ပကဘၪဖ့ၪဆၧၫ့လၩ့ပၥၭ ဘဲၫၦဒူၩဖိၪၥိၭအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪဖ့ၪဆၧၫ့လၩ့ပၥၭ ဘဲၫၦဒူၩဖိၪၥိၭအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ယိထၪ့လၧ ခံၫ့ခၫဆၧၫ့ထီဘဲၫယီၩ ၦလၧအအီၪဖျီၪထၪ့ ၦဒူၩဖိၪလဖၪၥံၪနီၪလီၫႉ အဝ့ၫၥံၪယီၩ ၦလၧအမံၩ့ဎိၩၥၪဖျီၪႇ ကဲၪဒိၪကိၪမု လမွဲဘၪ ၦၡၩၥံၪလါနၫ့ ၦဂူၫဂၩၥံၪအဂး အဆၧၥၭမၧၫ့နီၪ ဖ့ၪဆၧၫ့လၩ့ထၬဝ့ၫ မွဲဝ့ၫဒၪ ၦၡၩၥံၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဆၧၥၭမၧၫ့နီၪ ပကဘၪထီးနဲၪ့ထၬၥၭဘဲၫ ၦအဘၪထိးကိၭထၬအၥၭ ဆၧမၩဒူၩၥၭအဂး လၧဆၧနိၫ့ဆၧနၭဖၧၩ့ ၦၡၩၥံၪၥိၭနီၪလီၫႉ ကဆါယွၩဒဲ ၦဂူၫဂၩၥံၪအဂး ပဆၧၥၭမၧၫ့နီၪ ပကဘၪလုထၪ့ဝ့ၫအဂး ပအီၪထၬဘၪ ဆၧၥၭမဲၪၥၭဖျဲၩအ့ၬနီၪလီၫႉ ပန့ထၪ့ထၬဘၪ ပဆၧၥၭမၧၫ့လၬဆီၪယီၩ ပၥ့ၪယၫထၪ့ မွဲဝ့ၫဆၧလမံၩ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧၥုၪ့ဎွံၫၥၭထိၬ အဆူယိၬနီၪ “ဘၪလဘၪႉႉႉႉႉ လါနၫ့ဂ့ၩ” ဆၧချဲၩ့လဖၪၥံၪယီၩ လပၪဎုၬဘၪတၭ ဆၧလၧဆၧၥုၪ့ဎွံၫၥၭထိၬ အဆူယိၬနီၪ ဂဲၫကဲၪထၪ့ဝ့ၫဒၪလၧ ဆၧအဲၪဆၧကွံၩ အၡါမၬဖၧၩ့နီၪလီၫႉ မွဲဆၧနီၪ “ဘၪလဘၪႉႉႉႉႉ လါနၫ့ဂ့ၩ” ဆၧချဲၩ့လဖၪ ပချဲၩ့အ့ၬဂီၩ့ ပကဘၪနဲၪဖျီၪထၪ့ ဆၧအဲၪဆၧကွံၩလူၬလူၬနီၪလီၫႉ ပဝ့ၫၥံၪထီးအလူၬအဂး ဘဲၫကဆါဎြံၬ မၩထးထၬဝ့ၫၥိၭ ပဝ့ၫၥံၪနးဆ့ ပကဘၪလီၩ့မၩဖိၬထွ့ၫ ဘဲၫနီၪၥိၭအကၠီၩ့  ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩအဆၧအဲၪဆၧကွံၩ ကိၭဂၩဒ့ၭလါဆံၭႉ