ဎြံၬဖိၪၥံၪနီၪ ပကဘၪကဲၪ ၦထိးၥၭႇ ပကဘၪအီၪကၧၩ့ဖျိၪ့ပၥၭလၧ ကဆါဎြံၬ နီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧႉ ႇ ၥၫ့ဎွၩဖရၫ့စ့ၭအဆၧၥီၪ့ဆၧၥၫ့ အဆၧရၩလၩ့အနိၫ့ဖၧၩ့ မုက နံၩယီၩယအဲၪ ဒိၭ ရၩလၩ့န့အ့ၪဘၪနၥံၪနီၪမွဲဝ့ၫဒၪ ဎြံၬဖိၪၥံၪနီၪ ကဘၪကဲၪ ၦထိးၥၭလၧ ကဆါဎြံၬ အဂဲးႇ ကဘၪ အီၪကၧၩ့ဖျိၪ့ အၥၭ လၧ ကဆါဎြံၬအဂဲးအကၠီၩ့နီၪလီၫႉ ကဆါဎြံၬနီၪ လီၩလၩ့ အၥၭ အဝ့ၫနီၪမွဲဝ့ၫ စဘံၭအမုဂီၩ့ ပဝ့ၫၥံၪနီၪ မွဲဝ့ၫ စဘံၭအထဲၩ့အဖၫ့အကၠီၩ့ အ့ၪပလအီၪဆုးကျိၭဘၪပၥၭ လၧအဝ့ၫစွါဘဲၫ  ပၥၭမၧၫ့လကဲၪၥ့ၪလၧၩ့ဘၪနီၪလီၫႉ မွဲဆၧ နီၪ ပဎြံၬဖိၪၥံၪယီၩ ပလိၪကဆါဎြံၬၥိၭ ကဆါဎြံၬနးဆ့ အလိၪအီၪလၧပၧၩနီၪလီၫႉ

            ဘဲၫ အထဲၩ့အဖၫ့လအီၪဘၪ စဘံၭမုလအီၪဘၪၥိၭ ႇ စဘံၭအမုလအီၪဘၪစွါဘဲၫ စဘံၭအ ထဲၩ့အဖၫ့ဆ့ အီၪလကဲၪၥ့ၪဘၪနီၪလီၫႉ ဆၧလၧအထဲၩ့အဖၫ့ၥံၪနီၪ အီၪဂုးခၧၫ့ဒၪအဝ့ၫ လကဲၪၥ့ၪ ဘၪဂီၩ့ ဘၪဒိၭနဲၩ့အၥၭလၧ အမုထီးလူၬထီးဆံၫ့နီၪလီၫႉ စဘံၭအထဲၩ့အဖၫ့ ကဎိၩထၪ့ဒိၪထၪ့အဂး စွါဘဲၫ ကဘၪအီၪဆုးကျိၭအၥၭလၧ အမုတၡါဒ့ၭဂီၩ့မၬ ကဖီၫကၥၪထၪ့ဝ့ၫဒၪနီၪလီၫႉ ဘဲၫယီၩၥိၭ လီၫ စဘံၭအထံၭနးဆ့ အထဲၩ့အဖၫ့အီၪမၬ အဖီၫ အၥၪ ကအီၪထၪ့ဝ့ၫဒၪနီၪလီၫႉ ဘၪမနီၪလဲၪစွါ ဘဲၫ စဘံၭအၥၪနီၪ ၥၪလၧအမုဖၧၩ့အ့ၬအကၠီၩ့နီၪလီၫႉ မွဲစနီ စဘံၭ အမုဒဲ စဘံၭအထဲၩ့အဖၫ့နီၪ လါခီၫလါဘၩလိၪလိၬၥၭအကၠီၩ့လီၫႉ စဘံၭအၥၪကအီၪအဂး အမုဒဲအထဲၩ့အဖၫ့ ကဘၪအီၪဝ့ၫဒၪ မီၪ့ဎီၩ့နီၪလီၫႉ

            အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧႉႇ စဘံၭၥၪကၥၪအဂး စဘံၭအမုဒဲ အထဲၩ့အဖၫ့ နီၪ ကဘၪ အီၪဝ့ၫလဖျိၪ့ဎးနီၪလီၫႉ ယွၩအဆၧမၪလူၬၥံၪ ႇ ဆၧဘၪဆိၪဂ့ၩအမွဲအတီၩၥံၪ ႇ ဆၧယၫ့ ၥုၪ့ယၫ့ၥၭအဆၧမၩၥံၪ ပလမၩဒံၭဘၪ ပကဘၪလ့ၩဂုးလၧ ကဆါဎြံၬအီၪ ႇ ပကဘၪအီၪဆုးကျိၭ လိၬၥၭလၧ ကဆါဎြံၬအီၪနီၪလီၫႉ အ့ၪပလအီၪဆုးကျိၭဘၪလၧ ဎြံၬကဆါစွါဘဲၫ ပလမွဲဘၪ ဎြံၬဖိၪ အဂ့ၩဂီၩ့ အ့ၪပအီၪဆုးကျိၭလိၬၥၭလၧ ကဆါ ဎြံၬနီၪ  တခၩဒၪ ကမွဲဆၧမၩအဂ့ၩၥံၪ ပမၩကဲၪထၪ့ ကန့ဝ့ၫနီၪလီၫႉ ကဆါဎြံၬနီၪ အဲၪဒိၭပၧၩ ပကကဲၪ အဝ့ၫအဂး ၦထိးၥၭနီၪလီၫႉ ကဆါဎြံၬထဲၩ့ထၪ့ လၧဖါကဆါယွၩအီၪဂီၩ့ အဝ့ၫအီၪက့ၪထၬအဆၧအဲၪလၧ ၦၡၩအဖၫ့ခိၪၥံၪလဖၪ ၦၡၩၥံၪကၥ့ၪယၫ အဂး ပကဘၪဆုးလီၩ့လၩ့လၬလၩ့လိၪဝ့ၫဒၪနီၪလီၫႉ အနီၪမၬဎြံၬကဆါအဆၧအဲၪ အချံၫအၥၪ နီၪ ကဂုးထၪ့အၪထၪ့ဝ့ၫလၧ ဂၪ့ခိၪချိၫ့ဖၧၩ့ယီၩနီၪလီၫႉ

            အ့ၪပအီၪဆုးကျိၭလိၬၥၭလၧ ဎြံၬကဆါနီၪ ပကန့ဘၪဆၧအခိးအတၩလၧ ၥၭမုဆံၫ့ဎံၪအီၪ ဂီၩ့ ၥၭမုဆံၫ့ဎံၪ အခိးအတၩအကၠီၩ့ ပနဲၩ့ဎီၩ့အဂး ပဖ့ၪအ့ၪဆၧအဂ့ၩ ကန့အၪထၪ့ဝ့ၫဒၪနီၪလီၫႉ အ့ၪပအီၪလၧ ကဆါဎြံၬစွါဘဲၫ ဎြံၬကဆါအဆၧၥၭထိၬအပရၧၫ့ၥံၪနီၪ ကအီၪလၧပၧၩဂီၩ့ ပအလိၪလ ဖၪၥံၪနီၪ ကဆါဎြံၬ ကမၩလၧၫ့ဎွ့ၩထၪ့အ့ၪ ဒၪပၧၩနီၪလီၫႉ ပဆၧၥၭမၧၫ့ အဆၧလ့ၩထၪ့လ့ၩထီၫအဂး နီၪ ဘၪထွ့ၪဝ့ၫဒၪလၧ ပဆၧအၪ့ကံၩ့ဘၩဆိၪဖၪ အဖၫ့ခိၪ နီၪလီၫႉ ပကအီၪက့ၪထၬပၥုၪ့ပၥၭဘဲၫ ကဆါဎြံၬကန့အဂး ႇ ပကအီၪက့ၪထၬပဆၧအဲၪ ဘဲၫကဆါဎြံၬၥိၭကန့ အဂးနီၪ ပကဘၪအၪ့ကံၩ့ ဘၩဆိၪဖၪလၧ ကဆါဎြံၬအီၪနီၪလီၫႉ အနီၪမၬ ပဖ့ၪအ့ၪဂၪ့ခိၪချိၫ့ ဆၧမုၬဆၧၡူၪ အချံၫ အၥၪကန့ ဝ့ၫဒၪအကၠီၩ့ ပကဘၪအီၪဆုးကျိၭလိၬၥၭလၧ ကဆါဎြံၬအီၪအဂး ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭအဂဲး ယရၩလၩ့ဖ့ၪၥ့ၪယၫအ့ၪဘၪနၥံၪလၧ ဆၧအဲၪဆၧကွံၩဎိၩဒိၪဖၧၩ့နီၪလီၫႉ

Add new comment

8 + 11 =