ဆၧအခိးအတၩဖၧၩ့ ပဆၧၥၭမၧၫ့ အၪ့လဲၩထၪ့ၥၭ န့ဝ့ၫဒၪအဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧအခိးအတၩဖၧၩ့ ပဆၧၥၭမၧၫ့ အၪ့လဲၩထၪ့ၥၭ န့ဝ့ၫဒၪအဂဲး အကၠီၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပဒၪဆၧၫ့ယၫဘၪ ကဆါယွၩ အဆၧလၩ့ဆၫ့လၩ့မဲၩ အစူၪလးအခၫ ပအၪ့စၪ့ယံၫယါဆၧ ကကၠၪကၠၪဂၩႉ ကဆါယွၩနီၪ ၦအဂဲးဆံၭအဘၭဆံၭ ဒဲၩဘၭဖိၪနီၪ လၧအဝ့ၫအဆၧမၩ ကမၩဝ့ၫအဂး ၥိၩ့ထၪ့ဝ့ၫဘဲၫၥ့ၪလဲၪႉ ထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧကိၭမံၩ့ကိၭဆံၩ့နီၪ ဎိၭလၩ့ဎဲၩလၩ့ထၬၥၭလၧ ကဆါယွၩ အဆၧထံၫလၩ့ဒီၪလၩ့အကၠီၩ့ ဆၧလမံၩ့မၬ ဂဲၫကဲၪထၪ့ဒၪ အနၫ့ဆါဒၪအဝ့ၫ လအီၪဘၪနီၪလီၫႉ ကဆါယွၩနီၪ ၦလဂၩဂီၩ့လဂၩ အဂဲးအဖးနီၪ ကၧၩ့ဖျိၪ့ထၬဝ့ၫ ထၧၫ့ကကဲၪလၫ့ ဖးဖီၩ့နီၪလီၫႉ မွဲဆၧနီၪ ပဝ့ၫၥံၪထီးအလူၬယီၩ ကဆါယွၩ အဆၧထိးထဲၩ့တၩ့ထဲၩ့ အဆၧဎိၭထံၫဎိၭဒီၪနီၪ လၧဆၧဆူနဲၩဖၧၩ့ ပကဘၪမၩဆၧၫ့ထဲၩ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ကဆါယွၩ အဆၧကိၭနီၪ ပဝ့ၫၥံၪအဂး အီၪထၬဝ့ၫဒၪအကၠီၩ့ မွဲဆၧနီၪ ပနၫ့ဆါဒၪပဝ့ၫ ပကဘၪအီၪတဲၩ့ဝဲၩထၬပၥၭ ဆူဆူယိၬယိၬအဂး လိၪဝ့ၫဒၪနီၪလီၫႉ ကဆါယွၩနီၪ အၪ့မၧၫ့လၩ့ႇ ဖျါလၩ့ပၧၩ ကိၭကၠၪဒ့ၭဂီၩ့ ကဆါယွၩ အနၫ့ဆါဒၪအဝ့ၫ ဖ့ၪအ့ၪပဝ့ၫၥံၪ အဝ့ၫအခိးအတၩဒဲ ယၫ့ၥၭမၩဆၧၩ့ပၧၩအကၠီၩ့ ပကဘၪၥ့ၪယၫဘၪနီၪလီၫႉ ထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧအခိးအတၩနီၪ အၪ့လဲၩထၪ့ ပဝ့ၫၥံၪ အဆၧကဲၪ အရ့ၩဒိၪထုၬဂီၩ့ ပလီၩလၩ့ရၩလၩ့ ဆၧၥၭထိၬ အပရၧၫ့အဂး ပဝ့ၫၥံၪယီၩ မွဲဝ့ၫၦလၧအကြၨၭဘၪၦၡၩၥံၪအကၠီၩ့ ပကထုၪ့ၥုၪ့ထုၪ့ၥၭဂီၩ့ ပကဖ့ၪအ့ၪဆၧအခွ့းလါဆံၭႉ

ဆၧအခိးအတၩနီၪ မၩလုဘံၭ ဆၧဒဲၩဘၭထီးအလူၬ အရ့ၩဒိၪထုၬဂီၩ့ အၪ့လဲၩထၪ့ ပၥုၪ့ပၥၭဒဲ ပဆၧၥၭမၧၫ့ၥၭၡီၩ့တၭ မၩဒၪထၪ့န့အ့ၪ ပဝ့ၫၥံၪ ဆၧဖျီၩ့အၥၫ့နီၪလီၫႉ မွဲဆၧနီၪ ပလကြၨၭၥၭနၪ့ဘၪ ဆၧအခိးအတၩအဂဲးအကၠီၩ့ ယရၩလၩ့န့အ့ၪဘၪနၥံၪ ဘဲၫယီၩနီၪလီၫႉ အဲၪကွံၩဘၪထၧၫ့ဖုဝဲ ထံၩၥိၭထီးအလူၬ မွဲနၥံၪကိၭဂၩဒ့ၭ အဖၫ့ခိၪ ကဆါယွၩ အဆၧအဲၪဆၧကွံၩ လၩ့ယွၩဝ့ၫဒၪ ကိၭကၠၪဒ့ၭလါဆံၭႉ