ဆၧၥၭမၧၫ့ဖၧၩ့ ဆၧဘၩဆိၪဖၪ အကၧၩ့ဒိၪအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့, မုကနံၩယီၩ ယအဲၪဒိၭရၩ့လၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧၥၭမၧၫ့ဖၧၩ့ ဆၧဘၩဆိၪဖၪ အကၧၩ့ဒိၪအဂဲးအကၠီၩ့နီၪလီၫႉ ထၧၫ့ဖုဝဲထံၩၥိၭ ထီးအလူၬၥံၪဧ့, ဆၧဘၩဆိၪဖၪနီၪ ပမိမၩဆၧလမံၩ့မံၩ့ ကလၧၫ့ဎွ့ၩအဂးလီၫမွဲအ့ၬႉ အမံၩ့ဒၪဆၧပလုထၪ့လၧ ဖါကဆါယွၩအီၪမွဲဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့ အီၪဝ့ၫဘဲၫယီၩၥိၭနီၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧ့, ကကၠၪကၠၪ ပအၪ့က့ၩဆိၪဖၪဆၧလါနၫ့ ဆၧအၪ့လဲၩထၪ့အၥၭ လအီၪဘၪနီၪ မွဲဝ့ၫဒၪ ပဆၧအၪ့က့ၩဘၩဆိၪဖၪ အကၠီၪ့အဖျီၩ့ဘၪမၪဝ့ၫဒၪ အကၠီၩ့နီၪလီၫႉ အၡါမၬနီၪ ၥၭမုဆံၫ့ဎံၪအဆၧလၩဆၧဖၩ့ အ့ၪပလဒိၭန့ဘၪစွါဘဲၫ ပအၪ့က့ၩဘၩဆိၪဖၪဆၧ လၥ့ၪဘၪနီၪလီၫႉ ပအလိၪကလၧၫ့ဎွ့ၩအဂးလီၫ ပအၪ့က့ၩဘၩဆိၪဖၪ စွါဘဲၫ ပဆၧဘၩဆိၪဖၪၥံၪယီၩ ကကဲၪထၪ့ဝ့ၫဒၪ ပအဲၪလၩ့ၥၭပၧၩလဂၩဎးအဂးလီၫ မွဲဝ့ၫလီၫႉ ထၧၫ့ဖုဝဲထံၩၥိၭထီးအလူၬၥံၪဧ့, ဘဲၫၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪထၬၥိၭ ပအလိၪကလၧၫ့ဎွ့ၩအဂး လမံၩ့လီၫ လမွဲဘၪတၭ ဘဲၫဖါကဆါယွၩအလိၪအီၪၥိၭ ပလုထၪ့လၩ့ပၥၭဂီၩ့ ပအၪ့က့ၩဘၩဆိၪဖၪဆၧဧၪ?

ထၧၫ့ဖုဝဲထံၩၥိၭထီးအလူၬၥံၪဧ့, ပထိးဆၧၫ့ကဆါယွၩအလိၪကန့အဂး, ၥၭဆၧအၪ့လဲၪထၪ့အၥၭ ကအီၪအဂး ပနၪ့ဆါဒၪပဝ့ၫ ပကဘၪကျ့ၭစၨၭဂီၩ့ ပကဘၪလုထၪ့လၩ့ပၥၭ လၧဖါကဆါယွၩအီၪ မွဲဝ့ၫဒၪနီၪလီၫႉ လၧပဆၧၥၭမၧၫ့ မုကိၭနံၩဒ့ၭဖၧၩ့ ပဘၪဒၪ ဆၧၥုၪ့ထိၬၥၭထိၬ, ဆၧၥုၪ့အုၭၥၭအုၭ, ဆၧဆီၪ့ဆၧချဲၫ့, ဆၧစူၭဆၧဆၫ ထီးအလူၬအဖၫ့ခိၪ လၧဖါကဆါယွၩအီၪ ပကလုထၪ့ ပဆၧဘၩဆိၪဖၪဂီၩ့ ပကဘၪအၪ့န့ထၪ့ နးၥၭအဂဲးအဘၭနီၪလီၫႉ မွဲဆၧနီၪ ထၧၫ့ဖုဝဲထံၩၥိၭထီးအလူၬၥံၪဧ့, ပဆၧၥၭမၧၫ့ဖၧၩ့ တခၩဒၪပဘၪၥၭမၧၫ့ဆၧၫ့ထီဖၧၩ့ ပကဘၪအီၪၥၭမၧၫ့ဝ့ၫဒၪလၧ ဆၧလုထၪ့လၩ့ၥၭဆၧဘၩဆိၪဖၪဖၧၩ့တၭ ဘဲၫၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪၥိၭ ပကအီၪၥၭမၧၫ့ကၠၭ ကိၭဒံၩကိၭဂၩ လါဆံၭနဲၪႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧဆိၪဂ့ၩဆိၩဘွၩလါဆံၭႉ