ဆၧလၧဆၧအဲၪဆၧကွံၩနီၪ ဖ့ၪလၫ့လၩ့အၥၭလၧ ၦၡၩၥံၪအဂး ဆၧအၪ့မၧၫ့ဝ့ၫဒၪလီၫႉ

ထၧၫ့ဖုဝဲထံၩၥိၭထီးအလူၬၥံၪဧႉႇ မုကနံၩယီၩ ယအဲၪဒိၭရၩလၩ့န့အ့ၪ ဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ ဆၧ ၥၫ့ နီၪမွဲဝ့ၫဒၪ အ့ၪပအီၪလၧ ယွၩအဆၧအဲၪဆၧကွံၩဖၧၩ့စွါ ဘဲၫ ပက ဘၪဖ့ၪလၫ့လၩ့ ပၥၭလၧ ၦၡၩၥံၪအဂး ဆၧအၪ့ မၧၫ့ဝ့ၫဒၪ အဂဲးအကၠီၩ့နီၪလီၫႉ ကဆါဎြံၬနီၪ ကိၭဖံၭၥိၭပၧၩ ဘဲၫပက အီၪလၧ အဝ့ၫအဆၧမုၬဆၧၡူၪဖၧၩ့ဂီၩ့ ပဆၧမုၬ ဆၧၡူၪ ကလၧၫ့ဎွ့ၩအဂး ပက ဘၪအီၪလၧအဝ့ၫ အဆၧအဲၪဆၧကွံၩဖၧၩ့ အကၠီၩ့နီၪလီၫႉ ကဆါဎြံၬအဆၧအဲၪအခၪ့ ထံၭနီၪ မွဲဝ့ၫဖါကဆါယွၩတၭ ဆၧအဲၪလၧကဆါဎြံၬအီၪယီၩ လၩ့ယွၩထဲၩ့လၧ ပအီၪ ဘဲၫထံၫချိၬလဘီၩ့ၥိၭနီၪလီၫႉ ကဆါဎြံၬဖ့ၪအ့ၪပၧၩဆၧအဲၪနီၪမွဲဝ့ၫ ဖါက ဆါယွၩအဆၧအဲၪတၭ ဆၧအဲၪယီၩ မွဲဝ့ၫဆၧအဲၪအဆံၫ့အဖျ့ၫ ႇအထုၬ လအီၪ ဘၪဆၧအဲၪ ႇ ဆၧအဲၪပျီၩပျီၩ ဖျ့ၭဖျ့ၭ နီၪလီၫႉ ကဆါဎြံၬနီၪ အဲၪပၧၩလၧ ဆၧအဲၪလဖၪၥံၪယီၩဂီၩ့ အီၪလၧပၧၩ ဘဲၫ အထံၩၥိၭလဂၩၥိၭတၭ ဖ့ၪၥ့ၪယၫအ့ၪပၧၩလၧ ဖါကဆါယွၩနီၪလီၫႉ ၦၡၩၥံၪ ကန့ ဘၪဆၧၥၭမၧၫ့ အဆိၩအကၠၪ အဂး ဖ့ၪအ့ၪပၧၩဆၧဖံၭဆၧမၩလၧ အဝ့ၫဆၧအီၪကီၪ့အဆၧမၩဖၧၩ့နီၪလီၫႉ

          အ့ၪပအီၪလၧ ယွၩအဆၧမၪလူၬထၬၥံၪ အဖၫ့လၬစွါ ဘဲၫ ပအီၪလၧ ကဆါဎြံၬအဆၧအဲၪဖၧၩ့ ယူၭနီၪလီၫႉ ပဆၧအဲၪ ကဘၪကဲၪ ဘဲၫကဆါဎြံၬၥိၭအဂး ဘဲၫကဆါဎြံၬၥူၫဝၭဆံၫ့ အထံၩအဖျဲအ ခၪ့ၥိၭ ပဝ့ၫၥံၪနးဆ့ ပက ဘၪဖ့ၪလၫ့လၩ့ပၥၭလၧ ၦၡၩၥံၪအဂး ဆၧအၪ့မၧၫ့နီၪလီၫႉ ပကဘၪဖ့ၪလၫ့ လၩ့ပၥၭ ၦၡၩၥံၪအဂးဆၧအၪ့မၧၫ့နီၪ လၧပဆၧလူဆၧချဲၩ့ဖၧၩ့လီၫမွဲအ့ၬႉ လၧပဆၧဖံၭဆၧမၩဖၧၩ့ နီၪလီၫႉ ပဆၧအဲၪကလၩ့ဂၩကဆါဎြံၬအဂးနီၪ ပကဘၪ အီၪက့ၪပဲၩထၬ ဆၧအဲၪအဂူၫဂၩၥံၪ ႇ ကျိၪစ့ၩၥံၪႇ ဆၧအနၧၩ့ၥံၪ ႇ ဆၧအစီၩ့အမၩ့ၥံၪ လိၪဝ့ၫဒၪနီၪလီၫႉ

          ဆၧလဖၪၥံၪယီၩ မၩယဲၩ့ထၪ့ပၧၩလၧ ယွၩဂီၩ့ ပအီၪၥၭမၧၫ့ဒၪပၧၩလဂၩဎး အၪထၪ့ဝ့ၫႇ ပစီၪဎိၩ လၩ့ပၥၭ အၪထၪ့ဝ့ၫဒၪ  နီၪလီၫႉ ဆၧလဖၪၥံၪယီၩမၩလၩ့ဎီးဆၧအဲၪဆၧကွံၩနီၪလီၫႉ ပဆၧအဲၪၥံၪအဂး ဆ့ ကဲၪထၪ့ဝ့ၫ ဆၧၥုၪ့ဆၫၥၭဆၫနီၪလီၫႉ ပကအဲၪဆၧ ဘဲၫကဆါဎြံၬၥိၭစွါ ဘဲၫ ပကဘၪအီၪက့ၪ လူဒိၪဎွ့ၩဒိၪ ပနဲၩ့ပဎီၩ့ၦၡၩၥံၪ ႇ ပက ဘၪယူၭယၫ့ အဝ့ၫၥံၪ အဆၧပျီၩဖျ့ၭ ႇ ဘဲၫအဝ့ၫၥံၪ အဆၧၥၭ မၧၫ့အီၪဆုးဆုးၥိၭ ပက ဘၪဖ့ၪအ့ၪပဆၧအဲၪ နီၪလီၫႉ ပ ဘၪဖီၪ့ဂုးထၬၦၡၩ ဘဲၫပၥၭအီၪၥိၭမွဲအ့ၬႉ ၦဂူၫဂၩၥံၪ ဆၧအဂ့ၩကကဲၪထၪ့အဂး ပက ဘၪဖ့ၪလၫ့လၩ့ ပၥၭနီၪလီၫႉ

          ပဆၧမုၬဆၧၡူၪကလၧၫ့ဎွ့ၩအဂး ပကဘၪအီၪဂုးခၧၫ့လၧ ကဆါဎြံၬအဆၧအဲၪဖၧၩ့ လိၪဝ့ၫ ဒၪအကၠီၩ့ ၥၫ့ဎွၩ ဖရၫ့စ့ၭ ကိၭဖံၭၥိၭ ဎြံၬဖိၪၥံၪနီၪလီၫႉ ပဆၧမၩမၪၥံၪ အီၪဝ့ၫဒၪလါနၫ့ ႇ ပၥီၪကၠဲၪၥံၪ လအီၪ ဘၪလါနၫ့ ကဆါဎြံၬနီၪ အဲၪပၧၩတၡါဒ့ၭ ပဆၧၥ့ၪယၫယီၩ ဖ့ၪအ့ၪပၧၩ ဆၧမုၬဆၧၡူၪနီၪလီၫႉ ပဆၧၥ့ၪယၫယီၩ ပကဒုၭဆၧၫ့ဆၧအၪ့ထၩၥံၪ အဂး ဖ့ၪအ့ၪပၧၩဂဲး ဘၭနီၪလီၫႉ ပဆၧကၪဆၧဂဲၩၥံၪဖၧၩ့ ဆ့ ပစဲၪ့ထၪ့န့ဝ့ၫဒၪနီၪလီၫႉ ၦထိးၥၭလဖၪၥံၪနီၪ အီၪၥၭ မၧၫ့လၧ ဆၧမုၬဆၧၡူၪ ဘဲၫယီၩၥိၭဖၧၩ့နီၪ လီၫႉ ဘၪမနီၪလဲၪစွါ ဘဲၫ ဆၧမုၬဆၧၡူၪလဖၪၥံၪယီၩ မွဲဝ့ၫဎြံၬဖိၪၥံၪ အဆၧနဲၪအကၠီၩ့နီၪလီၫႉ အဲၪကွံၩ ဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဘဲၫကဆါဎြံၬ အဆၧကိၭဖံၭၥိၭအီၪပၧၩၥိၭ မွဲပအီၪၥၭမၧၫ့န့ဝ့ၫဒၪလၧ ကဆါဎြံၬအဆၧမုၬဆၧၡူၪဖၧၩ့ ကိၭဒံၩကိၭဂၩလါဆံၭႉ