ့ဖုဝဲထံၩၥိၭထီးအလူၬ ပအီၪက့ၪၥၭမၧၫ့ ဘဲၫယီၩၥိၭကန့အဂဲး ပကအၪ့က့ၩဂဲးဘၭလၧ ၥၭမုဆံၫ့ဎံၪအီၪ ကိၭဒံၭကိၭဂၩလါဆံၭႉ