ဎြံၬစမၬအဆၧဖၩ့နီၪ ဆၧနးမံၩ့ မၩလၩ့ဖံၬလန့ဘၪလီၫ

ထၧၫ့ဖုဝဲထံၩၥိၭထီးလူၬၥံၪဧ့ႇ မုကနံၩယီၫ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭအဆၧၥီၪ့ဆၧၥၫ့နီၪ မွဲဝ့ၫဒၪလၧဂၪ့ခိၪချိၫ့ဖၧၩ့ယီ တခၩဒၪဆၧကၪဆၧဂဲၩအီၪဝ့ၫဒၪလါနၫ့ ဆၧဆၫဆီၪ့ၥံၫဆီၪ့ခဲၪထၪ့ဝ့ၫယါနၫ့ မၩလၩ့ဖံၬ ဎြံၬစမၬအဆၧဖၩ့လန့ဘၪအဂဲးအကၠီၩ့နီၪလီၫႉ ဎြံၬစမၬခံၫ့ခၫဆၧၫ့တီယီၩ ဎြံၬဖိၪၥံၪအဂံၪ့လးဖၧၩ့မွဲဂ့ၩ ၥရိၬလးဖၧၩ့ၥံၪမွဲဂ့ၩ ဆအၪ့ဎွ့ၩဆၪ့ဆၫဆၧအလး ဖၧၩ့မဲဂ့ၩ ဎြံၬဖိၪၥံၪအီၪအလးအၪအၪဂီဂီနီၪဖိၬလိၬထၪ့ထၬ ဎြံၬစမၬဟံၪ့ထံၭၥံၪ ဎြံၬအီၪဖျဲၪအလး ၥံၪအီၪဝ့ၫဒၪနီၪလီၫႉ ဆၧဖိၬလိၬထၪ့ထၬဆၧဎံၫဆၧလၩလဖၪၥံၪယီၩ ဖိၪၥၪဆံၭၥံၪဒဲ ၦၡၩအဎိၩၥံၪ ၦၡၩထီးအလူၬၥံၪအၥၭခံဖၧၩ့ ကဲၪထၪ့ဝ့ၫဒၪ ဆၧမုၬလၩၥၭဎွံၫနီၪလီၫႉ

ဘၪနီၫလဲၪစွါဘဲၫ ခံၫ့ခၫဆၧၫ့ထီဘဲၫယီၩ ဂၪ့ခိၪထၧၫ့ဘံၪ့ယၫနီၪ ဘၪဒၪခီၩ့ဆၧၫ့ယၫ ကိၪပံၭဆၧဆၫနီၪကမံၩ့ ထံၫကးလနၩ့နၩ့နီၪ လၧအထံၫခးဖၧၩ့ဆၧဒုၭဆၧယၩကဲၪထၪ့ဝ့ၫဒၪ ကမံၩ့အကၠီၩ့ဆၧလဖၪၥံၪယီၩကအီၪဖျါထုၬအခံၫ့ကထီၩ့ဝ့ၫ မဆံၭလဲၪ ပလၥ့ၪယၫဘၪအကၠီၩ့ ဖိၬလိၬထၪ့ထၬ ဎြံၬစမၬ ဆဎံၫဆၧလၩ ဎြံၬအီၪဖျဲၪအလးလဖၪၥံၪယီၩ မွဲဝ့ၫဆၧယိလါ အဆၧနဲၪ့ၥံၪနီၪလီၫႉ လါနၫ့ ဎြံၬစမၬဆၧမုၬလၩၥၭဎွံၫလဖၪၥံၪယီၩ ပဆၧမုၬလၩၥၭဎွံၫ ကကဲၪထၪ့ လမံၩ့လီၫအဂး လမွဲဘၪတၭ ပကဘၪအၪ့ဎၬဆီၫ့မီၪထၪ့ထဲၩ့ ဎြံၬအီၪဖျဲၪအခီၫပယီၫ ယိၬယီၬလ့ၬအကၠီၩ့ မွၩအဆၧအိၪဆၧကွံၩနီၪ ဘဲၫကဆါဎြံၬ နဲၪဖျီၪထၪ့အ့ၪပၧၩၥိၭပဝ့ၫၥံၪနးဆ့ ပကဘၪနဲၪဖျီၪထၪ့ထဲၩ့အ့ၪ ဎြံၬအဆၧအဲၪဆၧကွံၩယီၩလၧ ဂၪ့ခိၪဖိၪၥံၪအီၪအကၠီၩ့ ဆၧၥၭထိၬအပရၧၫ့အဆၧလၩဖၩ့ယီၩ တခၩဒၪ ဆၧကၪဆၧဂဲၩနးမံၩ့နီၪမၩ လၩ့ဖံၬခွံၬဆၧဖၩ့ ယီၩလန့ဘၪအကၠီၩ့ဆၧဖၩယီၩ ပကဘၪဒုၭဖၩ့ထၪ့လၧလၥၭခံဖၧၩ့ ဂံၪ့ဒီၪ့ၥံၪဖၧၩ့ ၦအလိၪဆၧဖၩ့ယီၩၥံၪအီဖၧၩ့အကၠီၩ့ အနီၪမၬယွၩနီၪ ကအီၪထဲၩ့လၧ ပဆူၭပကျၩ လဘျၩ့ဒီၭအကၠၩ့ ၥၫ့ဎွၩဖရၫ့စ့ၭ အဆၥီၪ့ဆၧၥၫ့အီၪဝ့ၫဒၪ ဘဲၫယီၩၥိၭနီၪလီၫႉ

ဒီၪနါ ခိၭနၪ ဆၧဂၩ့မၧၫ့လါဆံၭ