ပကန့ထၪ့ ဆၧထိးၥၭၥုၪ့ၥၭအဂး ပကဘၪအၪ့က့ၩဘၩဆိၪဖၪဆၧအဂဲး

ဆၧအဲၪဆၧကွံၩဖၧၩ့ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကန့ထၪ့ ဆၧထိးၥၭၥုၪ့ၥၭအဂး ပကဘၪအၪ့က့ၩဘၩဆိၪဖၪဆၧအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭၥံၪဧ့ႇ ပဆၧဆူနဲၩဆၧထိးၥၭဖၧၩ့ ဆၧၡၪ့ဆၧနၬႇ ဆၧတတုၬတနၭဒဲ ဆၧလၩ့အၪ့ယိၪလဖၪနီၪ ပခၫ့ဂၬခွံၬအဂး ပၥုၪ့ပၥၭနီၪ အၪ့လဲၩထၪ့ခွံၬအၥၭ ဘဲၫၦယူၬၥိၪအၥုၪ့အၥၭၥိၭ ကန့အဂး ပကအၪ့က့ၩဘၩဆိၪဖၪလၧ ဖါကဆါယွၩအီၪလါဆံၭႉ

ပဆၧၥၭမၧၫ့မုကိၭနံၩဒ့ၭဖၧၩ့ ပဘၪဒၪခီၩ့လိၬၥၭ ၦၡၩလဖၪၥံၪဒဲ ပဆၧယိထွ့ၫမၩဆၧၩ့ဖၧၩ့ ဖ့ၪလၫ့ၥၭၦၡၩလဖၪၥံၪနီၪ ပကဘၪဖ့ၪၥ့ၪယၫအ့ၪ ကဆါယွၩ အလူအထၫနီၪလီၫႉ ဆၧမၩယီၩ ပအီၪက့ၪထၬပၥၭ လၧဆၧအွံၪဆၧယိၭမွဲအ့ၪဂီၩ့ ပကဘၪအီၪက့ၪထၬပၥၭ လၧမူၩဒၩအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ လၧဆၧၥၭမၧၫ့ဖၧၩ့ ဆၧၡၪ့ဆၧနၬႇ ဆၧတတုၬတနၭဒဲ ဆၧလၩ့အၪ့ယိၪလဖၪနီၪ ၦဂူၫဂၩမၬ လမိထိးဆၧၫ့ဘၪနီၪလီၫႉ လါနၫ့ ၦၡၩၥံၪ အဆၧအဲၪလၩ့ၥၭႇ အၥၭထၪ့ထီၫဒဲ အဆၧမၪႇ အဆၧအၧၩ့ဆၧၥၫ့အကၠီၩ့ မုကိၭနံၩဒ့ၭ ဘၪထိးဆၧတတုၬတနၭနီၪလီၫႉ ဎြံၬဖိၪၥံၪအဂး ဆၧအဲၪၥုၪ့ၥၭနီၪ ပကဘၪအီၪက့ၪထၬအၪနဲၪ့ ဆၧၥၭမဲၪၥုၪ့ၥၭဂီၩ့ ဆၧတတုၬတနၭထုၪ့စူၪယၫနီၪ ထိးဆၧၫ့ဝ့ၫအဖၧၩ့ ပၩရမံၫၥံၪ ကဂုထၪ့အၪထၪ့ႇ ကန့ထၪ့ ၡၩတခ့ၭၥနိၫ့ အဆၧၥီၪ့ဆၧၥၫ့ လၧဆၧၡၪ့ဆၧနၬဖၧၩ့နီၪလီၫႉ ဆၧတတုၬတနၭနီၪ ပထိးဆၧၫ့ ခၫ့ဂၬခွံၬမၬ ပကန့ထၪ့ ဆၧထိးထဲၩ့တၩ့ထဲၩ့ မုၬခိၪဘၩ့မုၬအကၠီၩ့ မွဲဆၧနီၪ တခၩဒၪ ပဘၪဒၪဆၧၫ့ယၫနးမံၩ့ လၧဆၧဘၩဆိၪဖၪႇ ဆၧအဲၪဆၧကွံၩဒဲ ဆၧယိလါပၩရမံၫၥံၪအဖၧၩ့ ပခၫ့ဂၬခွံၬဂီၩ့ ပကအီၪၥၭမၧၫ့ဘဲၫ ၦယူၬၥိၪ အဆၧဆူနဲၩဆၧထိးၥၭၥုၪ့ၥၭၥိၭအဂး ပကကျ့ၭစၨၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪအီၪၥၭမၧၫ့န့ဝ့ၫဒၪ ဘဲၫၦယူၬၥိၪအၥုၪ့အၥၭလါဆံၭႉ