ထီလၧ ခိဆၧၩ့ချံၫ့ အဆၧဒၨၭလၩ့အကၠီၩ့ ၦၡၩၥံၪအဆၧဘၪထိးအဂဲး

ခိဆၧၩ့ချံၫ့ထီ အဆၧအၪ့လဲၩထၪ့အၥၭနီၪ လအီၪဂုးလၧဘၪ လၧၦၡၩၥံၪအဂးဂီၩ့ ကဲၪထၪ့၀့ၫဒၪလၧ ဆၧအရ့ၩဒိၪ အဆၧၫ့အထီယူၭနီၪလီၫႉ ဆၧအဂဲးအဖးယီၩအကၠီၩ့ စဲၭဒဲ ၦၥုၪ့အၪ့ၥုၪ့အီၩဆၧလဖၪၥံၪ လကၭဒံၭဘၪ ဂၪ့ခိၪ ထၧၫ့ဘံၪ့ယၫဖၧၩ့ ၦၡၩအဂံၪ့ဒိၪ့ၥံၪထီးအလူၬ ဆၧဘၪထံၭဘၪနဲၪ့ အီၪ၀့ၫဒၪနီၪလီၫႉ ဘၪထံၭဘၪနဲၪ့ အအၪထုၬနီၪ မွဲ၀့ၫၦအၡၪ့ဖိၪၥံၪနီၪလီၫႉ

ထီဘဲၫယီၩ ၦ၀့ၫၦၡၩၥံၪ ဘၪဒၪခီၩ့ဆၧၫ့ယၫ ဆၧအၪ့ထၩအီၪ၀့ၫ နံၫမံၩ့နီၪလီၫႉ ဆၧအၪ့ထၩနံၫမံၩ့နီၪ မွဲ၀့ၫဒၪ ပကဘၪမၩလၩ့ၡၩ ဆၧထုၭထၪ့စီၩ့အဂဲးဒဲ ဘၪထွ့ၪလၧဆၧမၩဘၪထံၭဘၪနဲၪ့ ဆၧခိဆၧၩ့ချံၫ့ထီ ဆၧဖံၭဆၧမၩ ကလၩ့ၡၩအဂး မွဲ၀့ၫဒၪနီၪလီၫႉ ဆၧအၪ့ထၩယီၩ ကအီၪပဒၩ့ထၬအ့ၪ ၦၡၩလဂၩလဂၩဎးဒဲ ဂၪ့ခိၪကၧၩ့ယူၩအဂး မွဲ၀့ၫဒၪနီၪလီၫႉ ဎြံၬဖိၪၥံၪအဆၧဆူနဲၩနီၪ ဘၪထွ့ၪလၧ ဆၧအဂဲးအဖးယီၩ ဖ့ၪထၬအ့ၪဆၧမၩဆၧၩ့ အီၪ၀့ၫဒၪတၡၭဒ့ၭနီၪလီၫႉ လံၬဆံၫ့ဎံၪဆၧမိစ့ၭ (1:31) ဖၧၩ့ ကွ့ၭထၬ၀့ၫ ”ယွၩယိဆၧလၧ အမၩကဲၪထၪ့၀့ၫ လမံၩ့လါလါ ကိၭအမံၩ့နီၪတၭ, ဒၪဘၪ၀့ၫလၧအဂ့ၩမၬလီၫႉ” ကဆါယွၩတဲၩ့လၩ့ထၬ ဆၧအခိးအတၩယီၩအဖၫ့ခိၪ ဖ့ၪထၬအ့ၪၦၡၩၥံၪ ကပၧၩ့ဆၧလဖၪၥံၪယီၩအဂး အတၩလၫ့နီၪလီၫႉ

လံၬဆံၫ့ဎံၪ အဆၧၥီၪ့ဆၧၥၫ့ အီၪ၀့ၫဘဲၫယီၩၥိၭအကၠီၩ့ ၦဆၧယိထွ့ၫယိခွါ ကဘၪအီၪလၧ ခိဆၧၩ့ချံၫ့ထီ အဆၧအၪ့လဲၩထၪ့ၥၭအဖၫ့ခိၪအဂဲးမွဲအ့ၬႉ ၦ၀့ၫၦၡၩလဖၪၥံၪယီၩ မွဲ၀့ၫကဆါယွၩ အဖိၪအဒံၪအကၠီၩ့ ပကဘၪယိထွ့ၫယိခွါ ခိဆၧၩ့ချံၫ့ထီ ကဂ့ၩကဘၪအဂးနီၪ မွဲ၀့ၫဒၪ ၦၡၩၥံၪအတၩလၫ့လမံၩ့ ဘၪထွ့ၫလၧ တခ့ၭဖ၀ၭအဂဲးနီၪလီၫႉ ပကဘၪအၪ့စၪ့လၩ့ပၥၭဒဲ ပကဘၪအၪ့စၪ့ ၦလၧကဖိၬထၪ့ပခဲၫ့ၦၡၩလဖၪၥံၪ “နၥံၪအဲၪဒိၭန့ထၪ့ဘၪ ဂၪ့ခိၪဘဲၫၥ့ၪလဲၪနီၪလီၫႉ”

ဆၧဖံၭဆၧမၩယီၩ မွဲ၀့ၫဒၪ ၦစံၭခိးစံၭတၩ ယွၩအဆၧအဲၪဒဲ ယွၩအဆၧတဲၩ့လၩ့, မွဲ၀့ၫဒၪ ၦၡၩဒဲ ယွၩတဲၩ့လၩ့ထၬ ၥၭမၧၫ့ၥံၪအီၪလဖျိၪ့ဎးအဂဲးနီၪ ပၥ့ၪယၫန့၀့ၫဒၪနီၪလီၫႉ မၩပျၩ့ထၬခွံၬ နဲၩ့ဎီၩ့ဆၧကၪဆၧဂဲၩၥံၪ လၧဆၧဎူၫဆၧဎၩ့ဖၧၩ့ဆ့ မွဲ၀့ၫဒၪဒံၭနီၪလီၫႉ မွဲဆၧနီၪ ထံၫခးလၧ ကဲၪဒိၪကဲၪမုလဖၪၥံၪနီၪ ကဘၪမၩလၩ့ၡၩ စီၩ့ဂဲး အဆၧထုၭထၪ့ဒဲ ဘၪဖ့ၪအ့ၪကျိၪစ့ၩ အဆၧမၩဆၧၩ့, ဆၧၥ့ၪယၫနၪၥ့ၪ အဆၧမၩဆၧၩ့လၧ ထံၫခးအၡၪ့ၥံၪအဂးနီၪလီၫႉ ၦအမၩဆံၬဖိၪကၩဖိၪအဂး ဆၧမၩဆၧၩ့အရ့ၩဒိၪ ကဘၪမွဲ၀့ၫ ဆၧယိထွ့ၫယိခွါ အီၪလၧဂၪ့ခိၪလုလါ အဝံအစၧၩ့အဖၫ့ခိၪနီၪလီၫႉ မွဲ၀့ၫဒၪ လကၭဒံၭဘၪ ဆၧကိၪ့ဘၪကိၪ့ၥ့ၪဒဲ ဆၧဆီၪ့ဆၧချဲၫ့အဂဲးအဖၫ့ခိၪ ဆၧယိထွ့ၫမၩဆၧၩ့ကဘၪအီၪလိၪ၀့ၫ အရ့ၩဒိၪအကၠီၩ့ ၥၫ့ဎွၩဖရၫ့စ့ၭ အဆၧလီၩဖျီၪ့ထၪ့အီၪ၀့ၫဒၪ ဘဲၫယီၩၥိၭနီၪလီၫႉ အဲၪကွံၩဘၪ ထၧၫ့ဖု၀ဲထံၩၥိၭထီးအလူၬ မွဲနၥံၪလၧၫ့ဎွ့ၩ၀့ၫဒၪလၧ ကဆါယွၩ အဆၧဆိၪဂ့ၩဆိၪဘွၩလါဆံၭႉ