ဆၧအီၪမၧၫ့ဆၧဆူနဲၩအဝံဆဲၩလၩ့အီၪဂုးခၧၫ့လၧကဆါဎြံၬဖၧၩ့အဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧအီၪမၧၫ့ဆၧဆူနဲၩအဝံ ဆဲၩလၩ့အီၪဂုးခၧၫ့လၧ ကဆါြဎံၬဖၧၩ့အဂဲးအကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဆၧၥၭမၧၫ့ဒဲ ပဆၧဆူနဲၪ အဝံအစၧၩ့လဖၪနီၪ ပကဒၩ့ထၬႇ ပကပၧၩ့ထၬဝ့ၫအဂး မွဲဝ့ၫဒၪ အရ့ၩဒိၪနီၪလီၫႉ မွဲဆၧနီၪ လံၬဆံၫ့ဎံၪ စပီလူၫကွ့ၭန့ၦကလီစံၫဖိၪၥံၪ (2:7)ဖၧၩ့ ၦအၥီၫ့ဖိၪ စပီလူၫ မၩထုၪ့ၥုၪ့ထုၪ့ၥၭအ့ၪပၧၩနီၪ မွဲဝ့ၫဒၪ ပဆၧၥၭမၧၫ့ အခၪ့ထံၭခၪ့ဎၧၩ့ လိးဝံအဂဲး ဘၪထွ့ၫဝ့ၫလၧ ပဆၧၥၭမၧၫ့ ဂုးဂုးခၧၫ့ခၧၫ့ ကအီၪအဂးဂီၩ့ ပဆၧၥၭမၧၫ့နီၪ ပကဘၪအီၪၥၭမၧၫ့ အဂုးအခၧၫ့လၧ ကဆါြဎံၬအီၪအဂး ၥီၪ့ၥၫ့ထၬဝ့ၫနီၪလီၫႉ ဎရံၬစမၬ ၥံၪ့ထံၭယီၩ မၩနၪ့ထၪ့အ့ၪပၧၩ မွဲဝ့ၫလၧ ကဆါြဎံၬအီၪ ပဆၧၥၭမၧၫ့အဝံ အဂုးအခၧၫ့ အီၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ ၥီၪ့ၥၫ့ထၬဝ့ၫဒၪ ဘဲၫယီၩၥိၭနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭၥံၪဧ့ႇ အၡါမၬနီၪ လၧကဆါြဎံၬအီၪ ပလီၩဝ့ၫပဆဲၩလၩ့ထၬပဝံနီၪ မွဲဝ့ၫဒၪ ပဆူနဲၩဆၧကမံၩ့လီၫ မွဲအ့ၬဂီၩ့ ပၩရမံၫလဖၪနီၪ ပလီၩ့မၩဖိၬထွ့ၫ ထုၭဂဲးထုၭဘၭဂီၩ့ ကဆါြဎံၬအဆၧၥီၪ့ဆၧၥၫ့လဖၪနီၪ ဆၧဘၩဆိၪဖၪဖၧၩ့ ပကအီၪက့ၪထၬပၥၭတၭ ပနၫ့ဆါဒၪပဝ့ၫ ပလီၩ့မၩဖိၬထွ့ၫၥိၭ ၦဂူၫဂၩအဂးနးဆ့ ပအၪ့နၩ့အ့ၪ ဆၧၥၭထိအပရၧၫ့နီၪ မွဲဝ့ၫဒၪ လၧကဆါြဎံၬအီၪ ပဆဲၩလၩ့ထၬပဝံနီၪလီၫႉ

အရ့ၩဒိၪထုၬအအၪနီၪ မွဲဝ့ၫကဆါယွၩအခိးအတၩ ကဂုးထၪ့အၪထၪ့အဂး ပကဒိၭန့ထၪ့ စကရမဲၫတူၩလဖၪ ခိၭမၬခိၭမၬအကၠီၩ့ ပနးၥၭဂဲးဘၭ အလၧၫ့အဎွ့ၩဖၧၩ့ ပအီၪၥၭမၧၫ့ကန့ဝ့ၫဒၪနီၪလီၫႉ မွဲဆၧနီၪ တခၩဒၪ ပဘၪအီၪၥၭမၧၫ့ ဆၧအထၧးအလၧးနးမံၩ့ႇ တခၩဒၪ ပဘၪအီၪနးစီၪ့ ဆၧထုၪ့ၥုၪ့ထုၪ့ၥၭဖၧၩ့ စကရမဲၫတူၩလဖၪနီၪ ပကဒိၭန့အဂး ဆၧကဲၪထၪ့ကယဲဒၪ ဆၧကၠီၪ့ဆၧဖျီၩ့ဖၧၩ့ ပကကျ့ၭစၨၭလါဆံၭႉ အဲၪကွံၩဘၪထၧၫ့ဖုဝဲထံၩၥိၭထီးအလူၬ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ