နၧၩဒဲဎြံၬစမၬ (၂)

Wednesday, December 27, 2023

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ နၧၩဒဲဎြံၬစမၬ လခဲၫ့ထုၬကဆၫ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့ႇ

ပဝ့ၫၥံၪယီၩ တခၩဒၪ ၦၡၩနးဂၩ ပဖ့ၪအ့ၪဆၧ အဂ့ၩထုၬစွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬ စဎွၩ (၃) ဂၩ (ပညာရှိမင်းသုံးပါး) နီၪလီၫႉ

ပဝ့ၫၥံၪယီၩ လၧပၥၭခံဖၧၩ့ ဆၧဘၪလိၬအိၭလိၬ အ့ၪအီၪစွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬ ဆၧၥၭအွံၪနီၪလီၫႉ

ပဝ့ၫၥံၪယီၩ ၦကိၭဂၩဒ့ၭအဂး ပမွဲဝ့ၫ ထၧၫ့ဖုထၧၫ့ဝဲ ထံၩၥိၭတီၩလီၩ့စွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬ လၭဆီၪ့နီၪလီၫႉ

ပဝ့ၫၥံၪယီၩ ဆၧယၫ့ၥုၪ့ယၫ့ၥၭ အတရၩ ပကွ့ၭဝ့ၫလၧပစူၪႇ အခီၫပယီၫနီၪ ဆၧယၫ့ၥုၪ့ယၫ့ၥၭ အဆၧမၩလဖၪ ပမၩယူၬစွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬ စၭခီၫဒၧၩ့ (Christmas Card) နီၪလီၫႉ

ပဝ့ၫၥံၪယီၩ ၦဂူၫဂၩ အဆၧမၪနီၪ ပဖျါခွံၬဂီၩ့ အ့ၪပၥုၪ့ထၪ့ထဲၩ့ ဆၧဎူၫဆၧဎၩ့စွါဘဲၫ ပဝ့ၫၥံၪယီၩ ပမွဲဝ့ၫဒၪ ဎြံၬစမၬ နူၭဆဲၭ ဆၧချဲၩ့လဖၪနီၪလီၫႉ

ပဝ့ၫၥံၪယီၩ လၧပနဲၩ့ပဎီၩ့ ၦၡၪ့ယၬဖိၪၥံၪအဂး ပဖ့ၪအ့ၪ ဆၧအၪ့ဆၧအီၩဒဲ ဆၧယိလါစွါဘဲၫ ပဝ့ၫၥံၪယီၩ ပမွဲဝ့ၫဒၪလၧ ဎြံၬစမၬ မုနၩထီအဆၧအၪ့ (ခရစ္စမတ်ညစာစားပွဲ)နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဝ့ၫၥံၪယီၩ ဆၧၥုၭဆၧကၠၭ လမွဲဘၪ ဆၧဘိၪ့ဆၧဘၩ ဎိၩဎိၩဒိၪဒိၪ ပလမၩဘၪတၭ ဂၪ့ခိၪဆၧထိးထဲၩ့တၩ့ထဲၩ့ အကဆါနီၪ လၧဆၧယူယံၩ့အဖၧၩ့ ပထိးဆၧၫ့လၧ ဆၧၥုၪ့ဆၧၩ့ၥၭဆၧၩ့စွါဘဲၫ ပဝ့ၫၥံၪယီၪ ပမွဲဝ့ၫ ဎြံၬစမၬဆ့နီၪလီၫႉ လၧပၥၭခံဖၧၩ့ ဆၧဎူၫဆၧဎၩ့အီၪႇ ဆၧဆူနဲၩအီၪႇ ဆၧၥုၪ့ဆၧၩ့ၥၭဆၧၩ့အီၪစွါဘဲၫ ပဝ့ၫၥံၪယီၩ ပမွဲဝ့ၫဒၪလၧ ဎြံၬစမၬအကၠီၩ့ ယရၩလၩ့န့အ့ၪဘၪနၥံၪထၨၪယီၩနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ ဎြံၬအီၪဖျဲၪမုနံၩအဂး မွဲနၥံၪအီၪတဲၩ့ဝဲၩလၩ့ၥၭ ဂ့ၩဂ့ၩဘၪဘၪ န့ဝ့ၫဒၪ ကိၭဒံၩကိၭဂၩလါဆံၭႉ