နၧၩဒဲဎြံၬစမၬ (၁)

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ နၧၩဒဲဎြံၬစမၬ အဆိၫဂုကဆၫ့အဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ ဆၧလၧဎြံၬစမၬနီၪ ၦၡၩအၪဒၪဆၧ မၩနဲၪ့ထၬဝ့ၫနီၪ မွဲဝ့ၫဒၪလၧ ဆၧၥုၭဆၧကၠၭ ဆၧဘိၪ့ဆၧဘၩလမံၩ့နီၪလီၫႉ လါနၫ့ဂ့ၩနီၪ ပဝ့ၫၥံၪ ပကနါဂၧၫ့ဘၪ ဆၧအဲၪဆၧကွံၩအလူအဂး ဆၧယူယံၩ့ ၡၩခိၬဒ့ၭ ပၥိၩ့န့ဝ့ၫဒၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫဒၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဒၪလခဲၫ့ဒံၭနီၪ

ပဝ့ၫၥံၪယီၩ မုကိၭနံၩ ပကအီၪၥၭမၧၫ့ ဆၧၥၭမၧၫ့အၥၫ့အဂး ပအီၪက့ၪလၩ့ပၥၭဂီၩ့ လၧပၥၭခံဖၧၩ့ ပထိးဆၧၫ့ထၬ ကဆါဎြံၬစွါဘဲၫ ပဝ့ၫၥံၪယီၩ ပမွဲဝ့ၫ ဎြံၬစမၬနီၪလီၫႉ

ပဝ့ၫၥံၪယီၩ ပဆၧၥၭမၧၫ့ဖၧၩ့ ဘဲၫလံၩမုလဖုၬအဂဲးဆီၪ့ဘၭဆီၪ့ၥိၭ ဆၧကၪဆၧဂဲၩလဖၪ ပဒုၭဆၧၫ့ခွံၬအခံၫ့နီၪ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬၥံၪ့ဆိၩ့ (ထင်းရှူးပင်)နီၪလီၫႉ

ပဝ့ၫၥံၪယီၩ ပတခ့ၭအဂ့ၩအဘွၩလဖၪနီၪ ပဆၧၥၭမၧၫ့အဂး မၩဂ့ၩပၧၩ မွဲဝ့ၩဒၪ အလွ့စွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬအီၪဖျဲၪမုနံၩအဂး ၦၡၩကၠၧၩ့လၫ့ဆၧအဂး ဆၧပိၭဆၧလၫ့လဖၪၥံၪနီၪလီၫႉ

ပဝ့ၫၥံၪယီၩ ၦၡၩၥံၪ ဆၧယံၩဆၧၡီၩ့ကအီၪအဂး ပကိၭစူၭကီၪ့ဆၧ ပမၩယံၩမၩၡီၩ့ဆၧစွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬဒိၩ့လွ့ၫနီၪလီၫႉ

ပဝ့ၫၥံၪယီၩ ၦဂူၫဂၩ အဆၧၥၭမၧၫ့ဖၧၩ့ၥၭနီၪ ပမၩခဲၩထၪ့လၧ ပဆၧယၫ့ၥုၪ့ယၫ့ၥၭႇ ပၥုၪ့ဆၧၩ့ၥၭဆၧၩ့ႇ ပၥုၪ့မုၬၥၭဎွံၫႇ ပၥုၪ့အီၪၥၭအီၪစွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬဆၧဖၩ့ဆၧခဲၩနီၪလီၫႉ

ပဝ့ၫၥံၪယီၩ ၦဂူၫဂၩ မွဲကထီၩ့စိၩလၧ ကဆါဎြံၬအီၪအဂး ပၥိၪ့အ့ၪန့ဝ့ၫစွါဘဲၫ ပဝ့ၫၥံၪယီၩ ပလၩ့ဂၩဝ့ၫဒၪလၧ ဎြံၬစမၬၡၪလဖျိၪ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ နၧၩဒဲဎြံၬစမၬ အဆိၫဂုကဆၫ့နီၪ ယရၩလၩ့န့အ့ၪဘၪနၥံၪ ထၨၪယီၩနီၪလီၫႉ နၧၩဒဲဎြံၬစမၬ လခဲၫ့ထုၬကဆၫ့နီၪ လၧခဲၫ့မုကနွ့ၫမၬ ယကရၩလၩ့န့အ့ၪဘၪနၥံၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲကနၥံၪကလၩ့ဂၩဝ့ၫဒၪလၧ ဎြံၬစမၬအဂး ကျ့ၭစၨၭကၠၬလါဆံၭႉ