ဆၧအီၪကီၪ့ဖိၪၥံၪ အဆၧၥၭမၧၫ့ဖၧၩ့ ဘၪထွ့ၫလၧစူၪ (၅) ဘီၩ့ ပကြၨၭလီၩ့မၩဖိၬထွ့ၫဝ့ၫ ပၩရမံၫလဖၪအဂဲး

ဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧအီၪကီၪ့ဖိၪၥံၪ အဆၧၥၭမၧၫ့ဖၧၩ့ ဘၪထွ့ၫလၧစူၪ (၅) ဘီၩ့ ပကြၨၭလီၩ့မၩဖိၬထွ့ၫဝ့ၫ ပၩရမံၫလဖၪအဂဲးအကၠီၩ့နီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့ႇ ပကဘၪလီၩ့မၩဖိၬထွ့ၫဆၧလဖၪၥံၪနီၪ မနီၫလဲၪစွါဘဲၫ

(၁) အဆိၫထုၬကထံၪနီၪ မွဲဝ့ၫဒၪ ပကဘၪအၪ့က့ၩဘၩဆိၪဖၪဆၧနီၪလီၫႉ ဆၧဘၩဆိၪဖၪနီၪ ပနးၥၭဂဲးဘၭ ကန့ထၪ့အဂး မွဲဝ့ၫဒၪ ဆၧၥၭမၧၫ့ထံၫနီၪလီၫႉ မွဲဆၧနီၪ ဘဲၫပမိၡါ ကအီၪဆီၫ့အဂး ပအီၩထံၫၥိၭ ပနးၥၭအဂးနးဆ့ ပကဘၪအၪ့က့ၩဘၩဆိၪဖၪဆၧ ကိၭနံၩဒ့ၭနီၪလီၫႉ

(၂) နံၫထံၪကထံၪနီၪ ပကဘၪအီၪၥၭမၧၫ့လၧ ဆၧကၧၩ့ဖျိၪထၬပၥၭဆၧ အဆၧမၩနီၪလီၫႉ ၦလဂၩမၬ လဂၩဎးအီၪၥၭမၧၫ့ လန့ဘၪအကၠီၩ့ ၦဆၧဂုထၪ့အၪထၪ့ဆၧလဖၪၥံၪယီၩ ဘၪထွ့ၫဒၪလၧ ဆၧအဒိၩ့အဝၩ့ဒဲ ၦဂူၫဂၩၥံၪနီၪလီၫႉ မွဲဆၧနီၪ ပကဘၪအီၪလၧ ပဂံၪ့ဒီၪ့ကၠၧၫ့ကၠၧၫ့ႇ ပကဘၪအီၪလၧ ၡၩခံးဂးအဒီၩ့အဝၩ့ဖၧၩ့ဂီၩ့ ဘဲၫၦဂူၫဂၩဎိၩထၪ့ဒိၪထၪ့ၥိၭ ပဝ့ၫၥံၪနးဆ့ ပကဎိၩထၪ့ဒိၪထၪ့အဂး ပကဘၪမၩကဲၪထၪ့ဆၧလၧ ဆၧထုၪ့ၥုၪ့ထုၪ့ၥၭဖၧၩ့နီၪလီၫႉ

(၃) ၥၧၫ့ထံၪကထံၪနီၪ ပကဘၪအီၪၥၭမၧၫ့လၧ ဆၧတီၩဆၧလီၩ့ဖၧၩ့နီၪလီၫႉ ဆၧလၧဆၧတီၩဆၧလီၩ့နီၪ မၩခဲၩထၪ့ ကဆါယွၩ အဆၧကိၪ့ၥ့ၪ အဆၧဖၩ့နီၪလီၫႉ ပဆၧၥၭမၧၫ့အဂး ဆၧလၧဆၧတီၩဆၧလီၩ့ယီၩ ပကဘၪလီၩ့မၩဖိၬထွ့ၫအဂး အရ့ၩဒိၪထုၬ မွဲဝ့ၫပၩရမံၫကမံၩ့ဂီၩ့ ၦဂူၫဂၩၥံၪဒဲပၧၩ ၥုၪ့ထံးၥၭထံးႇ ကဲၪထံၩကဲၪၥိၭအဂး ဆၧလၧဆၧတီၩဆၧလီၩ့ယီၩ မၩလၩ့ဒိၩ့ပၧၩနီၪလီၫႉ

(၄) လံထံၪကထံၪနီၪ ပကဘၪအီၪၥၭမၧၫ့လၧ ဆၧကွဲၪဖျါခွံၬဆၧဘၪမၪဖၧၩ့နီၪလီၫႉ ဆၧလၧဆၧဖျါခွံၬဆၧနီၪ မွဲဝ့ၫဒၪ ပၥုၪ့ထၪ့ ပနၫ့ဆါဒၪပဝ့ၫ ထီလၧယၫနီၪလီၫႉ ၦဂူၫဂၩၥံၪအဆၧမၪနီၪ ဘိၩ့ယီၩပကွဲၪဖျါခွံၬအဖၧၩ့ ပန့ထၪ့ ဆၧဎူၫဆၧဎၩ့ဂီၩ့ ဘိၩ့ယီၩအခံၫ့ လကၭဒံၭဘၪ ထီလၧယၫအဂး ပဖံၭမၩဆၧကကၠၪ မွဲကန့ထၪ့ ဆၧအခိးအတၩနီၪလီၫႉ

(၅) လခဲၫ့ထုၬကထံၪနီၪ ပကဘၪအီၪၥၭမၧၫ့လၧ ဆၧဖ့ၪဆၧၫ့လၩ့ၥၭနီၪလီၫႉ ၦဂူၫဂၩၥံၪအဂး ဆၧဖ့ၪဆၧၫ့လၩ့ၥၭနီၪ မွဲဝ့ၫ ဂဲးဘၭ လၧအအၪ့လဲၩထၪ့ခွံၬ ဂၫ့ခိၪချိၫ့နီၪလီၫႉ

            မွဲဆၧနီၪ အဲၪကွံၩဘၪထၧၫ့ဖုဝဲထံၩၥိၭထီးအလူၬဧ့ႇ ခိၭၥုၪ့လၩ့ဆါၥၭလၩ့ဆါနးဆိၩလဂ့ၩႉ ဘၪမနီၫလဲၪစွါဘဲၫ ကဆါဎြံၬနီၪ အီၪလၧနၥံၪအၥိၭ ကိၭကၠၪဒ့ၭနီၪလီၫႉ ကဆါယွၩနီၪ ခွံၬၡိၬထၬနၥံၪ နးဆိၩအ့ၬႉ မွဲဆၧနီၪ ထၧၫ့ဖုဝဲထံၩၥိၭထီးအလူၬ ၥၫ့ဎွၩဖရၫ့စ့ၭ ၥီၪ့ၥၪ့ထၬ ဆၧအီၪကီၪ့ဖိၪၥံၪ အဆၧၥၭမၧၫ့ဖၧၩ့ ဘၪထွ့ၫလၧ စူၪ(၅) ဘီၩ့ ပၩရမံၫလဖၪနီၪ မွဲနၥံၪလီၩ့မၩဖိၬထွ့ၫန့ဝ့ၫဒၪ ကိၭဒ့ၭကိၭဂၩလါဆံၭႉ